၁-၇. ပဋိစ္စဝါရာဒိ

ပစ္စယစတုက္ကံ

၁၃. အဗျာကတံ ဝိပါကံ ဓမ္မံ ပဋိစ္စ အဗျာကတော ဝိပါကော ဓမ္မော ဥပ္ပဇ္ဇတိ ဟေတုပစ္စယာ. (သံခိတ္တံ.)

ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ. (သံခိတ္တံ.)

(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)

၁၄. ကုသလံ ဝိပါကဓမ္မဓမ္မံ ပဋိစ္စ ကုသလော ဝိပါကဓမ္မဓမ္မော ဥပ္ပဇ္ဇတိ ဟေတုပစ္စယာ. (၁)

အကုသလံ ဝိပါကဓမ္မဓမ္မံ ပဋိစ္စ အကုသလော ဝိပါကဓမ္မဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

ဟေတုယာ ဒွေ၊ အာရမ္မဏေ ဒွေ။ပေ။ အဝိဂတေ ဒွေ. (သံခိတ္တံ.)

(သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ.)

၁၅. ကုသလော ဝိပါကဓမ္မဓမ္မော ကုသလဿ ဝိပါကဓမ္မဓမ္မဿ ဟေတုပစ္စယေန ပစ္စယော. (၁)

အကုသလော ဝိပါကဓမ္မဓမ္မော အကုသလဿ ဝိပါကဓမ္မဓမ္မဿ ဟေတုပစ္စယေန ပစ္စယော. (၁)

ကုသလော ဝိပါကဓမ္မဓမ္မော ကုသလဿ ဝိပါကဓမ္မဓမ္မဿ အာရမ္မဏပစ္စယေန ပစ္စယော. ကုသလော ဝိပါကဓမ္မဓမ္မော အကုသလဿ ဝိပါကဓမ္မဓမ္မဿ အာရမ္မဏပစ္စယေန ပစ္စယော. (၂)

အကုသလော ဝိပါကဓမ္မဓမ္မော အကုသလဿ ဝိပါကဓမ္မဓမ္မဿ အာရမ္မဏပစ္စယေန ပစ္စယော. အကုသလော ဝိပါကဓမ္မဓမ္မော ကုသလဿ ဝိပါကဓမ္မဓမ္မဿ အာရမ္မဏပစ္စယေန ပစ္စယော. (၂) (သံခိတ္တံ.)

၁၆. ဟေတုယာ ဒွေ၊ အာရမ္မဏေ စတ္တာရိ၊ အဓိပတိယာ တီဏိ၊ အနန္တရေ ဒွေ။ပေ။ သဟဇာတေ ဒွေ၊ ဥပနိဿယေ စတ္တာရိ။ပေ။ အဝိဂတေ ဒွေ. (သံခိတ္တံ. ယထာ ကုသလတ္တိကေ ပဉှာဝါရံ ဧဝံ ဝိတ္ထာရေတဗ္ဗံ.)

၁၇. အဗျာကတံ နေဝဝိပါကနဝိပါကဓမ္မဓမ္မံ ပဋိစ္စ အဗျာကတော နေဝဝိပါကနဝိပါကဓမ္မဓမ္မော ဥပ္ပဇ္ဇတိ ဟေတုပစ္စယာ. (သံခိတ္တံ.)

ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ. (သံခိတ္တံ.)

(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)