၃. ဟေတုသမ္ပယုတ္တဒုကံ

၁-၇. ပဋိစ္စဝါရာဒိ

၅. ဟေတုသမ္ပယုတ္တံ ဓမ္မံ ပဋိစ္စ နဟေတုသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ. ဟေတုသမ္ပယုတ္တံ ဓမ္မံ ပဋိစ္စ နဟေတုဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ. ဟေတုသမ္ပယုတ္တံ ဓမ္မံ ပဋိစ္စ နဟေတုသမ္ပယုတ္တော စ နဟေတုဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

ဟေတုဝိပ္ပယုတ္တံ ဓမ္မံ ပဋိစ္စ နဟေတုဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ. ဟေတုဝိပ္ပယုတ္တံ ဓမ္မံ ပဋိစ္စ နဟေတုသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ. ဟေတုဝိပ္ပယုတ္တံ ဓမ္မံ ပဋိစ္စ နဟေတုသမ္ပယုတ္တော စ နဟေတုဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

ဟေတုသမ္ပယုတ္တဉ္စ ဟေတုဝိပ္ပယုတ္တဉ္စ ဓမ္မံ ပဋိစ္စ နဟေတုသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ. ဟေတုသမ္ပယုတ္တဉ္စ ဟေတုဝိပ္ပယုတ္တဉ္စ ဓမ္မံ ပဋိစ္စ နဟေတုဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ. ဟေတုသမ္ပယုတ္တဉ္စ ဟေတုဝိပ္ပယုတ္တဉ္စ ဓမ္မံ ပဋိစ္စ နဟေတုသမ္ပယုတ္တော စ နဟေတုဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃) (သံခိတ္တံ.)

ဟေတုယာ နဝ. (သဟဇာတဝါရမ္ပိ။ပေ။ ပဉှာဝါရမ္ပိ ဝိတ္ထာရေတဗ္ဗံ.)