၁-၇. ပဋိစ္စဝါရာဒိ

ဟေတုပစ္စယော

၁၁၅. မဇ္ဈိမံ ကုသလံ ဓမ္မံ ပဋိစ္စ မဇ္ဈိမော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

ပဏီတံ ကုသလံ ဓမ္မံ ပဋိစ္စ ပဏီတော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁) (သဗ္ဗတ္ထ ဒွေ၊ သဗ္ဗတ္ထ ဝိတ္ထာရော.)

၁၁၆. ဟီနံ အကုသလံ ဓမ္မံ ပဋိစ္စ ဟီနော အကုသလော ဓမ္မော ဥပ္ပဇ္ဇတိ ဟေတုပစ္စယာ. (သဗ္ဗတ္ထ ဧကံ.)

၁၁၇. မဇ္ဈိမံ အဗျာကတံ ဓမ္မံ ပဋိစ္စ မဇ္ဈိမော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁)

ပဏီတံ အဗျာကတံ ဓမ္မံ ပဋိစ္စ ပဏီတော အဗျာကတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

မဇ္ဈိမံ အဗျာကတဉ္စ ပဏီတံ အဗျာကတဉ္စ ဓမ္မံ ပဋိစ္စ မဇ္ဈိမော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

ဟေတုယာ ပဉ္စ. (သဗ္ဗတ္ထ ဝိတ္ထာရော.)