၁. ဝိဘင်္ဂဝါရော

နဟေတုပစ္စယော

၉၆. နီဝရဏဉ္စေဝ နီဝရဏသမ္ပယုတ္တဉ္စ ဓမ္မံ ပဋိစ္စ နီဝရဏော စေဝ နီဝရဏသမ္ပယုတ္တော စ ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာနီဝရဏံ ပဋိစ္စ အဝိဇ္ဇာနီဝရဏံ၊ ဥဒ္ဓစ္စနီဝရဏံ ပဋိစ္စ အဝိဇ္ဇာနီဝရဏံ. (၁)

နီဝရဏသမ္ပယုတ္တဉ္စေဝ နော စ နီဝရဏံ ဓမ္မံ ပဋိစ္စ နီဝရဏော စေဝ နီဝရဏသမ္ပယုတ္တော စ ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ အဝိဇ္ဇာနီဝရဏံ. (၁)

နီဝရဏဉ္စေဝ နီဝရဏသမ္ပယုတ္တဉ္စ နီဝရဏသမ္ပယုတ္တဉ္စေဝ နော စ နီဝရဏဉ္စ ဓမ္မံ ပဋိစ္စ နီဝရဏော စေဝ နီဝရဏသမ္ပယုတ္တော စ ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာနီဝရဏဉ္စ သမ္ပယုတ္တကေ စ ခန္ဓေ ပဋိစ္စ အဝိဇ္ဇာနီဝရဏံ၊ ဥဒ္ဓစ္စနီဝရဏဉ္စ သမ္ပယုတ္တကေ စ ခန္ဓေ ပဋိစ္စ အဝိဇ္ဇာနီဝရဏံ (သံခိတ္တံ). (၁)