၁. ဝိဘင်္ဂဝါရော

ဟေတုပစ္စယော

၉၀. နီဝရဏော စေဝ နီဝရဏိယော စ ဓမ္မော နီဝရဏဿ စေဝ နီဝရဏိယဿ စ ဓမ္မဿ ဟေတုပစ္စယေန ပစ္စယော – နီဝရဏာ စေဝ နီဝရဏိယာ စ ဟေတူ သမ္ပယုတ္တကာနံ နီဝရဏာနံ ဟေတုပစ္စယေန ပစ္စယော. (၁)

နီဝရဏော စေဝ နီဝရဏိယော စ ဓမ္မော နီဝရဏိယဿ စေဝ နော စ နီဝရဏဿ ဓမ္မဿ ဟေတုပစ္စယေန ပစ္စယော – နီဝရဏာ စေဝ နီဝရဏိယာ စ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၂)

နီဝရဏော စေဝ နီဝရဏိယော စ ဓမ္မော နီဝရဏဿ စေဝ နီဝရဏိယဿ စ နီဝရဏိယဿ စေဝ နော စ နီဝရဏဿ စ ဓမ္မဿ ဟေတုပစ္စယေန ပစ္စယော – နီဝရဏာ စေဝ နီဝရဏိယာ စ ဟေတူ သမ္ပယုတ္တကာနံ ခန္ဓာနံ နီဝရဏာနဉ္စ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၃)

နီဝရဏိယော စေဝ နော စ နီဝရဏော ဓမ္မော နီဝရဏိယဿ စေဝ နော စ နီဝရဏဿ ဓမ္မဿ ဟေတုပစ္စယေန ပစ္စယော – နီဝရဏိယာ စေဝ နော စ နီဝရဏာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၁)

အာရမ္မဏပစ္စယော

၉၁. နီဝရဏော စေဝ နီဝရဏိယော စ ဓမ္မော နီဝရဏဿ စေဝ နီဝရဏိယဿ စ ဓမ္မဿ အာရမ္မဏပစ္စယေန ပစ္စယော – နီဝရဏေ အာရဗ္ဘ နီဝရဏာ ဥပ္ပဇ္ဇန္တိ. (မူလံ ပုစ္ဆိတဗ္ဗံ) နီဝရဏေ အာရဗ္ဘ နီဝရဏိယာ စေဝ နော စ နီဝရဏာ ခန္ဓာ ဥပ္ပဇ္ဇန္တိ. (မူလံ ပုစ္ဆိတဗ္ဗံ) နီဝရဏေ အာရဗ္ဘ နီဝရဏာ စ သမ္ပယုတ္တကာ စ ခန္ဓာ ဥပ္ပဇ္ဇန္တိ. (၃)

နီဝရဏိယော စေဝ နော စ နီဝရဏော ဓမ္မော နီဝရဏိယဿ စေဝ နော စ နီဝရဏဿ ဓမ္မဿ အာရမ္မဏပစ္စယေန ပစ္စယော – ဒါနံ။ပေ။ သီလံ။ပေ။ ဥပေါသထကမ္မံ ကတွာ တံ ပစ္စဝေက္ခတိ၊ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ။ ဝိစိကိစ္ဆာ။ ဥဒ္ဓစ္စံ။ ဒေါမနဿံ ဥပ္ပဇ္ဇတိ၊ ပုဗ္ဗေ သုစိဏ္ဏာနိ။ပေ။ ဈာနာ။ပေ။ အရိယာ ဂေါတြဘုံ ပစ္စဝေက္ခန္တိ၊ ဝေါဒါနံ။ပေ။ ပဟီနေ ကိလေသေ ။ပေ။ ဝိက္ခမ္ဘိတေ ကိလေသေ။ပေ။ ပုဗ္ဗေ သမုဒါစိဏ္ဏေ။ပေ။ စက္ခုံ။ပေ။ ဝတ္ထုံ နီဝရဏိယေ စေဝ နော စ နီဝရဏေ ခန္ဓေ အနိစ္စတော။ပေ။ ဝိပဿတိ၊ အဿာဒေတိ အဘိနန္ဒတိ။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ။ပေ။ (ယာဝ အာဝဇ္ဇနာ တာဝ ကာတဗ္ဗာ). (၁)

နီဝရဏိယော စေဝ နော စ နီဝရဏော ဓမ္မော နီဝရဏဿ စေဝ နီဝရဏိယဿ စ ဓမ္မဿ အာရမ္မဏပစ္စယေန ပစ္စယော – ဒါနံ။ပေ။ သီလံ။ပေ။ ဥပေါသထကမ္မံ။ပေ။ ပုဗ္ဗေ သုစိဏ္ဏာနိ။ပေ။ ဈာနာ။ပေ။ စက္ခုံ။ပေ။ ဝတ္ထုံ နီဝရဏိယေ စေဝ နော စ နီဝရဏေ ခန္ဓေ အဿာဒေတိ အဘိနန္ဒတိ၊ တံ အာရဗ္ဘ ရာဂေါ။ပေ။ ဒိဋ္ဌိ။ ဝိစိကိစ္ဆာ။ ဥဒ္ဓစ္စံ။ ဒေါမနဿံ ဥပ္ပဇ္ဇတိ. (၂)

နီဝရဏိယော စေဝ နော စ နီဝရဏော ဓမ္မော နီဝရဏဿ စေဝ နီဝရဏိယဿ စ နီဝရဏိယဿ စေဝ နော စ နီဝရဏဿ စ ဓမ္မဿ အာရမ္မဏပစ္စယေန ပစ္စယော – ဒါနံ။ပေ။ သီလံ။ပေ။ ဥပေါသထကမ္မံ။ပေ။ ပုဗ္ဗေ သုစိဏ္ဏာနိ။ပေ။ ဈာနာ ။ပေ။ စက္ခုံ။ပေ။ ဝတ္ထုံ နီဝရဏိယေ စေဝ နော စ နီဝရဏေ ခန္ဓေ အဿာဒေတိ အဘိနန္ဒတိ၊ တံ အာရဗ္ဘ နီဝရဏာ စ သမ္ပယုတ္တကာ စ ခန္ဓာ ဥပ္ပဇ္ဇန္တိ (ဧဝံ ဣတရေပိ တီဏိ ကာတဗ္ဗာ). (၃)

(အာရမ္မဏသဒိသာ အဓိပတိပစ္စယာ၊ ပုရေဇာတမ္ပိ အာရမ္မဏသဒိသံ. ဥပနိဿယေပိ လောကုတ္တရံ န ကာတဗ္ဗံ. သံခိတ္တံ၊ ဧဝံ ဝိတ္ထာရေတဗ္ဗံ ယထာ နီဝရဏဒုကံ၊ ဧဝံ ပစ္စဝေက္ခိတွာ ကာတဗ္ဗံ.)

နီဝရဏနီဝရဏိယဒုကံ နိဋ္ဌိတံ.