၁-၇. ပဋိစ္စဝါရာဒိ

၂၉. ကုသလံ သဝိတက္ကသဝိစာရံ ဓမ္မံ ပဋိစ္စ ကုသလော သဝိတက္ကသဝိစာရော ဓမ္မော ဥပ္ပဇ္ဇတိ ဟေတုပစ္စယာ. (၁)

အကုသလံ သဝိတက္ကသဝိစာရံ ဓမ္မံ ပဋိစ္စ အကုသလော သဝိတက္ကသဝိစာရော ဓမ္မော ဥပ္ပဇ္ဇတိ ဟေတုပစ္စယာ. (၁)

အဗျာကတံ သဝိတက္ကသဝိစာရံ ဓမ္မံ ပဋိစ္စ အဗျာကတော သဝိတက္ကသဝိစာရော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

ဟေတုယာ တီဏိ၊ အာရမ္မဏေ တီဏိ၊ အဝိဂတေ တီဏိ. (သံခိတ္တံ. သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ.)

၃၀. ကုသလော သဝိတက္ကသဝိစာရော ဓမ္မော ကုသလဿ သဝိတက္ကသဝိစာရဿ ဓမ္မဿ ဟေတုပစ္စယေန ပစ္စယော. (၁)

အကုသလော သဝိတက္ကသဝိစာရော ဓမ္မော အကုသလဿ သဝိတက္ကသဝိစာရဿ ဓမ္မဿ ဟေတုပစ္စယေန ပစ္စယော. (၁)

အဗျာကတော သဝိတက္ကသဝိစာရော ဓမ္မော အဗျာကတဿ သဝိတက္ကသဝိစာရဿ ဓမ္မဿ ဟေတုပစ္စယေန ပစ္စယော. (၁) (သံခိတ္တံ.)

၃၁. ဟေတုယာ တီဏိ၊ အာရမ္မဏေ နဝ၊ အဝိဂတေ တီဏိ. (သံခိတ္တံ.) (ယထာ ကုသလတ္တိကေ ပဉှာဝါရံ ဧဝံ ဝိတ္ထာရေတဗ္ဗံ).

၃၂. ကုသလံ အဝိတက္ကဝိစာရမတ္တံ ဓမ္မံ ပဋိစ္စ ကုသလော အဝိတက္ကဝိစာရမတ္တော ဓမ္မော ဥပ္ပဇ္ဇတိ ဟေတုပစ္စယာ. (၁)

အဗျာကတံ အဝိတက္ကဝိစာရမတ္တံ ဓမ္မံ ပဋိစ္စ အဗျာကတော အဝိတက္ကဝိစာရမတ္တော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

ဟေတုယာ ဒွေ၊ အဝိဂတေ ဒွေ. (သံခိတ္တံ.)

(သဟဇာတဝါရေပိ။ပေ။ သမ္ပယုတ္တဝါရေပိ ပဉှာဝါရေပိ သဗ္ဗတ္ထ ဝိတ္ထာရော.)

၃၃. ကုသလံ အဝိတက္ကအဝိစာရံ ဓမ္မံ ပဋိစ္စ ကုသလော အဝိတက္ကအဝိစာရော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အဗျာကတံ အဝိတက္ကအဝိစာရံ ဓမ္မံ ပဋိစ္စ အဗျာကတော အဝိတက္ကအဝိစာရော ဓမ္မော ဥပ္ပဇ္ဇတိ ဟေတုပစ္စယာ. (၁)

ကုသလံ အဝိတက္ကအဝိစာရဉ္စ အဗျာကတံ အဝိတက္ကအဝိစာရဉ္စ ဓမ္မံ ပဋိစ္စ အဗျာကတော အဝိတက္ကအဝိစာရော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

ဟေတုယာ ပဉ္စ၊ အာရမ္မဏေ ဒွေ၊ အဝိဂတေ ပဉ္စ. (သံခိတ္တံ. သဟဇာတဝါရမ္ပိ။ပေ။ ပဉှာဝါရမ္ပိ ဝိတ္ထာရေတဗ္ဗံ.)