၁. ဝိဘင်္ဂဝါရော

ဟေတုပစ္စယော

၁၀၀. နီဝရဏော စေဝ နီဝရဏသမ္ပယုတ္တော စ ဓမ္မော နီဝရဏဿ စေဝ နီဝရဏသမ္ပယုတ္တဿ စ ဓမ္မဿ ဟေတုပစ္စယေန ပစ္စယော – နီဝရဏာ စေဝ နီဝရဏသမ္ပယုတ္တာ စ ဟေတူ သမ္ပယုတ္တကာနံ နီဝရဏာနံ ဟေတုပစ္စယေန ပစ္စယော. (၁)

နီဝရဏော စေဝ နီဝရဏသမ္ပယုတ္တော စ ဓမ္မော နီဝရဏသမ္ပယုတ္တဿ စေဝ နော စ နီဝရဏဿ ဓမ္မဿ ဟေတုပစ္စယေန ပစ္စယော – နီဝရဏာ စေဝ နီဝရဏသမ္ပယုတ္တာ စ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. (၂)

နီဝရဏော စေဝ နီဝရဏသမ္ပယုတ္တော စ ဓမ္မော နီဝရဏဿ စေဝ နီဝရဏသမ္ပယုတ္တဿ စ နီဝရဏသမ္ပယုတ္တဿ စေဝ နော စ နီဝရဏဿ စ ဓမ္မဿ ဟေတုပစ္စယေန ပစ္စယော – နီဝရဏာ စေဝ နီဝရဏသမ္ပယုတ္တာ စ ဟေတူ သမ္ပယုတ္တကာနံ ခန္ဓာနံ နီဝရဏာနဉ္စ ဟေတုပစ္စယေန ပစ္စယော. (၃)

အာရမ္မဏပစ္စယော

၁၀၁. နီဝရဏော စေဝ နီဝရဏသမ္ပယုတ္တော စ ဓမ္မော နီဝရဏဿ စေဝ နီဝရဏသမ္ပယုတ္တဿ စ ဓမ္မဿ အာရမ္မဏပစ္စယေန ပစ္စယော – နီဝရဏေ အာရဗ္ဘ နီဝရဏာ ဥပ္ပဇ္ဇန္တိ. (မူလံ ကာတဗ္ဗံ) နီဝရဏေ အာရဗ္ဘ နီဝရဏသမ္ပယုတ္တာ စေဝ နော စ နီဝရဏာ ခန္ဓာ ဥပ္ပဇ္ဇန္တိ. (မူလံ ကာတဗ္ဗံ) နီဝရဏေ အာရဗ္ဘ နီဝရဏာ စ သမ္ပယုတ္တကာ စ ခန္ဓာ ဥပ္ပဇ္ဇန္တိ. (၃)

နီဝရဏသမ္ပယုတ္တော စေဝ နော စ နီဝရဏော ဓမ္မော နီဝရဏသမ္ပယုတ္တဿ စေဝ နော စ နီဝရဏဿ ဓမ္မဿ အာရမ္မဏပစ္စယေန ပစ္စယော – နီဝရဏသမ္ပယုတ္တေ စေဝ နော စ နီဝရဏေ ခန္ဓေ အာရဗ္ဘ နီဝရဏသမ္ပယုတ္တာ စေဝ နော စ နီဝရဏာ ခန္ဓာ ဥပ္ပဇ္ဇန္တိ. (မူလံ ပုစ္ဆိတဗ္ဗံ) နီဝရဏသမ္ပယုတ္တေ စေဝ နော စ နီဝရဏေ ခန္ဓေ အာရဗ္ဘ နီဝရဏာ ဥပ္ပဇ္ဇန္တိ. (မူလံ ပုစ္ဆိတဗ္ဗံ) နီဝရဏသမ္ပယုတ္တေ စေဝ နော စ နီဝရဏေ ခန္ဓေ အာရဗ္ဘ နီဝရဏာ စ သမ္ပယုတ္တကာ စ ခန္ဓာ ဥပ္ပဇ္ဇန္တိ. (၃)

နီဝရဏော စေဝ နီဝရဏသမ္ပယုတ္တော စ နီဝရဏသမ္ပယုတ္တော စေဝ နော စ နီဝရဏော စ ဓမ္မာ နီဝရဏဿ စေဝ နီဝရဏသမ္ပယုတ္တဿ စ ဓမ္မဿ အာရမ္မဏပစ္စယေန ပစ္စယော။ တီဏိ. (၃)

အဓိပတိပစ္စယာဒိ

၁၀၂. နီဝရဏော စေဝ နီဝရဏသမ္ပယုတ္တော စ ဓမ္မော နီဝရဏဿ စေဝ နီဝရဏသမ္ပယုတ္တဿ စ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ။ တီဏိ (ဂရုကာရမ္မဏာယေဝ).

နီဝရဏသမ္ပယုတ္တော စေဝ နော စ နီဝရဏော ဓမ္မော နီဝရဏသမ္ပယုတ္တဿ စေဝ နော စ နီဝရဏဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ နီဝရဏသမ္ပယုတ္တေ စေဝ နော စ နီဝရဏေ ခန္ဓေ ဂရုံ ကတွာ နီဝရဏသမ္ပယုတ္တာ စေဝ နော စ နီဝရဏာ ခန္ဓာ ဥပ္ပဇ္ဇန္တိ. သဟဇာတာဓိပတိ – နီဝရဏသမ္ပယုတ္တာ စေဝ နော စ နီဝရဏာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော. (မူလံ ကာတဗ္ဗံ) အာရမ္မဏာဓိပတိ – နီဝရဏသမ္ပယုတ္တေ စေဝ နော စ နီဝရဏေ ခန္ဓေ ဂရုံ ကတွာ နီဝရဏာ ဥပ္ပဇ္ဇန္တိ. သဟဇာတာဓိပတိ – နီဝရဏသမ္ပယုတ္တာ စေဝ နော စ နီဝရဏာဓိပတိ သမ္ပယုတ္တကာနံ နီဝရဏာနံ အဓိပတိပစ္စယေန ပစ္စယော. (မူလံ ကာတဗ္ဗံ) အာရမ္မဏာဓိပတိ – နီဝရဏသမ္ပယုတ္တေ စေဝ နော စ နီဝရဏေ ခန္ဓေ ဂရုံ ကတွာ နီဝရဏာ စ သမ္ပယုတ္တကာ စ ခန္ဓာ ဥပ္ပဇ္ဇန္တိ. သဟဇာတာဓိပတိ – နီဝရဏသမ္ပယုတ္တာ စေဝ နော စ နီဝရဏာဓိပတိ သမ္ပယုတ္တကာနံ ခန္ဓာနံ နီဝရဏာနဉ္စ အဓိပတိပစ္စယေန ပစ္စယော. (၃)

၁၀၃. နီဝရဏော စေဝ နီဝရဏသမ္ပယုတ္တော စ နီဝရဏသမ္ပယုတ္တော စေဝ နော စ နီဝရဏော စ ဓမ္မာ နီဝရဏဿ စေဝ နီဝရဏသမ္ပယုတ္တဿ စ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ။ တီဏိ. (၃)

အနန္တရပစ္စယေန ပစ္စယော (အာဝဇ္ဇနာပိ ဝုဋ္ဌာနမ္ပိ နတ္ထိ၊ သဗ္ဗတ္ထ ပုရိမာ ပုရိမာ ကာတဗ္ဗာ)။ သမနန္တရပစ္စယေန ပစ္စယော။ နဝ။ သဟဇာတပစ္စယေန ပစ္စယော။ နဝ။ အညမညပစ္စယေန ပစ္စယော။ နဝ။ နိဿယပစ္စယေန ပစ္စယော။ နဝ။ ဥပနိဿယပစ္စယေန ပစ္စယော။ နဝ (အာရမ္မဏသဒိသံ၊ ဝိပါကော နတ္ထိ)။ အာသေဝနပစ္စယေန ပစ္စယော။ ပဉ္စ.

ကမ္မပစ္စယော

၁၀၄. နီဝရဏသမ္ပယုတ္တော စေဝ နော စ နီဝရဏော ဓမ္မော နီဝရဏသမ္ပယုတ္တဿ စေဝ နော စ နီဝရဏဿ ဓမ္မဿ ကမ္မပစ္စယေန ပစ္စယော – နီဝရဏသမ္ပယုတ္တာ စေဝ နော စ နီဝရဏာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော. (မူလံ ကာတဗ္ဗံ) နီဝရဏသမ္ပယုတ္တာ စေဝ နော စ နီဝရဏာ စေတနာ သမ္ပယုတ္တကာနံ နီဝရဏာနံ ကမ္မပစ္စယေန ပစ္စယော. (မူလံ ကာတဗ္ဗံ) နီဝရဏသမ္ပယုတ္တာ စေဝ နော စ နီဝရဏာ စေတနာ သမ္ပယုတ္တကာနံ ခန္ဓာနံ နီဝရဏာနဉ္စ ကမ္မပစ္စယေန ပစ္စယော. (၃)

အာဟာရပစ္စယာဒိ

၁၀၅. နီဝရဏသမ္ပယုတ္တော စေဝ နော စ နီဝရဏော ဓမ္မော နီဝရဏသမ္ပယုတ္တဿ စေဝ နော စ နီဝရဏဿ ဓမ္မဿ အာဟာရပစ္စယေန ပစ္စယော။ တီဏိ။ ဣန္ဒြိယပစ္စယေန ပစ္စယော။ တီဏိ။ ဈာနပစ္စယေန ပစ္စယော။ တီဏိ။ မဂ္ဂပစ္စယေန ပစ္စယော။ တီဏိ။ သမ္ပယုတ္တပစ္စယေန ပစ္စယော။ နဝ။ အတ္ထိပစ္စယေန ပစ္စယော။ နဝ။ နတ္ထိပစ္စယေန ပစ္စယော။ နဝ။ ဝိဂတပစ္စယေန ပစ္စယော။ နဝ။ အဝိဂတပစ္စယေန ပစ္စယော ။ နဝ.