၁-၇. ပဋိစ္စဝါရာဒိ

၇၂. ကုသလံ အတီတာရမ္မဏံ ဓမ္မံ ပဋိစ္စ ကုသလော အတီတာရမ္မဏော ဓမ္မော ဥပ္ပဇ္ဇတိ ဟေတုပစ္စယာ. (၁)

အကုသလံ အတီတာရမ္မဏံ ဓမ္မံ ပဋိစ္စ အကုသလော အတီတာရမ္မဏော ဓမ္မော ဥပ္ပဇ္ဇတိ ဟေတုပစ္စယာ. (၁)

အဗျာကတံ အတီတာရမ္မဏံ ဓမ္မံ ပဋိစ္စ အဗျာကတော အတီတာရမ္မဏော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

ဟေတုယာ တီဏိ၊ အဝိဂတေ တီဏိ. (သံခိတ္တံ.)

(သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ.)

၇၃. ကုသလော အတီတာရမ္မဏော ဓမ္မော ကုသလဿ အတီတာရမ္မဏဿ ဓမ္မဿ ဟေတုပစ္စယေန ပစ္စယော. (၁)

အကုသလော အတီတာရမ္မဏော ဓမ္မော အကုသလဿ အတီတာရမ္မဏဿ ဓမ္မဿ ဟေတုပစ္စယေန ပစ္စယော. (၁)

အဗျာကတော အတီတာရမ္မဏော ဓမ္မော အဗျာကတဿ အတီတာရမ္မဏဿ ဓမ္မဿ ဟေတုပစ္စယေန ပစ္စယော. (၁) (သံခိတ္တံ.)

ဟေတုယာ တီဏိ၊ အာရမ္မဏေ နဝ၊ အဝိဂတေ တီဏိ. (သံခိတ္တံ. ယထာ ကုသလတ္တိကေ ပဉှာဝါရံ ဧဝံ ဝိတ္ထာရေတဗ္ဗံ.)

၇၄. ကုသလံ အနာဂတာရမ္မဏံ ဓမ္မံ ပဋိစ္စ ကုသလော အနာဂတာရမ္မဏော ဓမ္မော ဥပ္ပဇ္ဇတိ ဟေတုပစ္စယာ. (သံခိတ္တံ.)

ဟေတုယာ တီဏိ၊ အာရမ္မဏေ တီဏိ၊ အဝိဂတေ တီဏိ. (သံခိတ္တံ. သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ.)

၇၅. ကုသလော အနာဂတာရမ္မဏော ဓမ္မော ကုသလဿ အနာဂတာရမ္မဏဿ ဓမ္မဿ ဟေတုပစ္စယေန ပစ္စယော. (သံခိတ္တံ.)

ဟေတုယာ တီဏိ၊ အာရမ္မဏေ နဝ၊ အဝိဂတေ တီဏိ. (သံခိတ္တံ. ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ.)

၇၆. ကုသလံ ပစ္စုပ္ပန္နာရမ္မဏံ ဓမ္မံ ပဋိစ္စ ကုသလော ပစ္စုပ္ပန္နာရမ္မဏော ဓမ္မော ဥပ္ပဇ္ဇတိ ဟေတုပစ္စယာ. (သံခိတ္တံ.)

၇၇. ကုသလော ပစ္စုပ္ပန္နာရမ္မဏော ဓမ္မော ကုသလဿ ပစ္စုပ္ပန္နာရမ္မဏဿ ဓမ္မဿ ဟေတုပစ္စယေန ပစ္စယော. (၁)

အကုသလော ပစ္စုပ္ပန္နာရမ္မဏော ဓမ္မော အကုသလဿ ပစ္စုပ္ပန္နာရမ္မဏဿ ဓမ္မဿ ဟေတုပစ္စယေန ပစ္စယော. (၁)

အဗျာကတော ပစ္စုပ္ပန္နာရမ္မဏော ဓမ္မော အဗျာကတဿ ပစ္စုပ္ပန္နာရမ္မဏဿ ဓမ္မဿ ဟေတုပစ္စယေန ပစ္စယော. (၁) (သံခိတ္တံ.)

ဟေတုယာ တီဏိ၊ အာရမ္မဏေ ဆ၊ အဝိဂတေ တီဏိ. (သံခိတ္တံ. ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ.)