၁. ဝိဘင်္ဂဝါရော

ဟေတုပစ္စယော

၁၀. ပရာမာသံ ဓမ္မံ ပစ္စယာ နောပရာမာသော ဓမ္မော ဥပ္ပဇ္ဇတိ ဟေတုပစ္စယာ – ပရာမာသံ ပစ္စယာ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ. (၁)

နောပရာမာသံ ဓမ္မံ ပစ္စယာ နောပရာမာသော ဓမ္မော ဥပ္ပဇ္ဇတိ ဟေတုပစ္စယာ – နောပရာမာသံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ (ယာဝ အဇ္ဈတ္တိကာ မဟာဘူတာ)၊ ဝတ္ထုံ ပစ္စယာ နောပရာမာသာ ခန္ဓာ. (၁)

နောပရာမာသံ ဓမ္မံ ပစ္စယာ ပရာမာသော ဓမ္မော ဥပ္ပဇ္ဇတိ ဟေတုပစ္စယာ – နောပရာမာသေ ခန္ဓေ ပစ္စယာ ပရာမာသော၊ ဝတ္ထုံ ပစ္စယာ ပရာမာသော. (၂)

နောပရာမာသံ ဓမ္မံ ပစ္စယာ ပရာမာသော စ နောပရာမာသော စ ဓမ္မာ ဥပ္ပဇ္ဇန္တိ ဟေတုပစ္စယာ – နောပရာမာသံ ဧကံ ခန္ဓံ ပစ္စယာ တယော ခန္ဓာ ပရာမာသော စ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဝတ္ထုံ ပစ္စယာ ပရာမာသော၊ မဟာဘူတေ ပစ္စယာ စိတ္တသမုဋ္ဌာနံ ရူပံ၊ ဝတ္ထုံ ပစ္စယာ ပရာမာသော စ သမ္ပယုတ္တကာ စ ခန္ဓာ. (၃)

၁၁. ပရာမာသဉ္စ နောပရာမာသဉ္စ ဓမ္မံ ပစ္စယာ နောပရာမာသော ဓမ္မော ဥပ္ပဇ္ဇတိ ဟေတုပစ္စယာ – နောပရာမာသံ ဧကံ ခန္ဓဉ္စ ပရာမာသဉ္စ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ စ။ပေ။ ပရာမာသဉ္စ သမ္ပယုတ္တကေ စ ခန္ဓေ ပစ္စယာ စိတ္တသမုဋ္ဌာနံ ရူပံ၊ ပရာမာသဉ္စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ ပရာမာသဉ္စ ဝတ္ထုဉ္စ ပစ္စယာ နောပရာမာသာ ခန္ဓာ (သံခိတ္တံ). (၁)