၁-၇. ပဋိစ္စဝါရာဒိ

၇၈. ကုသလံ အဇ္ဈတ္တံ ဓမ္မံ ပဋိစ္စ ကုသလော အဇ္ဈတ္တော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အကုသလံ အဇ္ဈတ္တံ ဓမ္မံ ပဋိစ္စ အကုသလော အဇ္ဈတ္တော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အဗျာကတံ အဇ္ဈတ္တံ ဓမ္မံ ပဋိစ္စ အဗျာကတော အဇ္ဈတ္တော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

ဟေတုယာ နဝ၊ အဝိဂတေ နဝ. (သံခိတ္တံ.)

(သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ၊ ဧဝံ ဝိတ္ထာရေတဗ္ဗံ.)

၇၉. ကုသလော အဇ္ဈတ္တော ဓမ္မော ကုသလဿ အဇ္ဈတ္တဿ ဓမ္မဿ ဟေတုပစ္စယေန ပစ္စယော။ တီဏိ.

အကုသလော အဇ္ဈတ္တော ဓမ္မော အကုသလဿ အဇ္ဈတ္တဿ ဓမ္မဿ ဟေတုပစ္စယေန ပစ္စယော။ တီဏိ.

အဗျာကတော အဇ္ဈတ္တော ဓမ္မော အဗျာကတဿ အဇ္ဈတ္တဿ ဓမ္မဿ ဟေတုပစ္စယေန ပစ္စယော. (၁) (သံခိတ္တံ).

ဟေတုယာ သတ္တ၊ အာရမ္မဏေ နဝ၊ အဝိဂတေ တေရသ. (သံခိတ္တံ. ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ.)

၈၀. ကုသလံ ဗဟိဒ္ဓါ ဓမ္မံ ပဋိစ္စ ကုသလော ဗဟိဒ္ဓါ ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အကုသလံ ဗဟိဒ္ဓါ ဓမ္မံ ပဋိစ္စ အကုသလော ဗဟိဒ္ဓါ ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အဗျာကတံ ဗဟိဒ္ဓါ ဓမ္မံ ပဋိစ္စ အဗျာကတော ဗဟိဒ္ဓါ ဓမ္မော ဥပ္ပဇ္ဇတိ ဟေတုပစ္စယာ. (၁)

ကုသလံ ဗဟိဒ္ဓါ စ အဗျာကတံ ဗဟိဒ္ဓါ စ ဓမ္မံ ပဋိစ္စ အဗျာကတော ဗဟိဒ္ဓါ ဓမ္မော ဥပ္ပဇ္ဇတိ ဟေတုပစ္စယာ. (၁)

အကုသလံ ဗဟိဒ္ဓါ စ အဗျာကတံ ဗဟိဒ္ဓါ စ ဓမ္မံ ပဋိစ္စ အဗျာကတော ဗဟိဒ္ဓါ ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

ဟေတုယာ နဝ။ပေ။ ဝိပါကေ ဧကံ။ပေ။ အဝိဂတေ နဝ. (သံခိတ္တံ.)

(သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ.)

၈၁. ကုသလော ဗဟိဒ္ဓါ ဓမ္မော ကုသလဿ ဗဟိဒ္ဓါ ဓမ္မဿ ဟေတုပစ္စယေန ပစ္စယော။ တီဏိ.

အကုသလော ဗဟိဒ္ဓါ ဓမ္မော အကုသလဿ ဗဟိဒ္ဓါ ဓမ္မဿ ဟေတုပစ္စယေန ပစ္စယော။ တီဏိ.

အဗျာကတော ဗဟိဒ္ဓါ ဓမ္မော အဗျာကတဿ ဗဟိဒ္ဓါ ဓမ္မဿ ဟေတုပစ္စယေန ပစ္စယော. (၁) (သံခိတ္တံ.)

ဟေတုယာ သတ္တ၊ အာရမ္မဏေ နဝ၊ အဓိပတိယာ ဒသ။ပေ။ အဝိဂတေ တေရသ. (သံခိတ္တံ. ယထာ ကုသလတ္တိကေ ပဉှာဝါရံ ဧဝံ ဝိတ္ထာရေတဗ္ဗံ.)