၁. ပစ္စယာနုလောမံ

ဟေတုပစ္စယော

၁. ဟေတုံ ဓမ္မံ ပဋိစ္စ နဟေတု ဓမ္မော ဥပ္ပဇ္ဇတိ ဟေတုပစ္စယာ – ဟေတုံ ဓမ္မံ ပဋိစ္စ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ၊ ပဋိသန္ဓိက္ခဏေ။ပေ။ ဟေတုံ ဓမ္မံ ပဋိစ္စ နနဟေတု ဓမ္မော ဥပ္ပဇ္ဇတိ ဟေတုပစ္စယာ. ဟေတုံ ဓမ္မံ ပဋိစ္စ နဟေတု စ နနဟေတု စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

နဟေတုံ ဓမ္မံ ပဋိစ္စ နနဟေတု ဓမ္မော ဥပ္ပဇ္ဇတိ ဟေတုပစ္စယာ. နဟေတုံ ဓမ္မံ ပဋိစ္စ နဟေတု ဓမ္မော ဥပ္ပဇ္ဇတိ ဟေတုပစ္စယာ. နဟေတုံ ဓမ္မံ ပဋိစ္စ နဟေတု စ နနဟေတု စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

ဟေတုဉ္စ နဟေတုဉ္စ ဓမ္မံ ပဋိစ္စ နဟေတု ဓမ္မော ဥပ္ပဇ္ဇတိ ဟေတုပစ္စယာ. ဟေတုဉ္စ နဟေတုဉ္စ ဓမ္မံ ပဋိစ္စ နနဟေတု ဓမ္မော ဥပ္ပဇ္ဇတိ ဟေတုပစ္စယာ. ဟေတုဉ္စ နဟေတုဉ္စ ဓမ္မံ ပဋိစ္စ နဟေတု စ နနဟေတု စ ဓမ္မာ ဥပ္ပဇ္ဇန္တိ ဟေတုပစ္စယာ. (၃) (သံခိတ္တံ.)

ဟေတုယာ နဝ၊ အာရမ္မဏေ နဝ။ပေ။ အဝိဂတေ နဝ. (သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ.)

ဟေတု-အာရမ္မဏပစ္စယာ

၂. ဟေတု ဓမ္မော နဟေတုဿ ဓမ္မဿ ဟေတုပစ္စယေန ပစ္စယော။ တီဏိ.

ဟေတု ဓမ္မော နဟေတုဿ ဓမ္မဿ အာရမ္မဏပစ္စယေန ပစ္စယော။ တီဏိ.

နဟေတု ဓမ္မော နနဟေတုဿ ဓမ္မဿ အာရမ္မဏပစ္စယေန ပစ္စယော။ တီဏိ.

ဟေတု စ နဟေတု စ ဓမ္မာ နဟေတုဿ ဓမ္မဿ အာရမ္မဏပစ္စယေန ပစ္စယော။ တီဏိ. (သံခိတ္တံ.)

၃. ဟေတုယာ တီဏိ၊ အာရမ္မဏေ နဝ။ပေ။ အဝိဂတေ နဝ. (ပဉှာဝါရမ္ပိ ဧဝံ ဝိတ္ထာရေတဗ္ဗံ.)