၁-၇. ပဋိစ္စဝါရာဒိ

ဟေတုပစ္စယော

၉၃. အနုပါဒိန္နုပါဒါနိယံ ကုသလံ ဓမ္မံ ပဋိစ္စ အနုပါဒိန္နုပါဒါနိယော ကုသလော ဓမ္မော ဥပ္ပဇ္ဇတိ ဟေတုပစ္စယာ.

အနုပါဒိန္နအနုပါဒါနိယံ ကုသလံ ဓမ္မံ ပဋိစ္စ အနုပါဒိန္နအနုပါဒါနိယော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

ဟေတုယာ ဒွေ. (သဗ္ဗတ္ထ ဝိတ္ထာရော.)

အနုပါဒိန္နုပါဒါနိယံ အကုသလံ ဓမ္မံ ပဋိစ္စ အနုပါဒိန္နုပါဒါနိယော အကုသလော ဓမ္မော ဥပ္ပဇ္ဇတိ ဟေတုပစ္စယာ. (သဗ္ဗတ္ထ ဧကံ. သဗ္ဗတ္ထ ဝိတ္ထာရော.)

၉၄. ဥပါဒိန္နုပါဒါနိယံ အဗျာကတံ ဓမ္မံ ပဋိစ္စ ဥပါဒိန္နုပါဒါနိယော အဗျာကတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ. (သဗ္ဗတ္ထ ဝိတ္ထာရော.)

အနုပါဒိန္နုပါဒါနိယံ အဗျာကတံ ဓမ္မံ ပဋိစ္စ အနုပါဒိန္နုပါဒါနိယော အဗျာကတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အနုပါဒိန္နအနုပါဒါနိယံ အဗျာကတံ ဓမ္မံ ပဋိစ္စ အနုပါဒိန္နအနုပါဒါနိယော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁)

အနုပါဒိန္နုပါဒါနိယံ အဗျာကတဉ္စ အနုပါဒိန္နအနုပါဒါနိယံ အဗျာကတဉ္စ ဓမ္မံ ပဋိစ္စ အနုပါဒိန္နုပါဒါနိယော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁)

ဥပါဒိန္နုပါဒါနိယံ အဗျာကတဉ္စ အနုပါဒိန္နုပါဒါနိယံ အဗျာကတဉ္စ ဓမ္မံ ပဋိစ္စ အနုပါဒိန္နုပါဒါနိယော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

ဟေတုယာ နဝ. (သဗ္ဗတ္ထ ဝိတ္ထာရော.)