၁. ဝိဘင်္ဂဝါရော

ဟေတုပစ္စယော

၉၂. နီဝရဏဉ္စေဝ နီဝရဏသမ္ပယုတ္တဉ္စ ဓမ္မံ ပဋိစ္စ နီဝရဏော စေဝ နီဝရဏသမ္ပယုတ္တော စ ဓမ္မော ဥပ္ပဇ္ဇတိ ဟေတုပစ္စယာ – ကာမစ္ဆန္ဒနီဝရဏံ ပဋိစ္စ ထိနမိဒ္ဓနီဝရဏံ ဥဒ္ဓစ္စနီဝရဏံ အဝိဇ္ဇာနီဝရဏံ (စက္ကံ. သဗ္ဗေပိ နီဝရဏာ ကာတဗ္ဗာ). (၁)

နီဝရဏဉ္စေဝ နီဝရဏသမ္ပယုတ္တဉ္စ ဓမ္မံ ပဋိစ္စ နီဝရဏသမ္ပယုတ္တော စေဝ နော စ နီဝရဏော ဓမ္မော ဥပ္ပဇ္ဇတိ ဟေတုပစ္စယာ – နီဝရဏေ ပဋိစ္စ သမ္ပယုတ္တကာ ခန္ဓာ. (၂)

နီဝရဏဉ္စေဝ နီဝရဏသမ္ပယုတ္တဉ္စ ဓမ္မံ ပဋိစ္စ နီဝရဏော စေဝ နီဝရဏသမ္ပယုတ္တော စ နီဝရဏသမ္ပယုတ္တော စေဝ နော စ နီဝရဏော စ ဓမ္မာ ဥပ္ပဇ္ဇန္တိ ဟေတုပစ္စယာ – ကာမစ္ဆန္ဒနီဝရဏံ ပဋိစ္စ ထိနမိဒ္ဓနီဝရဏံ ဥဒ္ဓစ္စနီဝရဏံ အဝိဇ္ဇာနီဝရဏံ သမ္ပယုတ္တကာ စ ခန္ဓာ (စက္ကံ). (၃)

၉၃. နီဝရဏသမ္ပယုတ္တဉ္စေဝ နော စ နီဝရဏံ ဓမ္မံ ပဋိစ္စ နီဝရဏသမ္ပယုတ္တော စေဝ နော စ နီဝရဏော ဓမ္မော ဥပ္ပဇ္ဇတိ ဟေတုပစ္စယာ – နီဝရဏသမ္ပယုတ္တဉ္စေဝ နော စ နီဝရဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။. (၁)

နီဝရဏသမ္ပယုတ္တဉ္စေဝ နော စ နီဝရဏံ ဓမ္မံ ပဋိစ္စ နီဝရဏော စေဝ နီဝရဏသမ္ပယုတ္တော စ ဓမ္မော ဥပ္ပဇ္ဇတိ ဟေတုပစ္စယာ – နီဝရဏသမ္ပယုတ္တေ စေဝ နော စ နီဝရဏေ ခန္ဓေ ပဋိစ္စ နီဝရဏာ. (၂)

နီဝရဏသမ္ပယုတ္တဉ္စေဝ နော စ နီဝရဏံ ဓမ္မံ ပဋိစ္စ နီဝရဏော စေဝ နီဝရဏသမ္ပယုတ္တော စ နီဝရဏသမ္ပယုတ္တော စေဝ နော စ နီဝရဏော စ ဓမ္မာ ဥပ္ပဇ္ဇန္တိ ဟေတုပစ္စယာ – နီဝရဏသမ္ပယုတ္တဉ္စေဝ နော စ နီဝရဏံ ဧကံ ခန္ဓံ ပဋိစ္စ တယော ခန္ဓာ နီဝရဏာ စ။ပေ။ ဒွေ ခန္ဓေ။ပေ။. (၃)

၉၄. နီဝရဏဉ္စေဝ နီဝရဏသမ္ပယုတ္တဉ္စ နီဝရဏသမ္ပယုတ္တဉ္စေဝ နော စ နီဝရဏဉ္စ ဓမ္မံ ပဋိစ္စ နီဝရဏော စေဝ နီဝရဏသမ္ပယုတ္တော စ ဓမ္မော ဥပ္ပဇ္ဇတိ ဟေတုပစ္စယာ – ကာမစ္ဆန္ဒနီဝရဏဉ္စ သမ္ပယုတ္တကေ စ ခန္ဓေ ပဋိစ္စ ထိနမိဒ္ဓနီဝရဏံ ဥဒ္ဓစ္စနီဝရဏံ အဝိဇ္ဇာနီဝရဏံ (စက္ကံ). (၁)

နီဝရဏဉ္စေဝ နီဝရဏသမ္ပယုတ္တဉ္စ နီဝရဏသမ္ပယုတ္တဉ္စေဝ နော စ နီဝရဏဉ္စ ဓမ္မံ ပဋိစ္စ နီဝရဏသမ္ပယုတ္တော စေဝ နော စ နီဝရဏော ဓမ္မော ဥပ္ပဇ္ဇတိ ဟေတုပစ္စယာ – နီဝရဏသမ္ပယုတ္တဉ္စေဝ နော စ နီဝရဏံ ဧကံ ခန္ဓဉ္စ နီဝရဏဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ။ပေ။. (၂)

နီဝရဏဉ္စေဝ နီဝရဏသမ္ပယုတ္တဉ္စ နီဝရဏသမ္ပယုတ္တဉ္စေဝ နော စ နီဝရဏဉ္စ ဓမ္မံ ပဋိစ္စ နီဝရဏော စေဝ နီဝရဏသမ္ပယုတ္တော စ နီဝရဏသမ္ပယုတ္တော စေဝ နော စ နီဝရဏော စ ဓမ္မာ ဥပ္ပဇ္ဇန္တိ ဟေတုပစ္စယာ – နီဝရဏသမ္ပယုတ္တဉ္စေဝ နော စ နီဝရဏံ ဧကံ ခန္ဓဉ္စ ကာမစ္ဆန္ဒနီဝရဏဉ္စ ပဋိစ္စ တယော ခန္ဓာ ထိနမိဒ္ဓနီဝရဏံ ဥဒ္ဓစ္စနီဝရဏံ အဝိဇ္ဇာနီဝရဏံ။ပေ။ ဒွေ ခန္ဓေ စ။ပေ။ (စက္ကံ. သံခိတ္တံ.). (၃)