၂၂-၂၁. သနိဒဿနတ္တိက-အဇ္ဈတ္တာရမ္မဏတ္တိကံ

၅၀. အနိဒဿနအပ္ပဋိဃံ အဇ္ဈတ္တာရမ္မဏံ ဓမ္မံ ပဋိစ္စ နအနိဒဿနအပ္ပဋိဃော နအဇ္ဈတ္တာရမ္မဏော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ ဆ.

အနိဒဿနအပ္ပဋိဃံ ဗဟိဒ္ဓါရမ္မဏံ ဓမ္မံ ပဋိစ္စ နအနိဒဿနအပ္ပဋိဃော နဗဟိဒ္ဓါရမ္မဏော ဓမ္မော ဥပ္ပဇ္ဇတိ ဟေတုပစ္စယာ. အနိဒဿနအပ္ပဋိဃံ ဗဟိဒ္ဓါရမ္မဏံ ဓမ္မံ ပဋိစ္စ နသနိဒဿနသပ္ပဋိဃော နဗဟိဒ္ဓါရမ္မဏော ဓမ္မော ဥပ္ပဇ္ဇတိ ဟေတုပစ္စယာ. အနိဒဿနအပ္ပဋိဃံ ဗဟိဒ္ဓါရမ္မဏံ ဓမ္မံ ပဋိစ္စ နအနိဒဿနသပ္ပဋိဃော နဗဟိဒ္ဓါရမ္မဏော ဓမ္မော ဥပ္ပဇ္ဇတိ ဟေတုပစ္စယာ။ပေ။ အနိဒဿနအပ္ပဋိဃံ ဗဟိဒ္ဓါရမ္မဏံ ဓမ္မံ ပဋိစ္စ နသနိဒဿနသပ္ပဋိဃော နဗဟိဒ္ဓါရမ္မဏော စ နအနိဒဿနသပ္ပဋိဃော နဗဟိဒ္ဓါရမ္မဏော စ ဓမ္မာ ဥပ္ပဇ္ဇန္တိ ဟေတုပစ္စယာ. ဟေတုယာ ဆ။ပေ။ အဝိဂတေ ဆ. (ပဉှာဝါရံ ဝိတ္ထာရေတဗ္ဗံ.)

ဓမ္မာနုလောမပစ္စနီယေ တိကတိကပဋ္ဌာနံ နိဋ္ဌိတံ.