၁. ဝိဘင်္ဂဝါရော

နဟေတုပစ္စယော

၅. နီဝရဏံ ဓမ္မံ ပဋိစ္စ နီဝရဏော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာနီဝရဏံ ပဋိစ္စ အဝိဇ္ဇာနီဝရဏံ၊ ဥဒ္ဓစ္စနီဝရဏံ ပဋိစ္စ အဝိဇ္ဇာနီဝရဏံ. (၁)

နောနီဝရဏံ ဓမ္မံ ပဋိစ္စ နောနီဝရဏော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နောနီဝရဏံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ။ပေ။ အဟေတုကပဋိသန္ဓိက္ခဏေ။ပေ။ (ယာဝ အသညသတ္တာ). (၁)

နောနီဝရဏံ ဓမ္မံ ပဋိစ္စ နီဝရဏော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ အဝိဇ္ဇာနီဝရဏံ. (၂)

၆. နီဝရဏဉ္စ နောနီဝရဏဉ္စ ဓမ္မံ ပဋိစ္စ နီဝရဏော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာနီဝရဏဉ္စ သမ္ပယုတ္တကေ စ ခန္ဓေ ပဋိစ္စ အဝိဇ္ဇာနီဝရဏံ၊ ဥဒ္ဓစ္စနီဝရဏဉ္စ သမ္ပယုတ္တကေ စ ခန္ဓေ ပဋိစ္စ အဝိဇ္ဇာနီဝရဏံ. (၁)

နအာရမ္မဏပစ္စယာဒိ

၇. နီဝရဏံ ဓမ္မံ ပဋိစ္စ နောနီဝရဏော ဓမ္မော ဥပ္ပဇ္ဇတိ နအာရမ္မဏပစ္စယာ – နီဝရဏေ ပဋိစ္စ စိတ္တသမုဋ္ဌာနံ ရူပံ. (၁)

နောနီဝရဏံ ဓမ္မံ ပဋိစ္စ နောနီဝရဏော ဓမ္မော ဥပ္ပဇ္ဇတိ နအာရမ္မဏပစ္စယာ – နောနီဝရဏေ ခန္ဓေ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။ (ယာဝ အသညသတ္တာ). (၁)

နီဝရဏဉ္စ နောနီဝရဏဉ္စ ဓမ္မံ ပဋိစ္စ နောနီဝရဏော ဓမ္မော ဥပ္ပဇ္ဇတိ နအာရမ္မဏပစ္စယာ – နီဝရဏေ စ သမ္ပယုတ္တကေ စ ခန္ဓေ ပဋိစ္စ စိတ္တသမုဋ္ဌာနံ ရူပံ (သံခိတ္တံ)။ နအဓိပတိပစ္စယာ။ နအနန္တရပစ္စယာ။ နသမနန္တရပစ္စယာ။ နအညမညပစ္စယာ။ နဥပနိဿယပစ္စယာ.

နပုရေဇာတပစ္စယော

၈. နီဝရဏံ ဓမ္မံ ပဋိစ္စ နီဝရဏော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ ကာမစ္ဆန္ဒနီဝရဏံ ပဋိစ္စ ထိနမိဒ္ဓနီဝရဏံ ဥဒ္ဓစ္စနီဝရဏံ အဝိဇ္ဇာနီဝရဏံ၊ အရူပေ ကာမစ္ဆန္ဒနီဝရဏံ ပဋိစ္စ ဥဒ္ဓစ္စနီဝရဏံ အဝိဇ္ဇာနီဝရဏံ၊ အရူပေ ဝိစိကိစ္ဆာနီဝရဏံ ပဋိစ္စ ဥဒ္ဓစ္စနီဝရဏံ အဝိဇ္ဇာနီဝရဏံ၊ အရူပေ ဥဒ္ဓစ္စနီဝရဏံ ပဋိစ္စ အဝိဇ္ဇာနီဝရဏံ. (၁)

နီဝရဏံ ဓမ္မံ ပဋိစ္စ နောနီဝရဏော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ နီဝရဏေ ပဋိစ္စ သမ္ပယုတ္တကာ ခန္ဓာ၊ နီဝရဏေ ပဋိစ္စ စိတ္တသမုဋ္ဌာနံ ရူပံ. (အဝသေသာ ပဉှာ သဗ္ဗေ ဝိတ္ထာရေတဗ္ဗာ. အရူပံ ပဌမံ ကာတဗ္ဗံ၊ ရူပံ ပစ္ဆာ ယထာ လဘတိ.)

၉. နီဝရဏဉ္စ နောနီဝရဏဉ္စ ဓမ္မံ ပဋိစ္စ နီဝရဏော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ နောနီဝရဏေ ခန္ဓေ စ ကာမစ္ဆန္ဒနီဝရဏဉ္စ ပဋိစ္စ ထိနမိဒ္ဓနီဝရဏံ ဥဒ္ဓစ္စနီဝရဏံ (စက္ကံ). (၁)

နီဝရဏဉ္စ နောနီဝရဏဉ္စ ဓမ္မံ ပဋိစ္စ နောနီဝရဏော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ နောနီဝရဏံ ဧကံ ခန္ဓဉ္စ နီဝရဏေ စ ပဋိစ္စ တယော ခန္ဓာ။ပေ။ ဒွေ ခန္ဓေ စ။ပေ။ နီဝရဏေ စ သမ္ပယုတ္တကေ စ ခန္ဓေ ပဋိစ္စ စိတ္တသမုဋ္ဌာနံ ရူပံ၊ နီဝရဏေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. (၂)

နီဝရဏဉ္စ နောနီဝရဏဉ္စ ဓမ္မံ ပဋိစ္စ နီဝရဏော စ နောနီဝရဏော စ ဓမ္မာ ဥပ္ပဇ္ဇန္တိ နပုရေဇာတပစ္စယာ – အရူပေ နောနီဝရဏံ ဧကံ ခန္ဓဉ္စ ကာမစ္ဆန္ဒနီဝရဏဉ္စ ပဋိစ္စ တယော ခန္ဓာ ထိနမိဒ္ဓနီဝရဏံ ဥဒ္ဓစ္စနီဝရဏံ အဝိဇ္ဇာနီဝရဏံ (စက္ကံ. သံခိတ္တံ). (၃)