၁-၇. ပဋိစ္စဝါရာဒိ

ဟေတုပစ္စယော

၁၂၄. အတီတာရမ္မဏံ ကုသလံ ဓမ္မံ ပဋိစ္စ အတီတာရမ္မဏော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

အနာဂတာရမ္မဏံ ကုသလံ ဓမ္မံ ပဋိစ္စ အနာဂတာရမ္မဏော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

ပစ္စုပ္ပန္နာရမ္မဏံ ကုသလံ ဓမ္မံ ပဋိစ္စ ပစ္စုပ္ပန္နာရမ္မဏော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁) (သဗ္ဗတ္ထ တီဏိ. သဗ္ဗတ္ထ ဝိတ္ထာရော.)

၁၂၅. အတီတာရမ္မဏံ အကုသလံ ဓမ္မံ ပဋိစ္စ အတီတာရမ္မဏော အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

အနာဂတာရမ္မဏံ အကုသလံ ဓမ္မံ ပဋိစ္စ အနာဂတာရမ္မဏော အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

ပစ္စုပ္ပန္နာရမ္မဏံ အကုသလံ ဓမ္မံ ပဋိစ္စ ပစ္စုပ္ပန္နာရမ္မဏော အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁) (သဗ္ဗတ္ထ တီဏိ၊ သဗ္ဗတ္ထ ဝိတ္ထာရော.)

၁၂၆. အတီတာရမ္မဏံ အဗျာကတံ ဓမ္မံ ပဋိစ္စ အတီတာရမ္မဏော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁)

အနာဂတာရမ္မဏံ အဗျာကတံ ဓမ္မံ ပဋိစ္စ အနာဂတာရမ္မဏော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁)

ပစ္စုပ္ပန္နာရမ္မဏံ အဗျာကတံ ဓမ္မံ ပဋိစ္စ ပစ္စုပ္ပန္နာရမ္မဏော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁) (သဗ္ဗတ္ထ တီဏိ၊ သဗ္ဗတ္ထ ဝိတ္ထာရော.)