၁. ဝိဘင်္ဂဝါရော

ဟေတုပစ္စယော

၆၃. ပရာမာသသမ္ပယုတ္တော ဓမ္မော ပရာမာသသမ္ပယုတ္တဿ ဓမ္မဿ ဟေတုပစ္စယေန ပစ္စယော – ပရာမာသသမ္ပယုတ္တာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. (မူလံ ကာတဗ္ဗံ) ပရာမာသသမ္ပယုတ္တာ ဟေတူ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော. (မူလံ ကာတဗ္ဗံ) ပရာမာသသမ္ပယုတ္တာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၃)

ပရာမာသဝိပ္ပယုတ္တော ဓမ္မော ပရာမာသဝိပ္ပယုတ္တဿ ဓမ္မဿ ဟေတုပစ္စယေန ပစ္စယော – ပရာမာသဝိပ္ပယုတ္တာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၁)

အာရမ္မဏပစ္စယော

၆၄. ပရာမာသသမ္ပယုတ္တော ဓမ္မော ပရာမာသသမ္ပယုတ္တဿ ဓမ္မဿ အာရမ္မဏပစ္စယေန ပစ္စယော – ရာဂံ အဿာဒေတိ အဘိနန္ဒတိ၊ တံ အာရဗ္ဘ ပရာမာသသမ္ပယုတ္တော ရာဂေါ ဥပ္ပဇ္ဇတိ၊ ပရာမာသသမ္ပယုတ္တေ ခန္ဓေ အဿာဒေတိ အဘိနန္ဒတိ၊ တံ အာရဗ္ဘ ပရာမာသသမ္ပယုတ္တော ရာဂေါ ဥပ္ပဇ္ဇတိ. (၁)

ပရာမာသသမ္ပယုတ္တော ဓမ္မော ပရာမာသဝိပ္ပယုတ္တဿ ဓမ္မဿ အာရမ္မဏပစ္စယေန ပစ္စယော – အရိယာ ပရာမာသသမ္ပယုတ္တေ ပဟီနေ ကိလေသေ ပစ္စဝေက္ခန္တိ၊ ပုဗ္ဗေ သမုဒါစိဏ္ဏေ ကိလေသေ ဇာနန္တိ၊ ပရာမာသသမ္ပယုတ္တေ ခန္ဓေ အနိစ္စတော။ပေ။ ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ ပရာမာသဝိပ္ပယုတ္တော ရာဂေါ။ပေ။ ဝိစိကိစ္ဆာ။ပေ။ ဥဒ္ဓစ္စံ။ပေ။ ဒေါမနဿံ ဥပ္ပဇ္ဇတိ၊ စေတောပရိယဉာဏေန ပရာမာသသမ္ပယုတ္တစိတ္တသမင်္ဂိဿ စိတ္တံ ဇာနာတိ၊ ပရာမာသသမ္ပယုတ္တာ ခန္ဓာ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၂)

၆၅. ပရာမာသဝိပ္ပယုတ္တော ဓမ္မော ပရာမာသဝိပ္ပယုတ္တဿ ဓမ္မဿ အာရမ္မဏပစ္စယေန ပစ္စယော – ဒါနံ။ပေ။ သီလံ။ပေ။ ဥပေါသထကမ္မံ ကတွာ တံ ပစ္စဝေက္ခတိ၊ အဿာဒေတိ အဘိနန္ဒတိ၊ တံ အာရဗ္ဘ ပရာမာသဝိပ္ပယုတ္တော ရာဂေါ။ပေ။ ဝိစိကိစ္ဆာ။ပေ။ ဥဒ္ဓစ္စံ။ပေ။ ဒေါမနဿံ ဥပ္ပဇ္ဇတိ၊ ပုဗ္ဗေ သုစိဏ္ဏာနိ။ပေ။ ဈာနာ။ပေ။ အရိယာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ၊ ဖလံ။ပေ။ နိဗ္ဗာနံ။ပေ။ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ၊ အာဝဇ္ဇနာယ အာရမ္မဏပစ္စယေန ပစ္စယော၊ အရိယာ ပရာမာသဝိပ္ပယုတ္တေ ပဟီနေ ကိလေသေ။ပေ။ ဝိက္ခမ္ဘိတေ ကိလေသေ။ပေ။ ပုဗ္ဗေ။ပေ။ စက္ခုံ။ပေ။ ဝတ္ထုံ ပရာမာသဝိပ္ပယုတ္တေ ခန္ဓေ အနိစ္စတော။ပေ။ ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ ပရာမာသဝိပ္ပယုတ္တော ရာဂေါ။ပေ။ ဝိစိကိစ္ဆာ။ပေ။ ဥဒ္ဓစ္စံ။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. စေတောပရိယဉာဏေန ပရာမာသဝိပ္ပယုတ္တစိတ္တသမင်္ဂိဿ စိတ္တံ ဇာနာတိ၊ အာကာသာနဉ္စာယတနံ ဝိညာဏဉ္စာယတနဿ။ပေ။ အာကိဉ္စညာယတနံ နေဝသညာနာသညာယတနဿ။ပေ။ ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။ ပရာမာသဝိပ္ပယုတ္တာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၁)

ပရာမာသဝိပ္ပယုတ္တော ဓမ္မော ပရာမာသသမ္ပယုတ္တဿ ဓမ္မဿ အာရမ္မဏပစ္စယေန ပစ္စယော – ဒါနံ။ပေ။ သီလံ။ပေ။ ဥပေါသထကမ္မံ။ပေ။ ပုဗ္ဗေ။ပေ။ ဈာနာ။ပေ။ စက္ခုံ။ပေ။ ဝတ္ထုံ ပရာမာသဝိပ္ပယုတ္တေ ခန္ဓေ အဿာဒေတိ အဘိနန္ဒတိ. တံ အာရဗ္ဘ ပရာမာသသမ္ပယုတ္တော ရာဂေါ ဥပ္ပဇ္ဇတိ. (၂)

အဓိပတိပစ္စယော

၆၆. ပရာမာသသမ္ပယုတ္တော ဓမ္မော ပရာမာသသမ္ပယုတ္တဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ရာဂံ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ပရာမာသသမ္ပယုတ္တော ရာဂေါ ဥပ္ပဇ္ဇတိ၊ ပရာမာသသမ္ပယုတ္တေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ပရာမာသသမ္ပယုတ္တော ရာဂေါ ဥပ္ပဇ္ဇတိ. သဟဇာတာဓိပတိ – ပရာမာသသမ္ပယုတ္တာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော. (၁)

ပရာမာသသမ္ပယုတ္တော ဓမ္မော ပရာမာသဝိပ္ပယုတ္တဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ပရာမာသသမ္ပယုတ္တေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ပရာမာသဝိပ္ပယုတ္တော ရာဂေါ ဥပ္ပဇ္ဇတိ. သဟဇာတာဓိပတိ – ပရာမာသသမ္ပယုတ္တာဓိပတိ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော. (၂)

ပရာမာသသမ္ပယုတ္တော ဓမ္မော ပရာမာသသမ္ပယုတ္တဿ စ ပရာမာသဝိပ္ပယုတ္တဿ စ ဓမ္မဿ အဓိပတိပစ္စယေန ပစ္စယော. သဟဇာတာဓိပတိ – ပရာမာသသမ္ပယုတ္တာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၃)

၆၇. ပရာမာသဝိပ္ပယုတ္တော ဓမ္မော ပရာမာသဝိပ္ပယုတ္တဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဒါနံ။ပေ။ သီလံ။ပေ။ ဥပေါသထကမ္မံ ကတွာ တံ ဂရုံ ကတွာ ပစ္စဝေက္ခတိ၊ အဿာဒေတိ အဘိနန္ဒတိ၊ တံ ဂရုံ ကတွာ ပရာမာသဝိပ္ပယုတ္တော ရာဂေါ ဥပ္ပဇ္ဇတိ၊ ပုဗ္ဗေ။ပေ။ ဈာနာ။ပေ။ အရိယာ မဂ္ဂါ ဝုဋ္ဌဟိတွာ မဂ္ဂံ ဂရုံ ကတွာ။ပေ။ ဖလံ။ပေ။ နိဗ္ဗာနံ။ပေ။ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ အဓိပတိပစ္စယေန ပစ္စယော၊ စက္ခုံ။ပေ။ ဝတ္ထုံ ပရာမာသဝိပ္ပယုတ္တေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ပရာမာသဝိပ္ပယုတ္တော ရာဂေါ ဥပ္ပဇ္ဇတိ. သဟဇာတာဓိပတိ – ပရာမာသဝိပ္ပယုတ္တာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၁)

ပရာမာသဝိပ္ပယုတ္တော ဓမ္မော ပရာမာသသမ္ပယုတ္တဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – ဒါနံ။ပေ။ သီလံ။ပေ။ ဥပေါသထကမ္မံ ကတွာ တံ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ပရာမာသသမ္ပယုတ္တော ရာဂေါ ဥပ္ပဇ္ဇတိ၊ ပုဗ္ဗေ။ပေ။ ဈာနာ။ပေ။ စက္ခုံ။ပေ။ ဝတ္ထုံ ပရာမာသဝိပ္ပယုတ္တေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ပရာမာသသမ္ပယုတ္တော ရာဂေါ ဥပ္ပဇ္ဇတိ. (၂)

အနန္တရ-သမနန္တရပစ္စယာ

၆၈. ပရာမာသသမ္ပယုတ္တော ဓမ္မော ပရာမာသသမ္ပယုတ္တဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ပရာမာသသမ္ပယုတ္တာ ခန္ဓာ ပစ္ဆိမာနံ ပစ္ဆိမာနံ ပရာမာသသမ္ပယုတ္တကာနံ ခန္ဓာနံ အနန္တရပစ္စယေန ပစ္စယော. (၁)

ပရာမာသသမ္ပယုတ္တော ဓမ္မော ပရာမာသဝိပ္ပယုတ္တဿ ဓမ္မဿ အနန္တရပစ္စယေန ပစ္စယော – ပရာမာသသမ္ပယုတ္တာ ခန္ဓာ ဝုဋ္ဌာနဿ အနန္တရပစ္စယေန ပစ္စယော. (၂)

၆၉. ပရာမာသဝိပ္ပယုတ္တော ဓမ္မော ပရာမာသဝိပ္ပယုတ္တဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ပရာမာသဝိပ္ပယုတ္တာ ခန္ဓာ ပစ္ဆိမာနံ ပစ္ဆိမာနံ ပရာမာသဝိပ္ပယုတ္တာနံ ခန္ဓာနံ အနန္တရပစ္စယေန ပစ္စယော၊ အနုလောမံ။ပေ။ ဖလသမာပတ္တိယာ အနန္တရပစ္စယေန ပစ္စယော. (၁)

ပရာမာသဝိပ္ပယုတ္တော ဓမ္မော ပရာမာသသမ္ပယုတ္တဿ ဓမ္မဿ အနန္တရပစ္စယေန ပစ္စယော – အာဝဇ္ဇနာ ပရာမာသသမ္ပယုတ္တကာနံ ခန္ဓာနံ အနန္တရပစ္စယေန ပစ္စယော။ သမနန္တရပစ္စယေန ပစ္စယော. (၂)

သဟဇာတပစ္စယာဒိ

၇၀. ပရာမာသသမ္ပယုတ္တော ဓမ္မော ပရာမာသသမ္ပယုတ္တဿ ဓမ္မဿ သဟဇာတပစ္စယေန ပစ္စယော။ ပဉ္စ။ အညမညပစ္စယေန ပစ္စယော။ ဒွေ။ နိဿယပစ္စယေန ပစ္စယော။ သတ္တ.

ဥပနိဿယပစ္စယော

၇၁. ပရာမာသသမ္ပယုတ္တော ဓမ္မော ပရာမာသသမ္ပယုတ္တဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ပရာမာသသမ္ပယုတ္တော ရာဂေါ။ မောဟော။ ပတ္ထနာ ပရာမာသသမ္ပယုတ္တဿ ရာဂဿ။ မောဟဿ။ ပတ္ထနာယ ဥပနိဿယပစ္စယေန ပစ္စယော. (၁)

ပရာမာသသမ္ပယုတ္တော ဓမ္မော ပရာမာသဝိပ္ပယုတ္တဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ပရာမာသသမ္ပယုတ္တံ ရာဂံ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ၊ မာနံ ဇပ္ပေတိ၊ ပရာမာသသမ္ပယုတ္တံ မောဟံ။ ပတ္ထနံ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ၊ မာနံ ဇပ္ပေတိ၊ ပါဏံ ဟနတိ။ပေ။ သံဃံ ဘိန္ဒတိ၊ ပရာမာသသမ္ပယုတ္တော ရာဂေါ။ မောဟော။ ပတ္ထနာ သဒ္ဓါယ ။ပေ။ ပညာယ၊ ရာဂဿ။ ဒေါသဿ။ မောဟဿ။ မာနဿ။ ပတ္ထနာယ။ ကာယိကဿ သုခဿ။ပေ။ ဖလသမာပတ္တိယာ ဥပနိဿယပစ္စယေန ပစ္စယော. (၂)

၇၂. ပရာမာသဝိပ္ပယုတ္တော ဓမ္မော ပရာမာသဝိပ္ပယုတ္တဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဒ္ဓံ ဥပနိဿာယ ဒါနံ ဒေတိ ။ပေ။ သမာပတ္တိံ ဥပ္ပါဒေတိ၊ မာနံ ဇပ္ပေတိ၊ သီလံ။ပေ။ ပညံ၊ ရာဂံ။ပေ။ မာနံ။ပေ။ ပတ္ထနံ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ၊ ပါဏံ ဟနတိ။ပေ။ သံဃံ ဘိန္ဒတိ၊ ကာယိကံ သုခံ။ပေ။ သေနာသနံ ဥပနိဿာယ ဒါနံ ဒေတိ။ပေ။ သံဃံ ဘိန္ဒတိ၊ သဒ္ဓါ။ပေ။ ပညာ၊ ရာဂေါ။ပေ။ မာနော။ ပတ္ထနာ။ ကာယိကံ သုခံ။ပေ။ သေနာသနံ သဒ္ဓါယ။ပေ။ ပညာယ၊ ရာဂဿ။ပေ။ မာနဿ။ ပတ္ထနာယ။ ကာယိကဿ သုခဿ။ပေ။ ဖလသမာပတ္တိယာ ဥပနိဿယပစ္စယေန ပစ္စယော. (၁)

ပရာမာသဝိပ္ပယုတ္တော ဓမ္မော ပရာမာသသမ္ပယုတ္တဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဒ္ဓံ ဥပနိဿာယ ပရာမာသသမ္ပယုတ္တော ရာဂေါ ဥပ္ပဇ္ဇတိ၊ သီလံ။ပေ။ သေနာသနံ ဥပနိဿာယ ပရာမာသသမ္ပယုတ္တော ရာဂေါ ဥပ္ပဇ္ဇတိ၊ သဒ္ဓါ။ပေ။ သေနာသနံ ပရာမာသသမ္ပယုတ္တဿ ရာဂဿ။ပေ။ ပတ္ထနာယ ဥပနိဿယပစ္စယေန ပစ္စယော. (၂)

ပုရေဇာတပစ္စယော

၇၃. ပရာမာသဝိပ္ပယုတ္တော ဓမ္မော ပရာမာသဝိပ္ပယုတ္တဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အနိစ္စတော။ပေ။ ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ ပရာမာသဝိပ္ပယုတ္တော ရာဂေါ။ပေ။ ဝိစိကိစ္ဆာ။ပေ။ ဥဒ္ဓစ္စံ။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ ပုရေဇာတပစ္စယေန ပစ္စယော. ဝတ္ထုပုရေဇာတံ – စက္ခာယတနံ စက္ခုဝိညာဏဿ ။ပေ။ ကာယာယတနံ ကာယဝိညာဏဿ။ပေ။ ဝတ္ထု ပရာမာသဝိပ္ပယုတ္တာနံ ခန္ဓာနံ ပုရေဇာတပစ္စယေန ပစ္စယော. (၁)

ပရာမာသဝိပ္ပယုတ္တော ဓမ္မော ပရာမာသသမ္ပယုတ္တဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အဿာဒေတိ အဘိနန္ဒတိ၊ တံ အာရဗ္ဘ ပရာမာသသမ္ပယုတ္တော ရာဂေါ ဥပ္ပဇ္ဇတိ. ဝတ္ထုပုရေဇာတံ – ဝတ္ထု ပရာမာသသမ္ပယုတ္တကာနံ ခန္ဓာနံ ပုရေဇာတပစ္စယေန ပစ္စယော. (၂)

ပစ္ဆာဇာတာသေဝနပစ္စယာ

၇၄. ပရာမာသသမ္ပယုတ္တော ဓမ္မော ပရာမာသဝိပ္ပယုတ္တဿ ဓမ္မဿ ပစ္ဆာဇာတပစ္စယေန ပစ္စယော (သံခိတ္တံ). (၁)

ပရာမာသဝိပ္ပယုတ္တော ဓမ္မော ပရာမာသဝိပ္ပယုတ္တဿ ဓမ္မဿ ပစ္ဆာဇာတပစ္စယေန ပစ္စယော (သံခိတ္တံ). (၁)

ပရာမာသသမ္ပယုတ္တော ဓမ္မော ပရာမာသသမ္ပယုတ္တဿ ဓမ္မဿ အာသေဝနပစ္စယေန ပစ္စယော။ ဒွေ.

ကမ္မပစ္စယာဒိ

၇၅. ပရာမာသသမ္ပယုတ္တော ဓမ္မော ပရာမာသသမ္ပယုတ္တဿ ဓမ္မဿ ကမ္မပစ္စယေန ပစ္စယော – ပရာမာသသမ္ပယုတ္တာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော. (၁)

ပရာမာသသမ္ပယုတ္တော ဓမ္မော ပရာမာသဝိပ္ပယုတ္တဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – ပရာမာသသမ္ပယုတ္တာ စေတနာ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော. နာနာက္ခဏိကာ – ပရာမာသသမ္ပယုတ္တာ စေတနာ ဝိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော. (မူလံ ကာတဗ္ဗံ) ပရာမာသသမ္ပယုတ္တာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော. (၃)

ပရာမာသဝိပ္ပယုတ္တော ဓမ္မော ပရာမာသဝိပ္ပယုတ္တဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – ပရာမာသဝိပ္ပယုတ္တာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. နာနာက္ခဏိကာ – ပရာမာသဝိပ္ပယုတ္တာ စေတနာ ဝိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော. (၁)

ဝိပါကပစ္စယေန ပစ္စယော။ ဧကံ၊ အာဟာရပစ္စယေန ပစ္စယော။ စတ္တာရိ၊ ဣန္ဒြိယပစ္စယေန ပစ္စယော။ စတ္တာရိ၊ ဈာနပစ္စယေန ပစ္စယော။ စတ္တာရိ၊ မဂ္ဂပစ္စယေန ပစ္စယော။ စတ္တာရိ၊ သမ္ပယုတ္တပစ္စယေန ပစ္စယော။ ဒွေ.

ဝိပ္ပယုတ္တပစ္စယော

၇၆. ပရာမာသသမ္ပယုတ္တော ဓမ္မော ပရာမာသဝိပ္ပယုတ္တဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ (သံခိတ္တံ). (၁)

ပရာမာသဝိပ္ပယုတ္တော ဓမ္မော ပရာမာသဝိပ္ပယုတ္တဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ (သံခိတ္တံ). (၁)

ပရာမာသဝိပ္ပယုတ္တော ဓမ္မော ပရာမာသသမ္ပယုတ္တဿ ဓမ္မဿ ဝိပ္ပယုတ္တပစ္စယေန ပစ္စယော. ပုရေဇာတံ – ဝတ္ထု ပရာမာသမ္ပယုတ္တကာနံ ခန္ဓာနံ ဝိပ္ပယုတ္တပစ္စယေန ပစ္စယော. (၁)

အတ္ထိပစ္စယော

၇၇. ပရာမာသသမ္ပယုတ္တော ဓမ္မော ပရာမာသသမ္ပယုတ္တဿ ဓမ္မဿ အတ္ထိပစ္စယေန ပစ္စယော – ပရာမာသသမ္ပယုတ္တော ဧကော ခန္ဓော တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ။ပေ။. (၁)

ပရာမာသသမ္ပယုတ္တော ဓမ္မော ပရာမာသဝိပ္ပယုတ္တဿ ဓမ္မဿ အတ္ထိပစ္စယေန ပစ္စယော – ပရာမာသသမ္ပယုတ္တာ ခန္ဓာ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော. (မူလံ ကာတဗ္ဗံ.) (၂)

ပရာမာသသမ္ပယုတ္တော ဓမ္မော ပရာမာသသမ္ပယုတ္တဿ စ ပရာမာသဝိပ္ပယုတ္တဿ စ ဓမ္မဿ အတ္ထိပစ္စယေန ပစ္စယော – ပရာမာသသမ္ပယုတ္တော ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော။ပေ။ ဒွေ ခန္ဓာ။ပေ။. (၃)

၇၈. ပရာမာသဝိပ္ပယုတ္တော ဓမ္မော ပရာမာသဝိပ္ပယုတ္တဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ (သံခိတ္တံ). (၁)

ပရာမာသဝိပ္ပယုတ္တော ဓမ္မော ပရာမာသသမ္ပယုတ္တဿ ဓမ္မဿ အတ္ထိပစ္စယေန ပစ္စယော. ပုရေဇာတံ – စက္ခုံ။ပေ။ ဝတ္ထုံ အဿာဒေတိ အဘိနန္ဒတိ၊ တံ အာရဗ္ဘ ပရာမာသသမ္ပယုတ္တော ရာဂေါ ဥပ္ပဇ္ဇတိ၊ ဝတ္ထု ပရာမာသသမ္ပယုတ္တကာနံ ခန္ဓာနံ အတ္ထိပစ္စယေန ပစ္စယော. (၂)

၇၉. ပရာမာသသမ္ပယုတ္တော စ ပရာမာသဝိပ္ပယုတ္တော စ ဓမ္မာ ပရာမာသသမ္ပယုတ္တဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – ပရာမာသသမ္ပယုတ္တော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။. (၁)

ပရာမာသသမ္ပယုတ္တော စ ပရာမာသဝိပ္ပယုတ္တော စ ဓမ္မာ ပရာမာသဝိပ္ပယုတ္တဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတာ – ပရာမာသသမ္ပယုတ္တာ ခန္ဓာ စ မဟာဘူတာ စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော. ပစ္ဆာဇာတာ – ပရာမာသသမ္ပယုတ္တာ ခန္ဓာ စ ကဗဠီကာရော အာဟာရော စ ဣမဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – ပရာမာသသမ္ပယုတ္တာ ခန္ဓာ စ ရူပဇီဝိတိန္ဒြိယဉ္စ ကဋတ္တာရူပါနံ အတ္ထိပစ္စယေန ပစ္စယော. (၂)