၁-၇. ပဋိစ္စဝါရာဒိ

ပစ္စယစတုက္ကံ

၂၅. အကုသလံ သံကိလိဋ္ဌသံကိလေသိကံ ဓမ္မံ ပဋိစ္စ အကုသလော သံကိလိဋ္ဌသံကိလေသိကော ဓမ္မော ဥပ္ပဇ္ဇတိ ဟေတုပစ္စယာ. (သံခိတ္တံ.)

ဟေတုယာ ဧကံ။ပေ။ အဝိဂတေ ဧကံ. (သံခိတ္တံ.)

(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)

၂၆. ကုသလံ အသံကိလိဋ္ဌသံကိလေသိကံ ဓမ္မံ ပဋိစ္စ ကုသလော အသံကိလိဋ္ဌသံကိလေသိကော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အဗျာကတံ အသံကိလိဋ္ဌသံကိလေသိကံ ဓမ္မံ ပဋိစ္စ အဗျာကတော အသံကိလိဋ္ဌသံကိလေသိကော ဓမ္မော ဥပ္ပဇ္ဇတိ ဟေတုပစ္စယာ. (၁)

ကုသလံ အသံကိလိဋ္ဌသံကိလေသိကဉ္စ အဗျာကတံ အသံကိလိဋ္ဌသံကိလေသိကဉ္စ ဓမ္မံ ပဋိစ္စ အဗျာကတော အသံကိလိဋ္ဌသံကိလေသိကော ဓမ္မော ဥပ္ပဇ္ဇတိ ဟေတုပစ္စယာ. (၁)

၂၇. ဟေတုယာ ပဉ္စ၊ အဝိဂတေ ပဉ္စ. (သံခိတ္တံ. သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဝိတ္ထာရော.)

၂၈. ကုသလံ အသံကိလိဋ္ဌအသံကိလေသိကံ ဓမ္မံ ပဋိစ္စ ကုသလော အသံကိလိဋ္ဌအသံကိလေသိကော ဓမ္မော ဥပ္ပဇ္ဇတိ ဟေတုပစ္စယာ. (၁)

အဗျာကတံ အသံကိလိဋ္ဌအသံကိလေသိကံ ဓမ္မံ ပဋိစ္စ အဗျာကတော အသံကိလိဋ္ဌအသံကိလေသိကော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

ဟေတုယာ ဒွေ။ပေ။ အဝိဂတေ ဒွေ. (သံခိတ္တံ. သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဝိတ္ထာရေတဗ္ဗံ.)