၂၂. သနိဒဿနတ္တိကံ

၁-၇. ပဋိစ္စဝါရာဒိ

၃၀. နသနိဒဿနသပ္ပဋိဃံ ဓမ္မံ ပဋိစ္စ သနိဒဿနသပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. နသနိဒဿနသပ္ပဋိဃံ ဓမ္မံ ပဋိစ္စ အနိဒဿနသပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. နသနိဒဿနသပ္ပဋိဃံ ဓမ္မံ ပဋိစ္စ အနိဒဿနအပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. နသနိဒဿနသပ္ပဋိဃံ ဓမ္မံ ပဋိစ္စ သနိဒဿနသပ္ပဋိဃော စ အနိဒဿနအပ္ပဋိဃော စ ဓမ္မာ ဥပ္ပဇ္ဇန္တိ ဟေတုပစ္စယာ. နသနိဒဿနသပ္ပဋိဃံ ဓမ္မံ ပဋိစ္စ အနိဒဿနသပ္ပဋိဃော စ အနိဒဿနအပ္ပဋိဃော စ ဓမ္မာ ဥပ္ပဇ္ဇန္တိ ဟေတုပစ္စယာ. နသနိဒဿနသပ္ပဋိဃံ ဓမ္မံ ပဋိစ္စ သနိဒဿနသပ္ပဋိဃော စ အနိဒဿနသပ္ပဋိဃော စ ဓမ္မာ ဥပ္ပဇ္ဇန္တိ ဟေတုပစ္စယာ. နသနိဒဿနသပ္ပဋိဃံ ဓမ္မံ ပဋိစ္စ သနိဒဿနသပ္ပဋိဃော စ အနိဒဿနသပ္ပဋိဃော စ အနိဒဿနအပ္ပဋိဃော စ ဓမ္မာ ဥပ္ပဇ္ဇန္တိ ဟေတုပစ္စယာ. သတ္တ.

နအနိဒဿနသပ္ပဋိဃံ ဓမ္မံ ပဋိစ္စ အနိဒဿနသပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. နအနိဒဿနသပ္ပဋိဃံ ဓမ္မံ ပဋိစ္စ သနိဒဿနသပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ။ သတ္တ.

နအနိဒဿနအပ္ပဋိဃံ ဓမ္မံ ပဋိစ္စ အနိဒဿနအပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ။ သတ္တ. ဟေတုယာ ပဉ္စတိံသ. (ပဉှာဝါရမ္ပိ ဝိတ္ထာရေတဗ္ဗံ.)

ဓမ္မပစ္စနီယာနုလောမေ တိကပဋ္ဌာနံ နိဋ္ဌိတံ.