၁-၇. ပဋိစ္စဝါရာဒိ

ပစ္စယစတုက္ကံ

၆၃. အကုသလံ မိစ္ဆတ္တနိယတံ ဓမ္မံ ပဋိစ္စ အကုသလော မိစ္ဆတ္တနိယတော ဓမ္မော ဥပ္ပဇ္ဇတိ ဟေတုပစ္စယာ. (သံခိတ္တံ.)

ဟေတုယာ ဧကံ။ပေ။ အဝိဂတေ ဧကံ. (သံခိတ္တံ. သဗ္ဗတ္ထ ဝိတ္ထာရော.)

၆၄. ကုသလံ သမ္မတ္တနိယတံ ဓမ္မံ ပဋိစ္စ ကုသလော သမ္မတ္တနိယတော ဓမ္မော ဥပ္ပဇ္ဇတိ ဟေတုပစ္စယာ. (သံခိတ္တံ.)

ဟေတုယာ ဧကံ။ပေ။ အဝိဂတေ ဧကံ. (သံခိတ္တံ. သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)

၆၅. ကုသလံ အနိယတံ ဓမ္မံ ပဋိစ္စ ကုသလော အနိယတော ဓမ္မော ဥပ္ပဇ္ဇတိ ဟေတုပစ္စယာ. ကုသလံ အနိယတံ ဓမ္မံ ပဋိစ္စ အဗျာကတော အနိယတော ဓမ္မော ဥပ္ပဇ္ဇတိ ဟေတုပစ္စယာ. ကုသလံ အနိယတံ ဓမ္မံ ပဋိစ္စ ကုသလော အနိယတော စ အဗျာကတော အနိယတော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

အကုသလံ အနိယတံ ဓမ္မံ ပဋိစ္စ အကုသလော အနိယတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အဗျာကတံ အနိယတံ ဓမ္မံ ပဋိစ္စ အဗျာကတော အနိယတော ဓမ္မော ဥပ္ပဇ္ဇတိ ဟေတုပစ္စယာ. (၁)

ကုသလံ အနိယတဉ္စ အဗျာကတံ အနိယတဉ္စ ဓမ္မံ ပဋိစ္စ အဗျာကတော အနိယတော ဓမ္မော ဥပ္ပဇ္ဇတိ ဟေတုပစ္စယာ. (၁)

အကုသလံ အနိယတဉ္စ အဗျာကတံ အနိယတဉ္စ ဓမ္မံ ပဋိစ္စ အဗျာကတော အနိယတော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

ဟေတုယာ နဝ၊ အာရမ္မဏေ တီဏိ၊ အဝိဂတေ နဝ. (သံခိတ္တံ. သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ.)

၆၆. ကုသလော အနိယတော ဓမ္မော ကုသလဿ အနိယတဿ ဓမ္မဿ ဟေတုပစ္စယေန ပစ္စယော။ တီဏိ.

အကုသလော အနိယတော ဓမ္မော အကုသလဿ အနိယတဿ ဓမ္မဿ ဟေတုပစ္စယေန ပစ္စယော။ တီဏိ.

အဗျာကတော အနိယတော ဓမ္မော အဗျာကတဿ အနိယတဿ ဓမ္မဿ ဟေတုပစ္စယေန ပစ္စယော. (၁) (သံခိတ္တံ.)

ဟေတုယာ သတ္တ၊ အာရမ္မဏေ နဝ၊ အဝိဂတေ တေရသ. (သံခိတ္တံ. ယထာ ကုသလတ္တိကေ ပဉှာဝါရံ ဧဝံ ဝိတ္ထာရေတဗ္ဗံ.)