၇-၁၃. စူဠန္တရဒုကာဒိ

၇. နအပ္ပစ္စယံ ဓမ္မံ ပဋိစ္စ သပ္ပစ္စယော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ.

၈. နအသင်္ခတံ ဓမ္မံ ပဋိစ္စ သင်္ခတော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ.

၉. နသနိဒဿနံ ဓမ္မံ ပဋိစ္စ သနိဒဿနော ဓမ္မော ဥပ္ပဇ္ဇတိ ဟေတုပစ္စယာ. နသနိဒဿနံ ဓမ္မံ ပဋိစ္စ အနိဒဿနော ဓမ္မော ဥပ္ပဇ္ဇတိ ဟေတုပစ္စယာ. နသနိဒဿနံ ဓမ္မံ ပဋိစ္စ သနိဒဿနော စ အနိဒဿနော စ ဓမ္မာ ဥပ္ပဇ္ဇန္တိ ဟေတုပစ္စယာ. ဟေတုယာ တီဏိ.

နသနိဒဿနော ဓမ္မော သနိဒဿနဿ ဓမ္မဿ ဟေတုပစ္စယေန ပစ္စယော။ တီဏိ.

နသနိဒဿနော ဓမ္မော အနိဒဿနဿ ဓမ္မဿ အာရမ္မဏပစ္စယေန ပစ္စယော. နအနိဒဿနော ဓမ္မော အနိဒဿနဿ ဓမ္မဿ အာရမ္မဏပစ္စယေန ပစ္စယော.

၁၀. နသပ္ပဋိဃံ ဓမ္မံ ပဋိစ္စ သပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. နသပ္ပဋိဃံ ဓမ္မံ ပဋိစ္စ အပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. နသပ္ပဋိဃံ ဓမ္မံ ပဋိစ္စ သပ္ပဋိဃော စ အပ္ပဋိဃော စ ဓမ္မာ ဥပ္ပဇ္ဇန္တိ ဟေတုပစ္စယာ. တီဏိ.

နအပ္ပဋိဃံ ဓမ္မံ ပဋိစ္စ အပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. နအပ္ပဋိဃံ ဓမ္မံ ပဋိစ္စ သပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. နအပ္ပဋိဃံ ဓမ္မံ ပဋိစ္စ သပ္ပဋိဃော စ အပ္ပဋိဃော စ ဓမ္မာ ဥပ္ပဇ္ဇန္တိ ဟေတုပစ္စယာ. တီဏိ.

နသပ္ပဋိဃဉ္စ နအပ္ပဋိဃဉ္စ ဓမ္မံ ပဋိစ္စ သပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ။ တီဏိ. ဟေတုယာ နဝ.

၁၁. နရူပိံ ဓမ္မံ ပဋိစ္စ ရူပီ ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ နဝ.

၁၂. နလောကိယံ ဓမ္မံ ပဋိစ္စ လောကိယော ဓမ္မော ဥပ္ပဇ္ဇတိ ဟေတုပစ္စယာ. နလောကိယံ ဓမ္မံ ပဋိစ္စ လောကုတ္တရော ဓမ္မော ဥပ္ပဇ္ဇတိ ဟေတုပစ္စယာ. နလောကိယံ ဓမ္မံ ပဋိစ္စ လောကိယော စ လောကုတ္တရော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

နလောကုတ္တရံ ဓမ္မံ ပဋိစ္စ လောကိယော ဓမ္မော ဥပ္ပဇ္ဇတိ ဟေတုပစ္စယာ. (၁)

နလောကိယဉ္စ နလောကုတ္တရဉ္စ ဓမ္မံ ပဋိစ္စ လောကိယော ဓမ္မော ဥပ္ပဇ္ဇတိ ဟေတုပစ္စယာ. (၁). ဟေတုယာ ပဉ္စ.

၁၃. နကေနစိ ဝိညေယျံ ဓမ္မံ ပဋိစ္စ ကေနစိ ဝိညေယျော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ နဝ.