၁-၇. ပဋိစ္စဝါရာဒိ

၈၆. သုခါယ ဝေဒနာယ သမ္ပယုတ္တံ ကုသလံ ဓမ္မံ ပဋိစ္စ သုခါယ ဝေဒနာယ သမ္ပယုတ္တော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

အဒုက္ခမသုခါယ ဝေဒနာယ သမ္ပယုတ္တံ ကုသလံ ဓမ္မံ ပဋိစ္စ အဒုက္ခမသုခါယ ဝေဒနာယ သမ္ပယုတ္တော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

ဟေတုယာ ဒွေ။ပေ။ အဝိဂတေ ဒွေ. (သံခိတ္တံ.) (သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ.)

၈၇. သုခါယ ဝေဒနာယ သမ္ပယုတ္တော ကုသလော ဓမ္မော သုခါယ ဝေဒနာယ သမ္ပယုတ္တဿ ကုသလဿ ဓမ္မဿ ဟေတုပစ္စယေန ပစ္စယော. (၁)

အဒုက္ခမသုခါယ ဝေဒနာယ သမ္ပယုတ္တော ကုသလော ဓမ္မော အဒုက္ခမသုခါယ ဝေဒနာယ သမ္ပယုတ္တဿ ကုသလဿ ဓမ္မဿ ဟေတုပစ္စယေန ပစ္စယော. (၁) (သံခိတ္တံ.)

ဟေတုယာ ဒွေ၊ အဝိဂတေ ဒွေ. (သံခိတ္တံ. သဗ္ဗတ္ထ ဝိတ္ထာရော.)

၈၈. သုခါယ ဝေဒနာယ သမ္ပယုတ္တံ အကုသလံ ဓမ္မံ ပဋိစ္စ သုခါယ ဝေဒနာယ သမ္ပယုတ္တော အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

ဒုက္ခာယ ဝေဒနာယ သမ္ပယုတ္တံ အကုသလံ ဓမ္မံ ပဋိစ္စ ဒုက္ခာယ ဝေဒနာယ သမ္ပယုတ္တော အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

အဒုက္ခမသုခါယ ဝေဒနာယ သမ္ပယုတ္တံ အကုသလံ ဓမ္မံ ပဋိစ္စ အဒုက္ခမသုခါယ ဝေဒနာယ သမ္ပယုတ္တော အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

ဟေတုယာ တီဏိ။ပေ။ အဝိဂတေ တီဏိ. (သံခိတ္တံ. သဗ္ဗတ္ထ ဝိတ္ထာရော.)

၈၉. သုခါယ ဝေဒနာယ သမ္ပယုတ္တံ အဗျာကတံ ဓမ္မံ ပဋိစ္စ သုခါယ ဝေဒနာယ သမ္ပယုတ္တော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁)

အဒုက္ခမသုခါယ ဝေဒနာယ သမ္ပယုတ္တံ အဗျာကတံ ဓမ္မံ ပဋိစ္စ အဒုက္ခမသုခါယ ဝေဒနာယ သမ္ပယုတ္တော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

ဟေတုယာ ဒွေ၊ အဝိဂတေ တီဏိ. (သံခိတ္တံ.)