၁-၇. ပဋိစ္စဝါရာဒိ

ဟေတုပစ္စယော

၉၉. ပီတိသဟဂတံ ကုသလံ ဓမ္မံ ပဋိစ္စ ပီတိသဟဂတော ကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

သုခသဟဂတံ ကုသလံ ဓမ္မံ ပဋိစ္စ သုခသဟဂတော ကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

ဥပေက္ခာသဟဂတံ ကုသလံ ဓမ္မံ ပဋိစ္စ ဥပေက္ခာသဟဂတော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

ပီတိသဟဂတံ ကုသလဉ္စ သုခသဟဂတံ ကုသလဉ္စ ဓမ္မံ ပဋိစ္စ ပီတိသဟဂတော ကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ. (သဗ္ဗတ္ထ ဒသ. သဗ္ဗတ္ထ ဝိတ္ထာရော.)

၁၀၀. ပီတိသဟဂတံ အကုသလံ ဓမ္မံ ပဋိစ္စ ပီတိသဟဂတော အကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

သုခသဟဂတံ အကုသလံ ဓမ္မံ ပဋိစ္စ သုခသဟဂတော အကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

ဥပေက္ခာသဟဂတံ အကုသလံ ဓမ္မံ ပဋိစ္စ ဥပေက္ခာသဟဂတော အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

ပီတိသဟဂတံ အကုသလဉ္စ သုခသဟဂတံ အကုသလဉ္စ ဓမ္မံ ပဋိစ္စ ပီတိသဟဂတော အကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ. (သဗ္ဗတ္ထ ဒသ. သဗ္ဗတ္ထ ဝိတ္ထာရော.)

၁၀၁. ပီတိသဟဂတံ အဗျာကတံ ဓမ္မံ ပဋိစ္စ ပီတိသဟဂတော အဗျာကတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

သုခသဟဂတံ အဗျာကတံ ဓမ္မံ ပဋိစ္စ သုခသဟဂတော အဗျာကတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

ဥပေက္ခာသဟဂတံ အဗျာကတံ ဓမ္မံ ပဋိစ္စ ဥပေက္ခာသဟဂတော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁)

ပီတိသဟဂတံ အဗျာကတဉ္စ သုခသဟဂတံ အဗျာကတဉ္စ ဓမ္မံ ပဋိစ္စ ပီတိသဟဂတော အဗျာကတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ. (သဗ္ဗတ္ထ ဒသ. သဗ္ဗတ္ထ ဝိတ္ထာရော.)