၁. ဝိဘင်္ဂဝါရော

ဟေတုပစ္စယော

၈၇. ပရာမဋ္ဌော စေဝ နော စ ပရာမာသော ဓမ္မော ပရာမဋ္ဌဿ စေဝ နော စ ပရာမာသဿ ဓမ္မဿ ဟေတုပစ္စယေန ပစ္စယော – ပရာမဋ္ဌာ စေဝ နော စ ပရာမာသာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၁)

ပရာမဋ္ဌော စေဝ နော စ ပရာမာသော ဓမ္မော ပရာမာသဿ စေဝ ပရာမဋ္ဌဿ စ ဓမ္မဿ ဟေတုပစ္စယေန ပစ္စယော – ပရာမဋ္ဌာ စေဝ နော စ ပရာမာသာ ဟေတူ ပရာမာသဿ ဟေတုပစ္စယေန ပစ္စယော. (၂)

ပရာမဋ္ဌော စေဝ နော စ ပရာမာသော ဓမ္မော ပရာမာသဿ စေဝ ပရာမဋ္ဌဿ စ ပရာမဋ္ဌဿ စေဝ နော စ ပရာမာသဿ စ ဓမ္မဿ ဟေတုပစ္စယေန ပစ္စယော – ပရာမဋ္ဌာ စေဝ နော စ ပရာမာသာ ဟေတူ သမ္ပယုတ္တကာနံ ခန္ဓာနံ ပရာမာသဿ စ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၃)

အာရမ္မဏပစ္စယော

၈၈. ပရာမာသော စေဝ ပရာမဋ္ဌော စ ဓမ္မော ပရာမာသဿ စေဝ ပရာမဋ္ဌဿ စ ဓမ္မဿ အာရမ္မဏပစ္စယေန ပစ္စယော။ တီဏိ (အာရဗ္ဘ ကာတဗ္ဗာနိ ပရာမာသဒုကသဒိသံ).

၈၉. ပရာမဋ္ဌော စေဝ နော စ ပရာမာသော ဓမ္မော ပရာမဋ္ဌဿ စေဝ နော စ ပရာမာသဿ ဓမ္မဿ အာရမ္မဏပစ္စယေန ပစ္စယော – ဒါနံ။ပေ။ သီလံ။ပေ။ ဥပေါသထကမ္မံ ကတွာ တံ ပစ္စဝေက္ခတိ၊ အဿာဒေတိ အဘိနန္ဒတိ၊ တံ အာရဗ္ဘ ရာဂေါ။ပေ။ ဝိစိကိစ္ဆာ၊ ဥဒ္ဓစ္စံ၊ ဒေါမနဿံ ဥပ္ပဇ္ဇတိ၊ ပုဗ္ဗေ။ပေ။ ဈာနာ။ပေ။ အရိယာ ဂေါတြဘုံ ပစ္စဝေက္ခန္တိ၊ ဝေါဒါနံ ပစ္စဝေက္ခန္တိ၊ ပဟီနေ ကိလေသေ။ပေ။ ဝိက္ခမ္ဘိတေ ကိလေသေ။ပေ။ ပုဗ္ဗေ။ပေ။ စက္ခုံ။ပေ။ ဝတ္ထုံ ပရာမဋ္ဌေ စေဝ နော စ ပရာမာသေ ခန္ဓေ အနိစ္စတော။ပေ။ ဒေါမနဿံ ဥပ္ပဇ္ဇတိ. ဒိဗ္ဗေန စက္ခုနာ ရူပံ ပဿတိ (ယာဝ အာဝဇ္ဇနာ သဗ္ဗံ ကာတဗ္ဗံ). (၁)

ပရာမဋ္ဌော စေဝ နော စ ပရာမာသော ဓမ္မော ပရာမာသဿ စေဝ ပရာမဋ္ဌဿ စ ဓမ္မဿ အာရမ္မဏပစ္စယေန ပစ္စယော – ဒါနံ။ပေ။ သီလံ။ပေ။ ဥပေါသထကမ္မံ။ပေ။ ပုဗ္ဗေ။ပေ။ ဈာနာ။ပေ။ စက္ခုံ။ပေ။ ဝတ္ထုံ ပရာမဋ္ဌေ စေဝ နော စ ပရာမာသေ ခန္ဓေ အဿာဒေတိ အဘိနန္ဒတိ၊ တံ အာရဗ္ဘ ဒိဋ္ဌိ ဥပ္ပဇ္ဇတိ. (၂)

ပရာမဋ္ဌော စေဝ နော စ ပရာမာသော ဓမ္မော ပရာမာသဿ စေဝ ပရာမဋ္ဌဿ စ ပရာမဋ္ဌဿ စေဝ နော စ ပရာမာသဿ စ ဓမ္မဿ အာရမ္မဏပစ္စယေန ပစ္စယော – ဒါနံ။ပေ။ သီလံ။ပေ။ ဥပေါသထကမ္မံ။ပေ။ ပုဗ္ဗေ။ပေ။ ဈာနာ။ပေ။ စက္ခုံ။ပေ။ ဝတ္ထုံ ပရာမဋ္ဌေ စေဝ နော စ ပရာမာသေ ခန္ဓေ အဿာဒေတိ အဘိနန္ဒတိ၊ တံ အာရဗ္ဘ ပရာမာသော စ သမ္ပယုတ္တကာ စ ခန္ဓာ ဥပ္ပဇ္ဇန္တိ. (၃)

(ဧဝံ ဣတရေပိ တီဏိ အာရဗ္ဘ ကာတဗ္ဗာနိ. ဣမံ ဒုကံ ပရာမာသဒုကသဒိသံ. လောကုတ္တရံ ယဟိံ န လဗ္ဘတိ တဟိံ န ကာတဗ္ဗံ.)

ပရာမာသပရာမဋ္ဌဒုကံ နိဋ္ဌိတံ.