၁၀၀-၁၄-၅၄. သရဏဒုက-အာသဝါဒိဂေါစ္ဆကာနိ

၉၁. သရဏံ အာသဝံ ဓမ္မံ ပဋိစ္စ နသရဏော နောအာသဝေါ ဓမ္မော ဥပ္ပဇ္ဇတိ ဟေတုပစ္စယာ. သရဏံ အာသဝံ ဓမ္မံ ပဋိစ္စ နအရဏော နောအာသဝေါ ဓမ္မော ဥပ္ပဇ္ဇတိ ဟေတုပစ္စယာ. သရဏံ အာသဝံ ဓမ္မံ ပဋိစ္စ နသရဏော နောအာသဝေါ စ နအရဏော နောအာသဝေါ စ ဓမ္မာ ဥပ္ပဇ္ဇန္တိ ဟေတုပစ္စယာ.

သရဏံ နောအာသဝံ ဓမ္မံ ပဋိစ္စ နအရဏော နနောအာသဝေါ ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ.

၉၂. အရဏံ သာသဝံ ဓမ္မံ ပစ္စယာ နသရဏော နသာသဝေါ ဓမ္မော ဥပ္ပဇ္ဇတိ ဟေတုပစ္စယာ.

အရဏံ အနာသဝံ ဓမ္မံ ပဋိစ္စ နသရဏော နအနာသဝေါ ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ. (ဧတေန ဥပါယေန သဗ္ဗတ္ထ ဝိတ္ထာရေတဗ္ဗံ.)