၆-၂၂. နဟေတုသဟေတုကဒုက-သနိဒဿနတ္တိကံ
၈၇. နဟေတုံ နသဟေတုကံ နသနိဒဿနသပ္ပဋိဃံ ဓမ္မံ ပဋိစ္စ နဟေတု အဟေတုကော သနိဒဿနသပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ.
နဟေတုံ နအဟေတုကံ နသနိဒဿနသပ္ပဋိဃံ ဓမ္မံ ပဋိစ္စ နဟေတု အဟေတုကော သနိဒဿနသပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. ဧကံ. ဂဏိတကေန တီဏိ.
နဟေတုံ နသဟေတုကံ နအနိဒဿနသပ္ပဋိဃံ ဓမ္မံ ပဋိစ္စ။ တီဏိယေဝ.
နဟေတုံ နသဟေတုကံ နအနိဒဿနအပ္ပဋိဃံ ဓမ္မံ ပဋိစ္စ နဟေတု အဟေတုကော အနိဒဿနအပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ.