၁. ဝိဘင်္ဂဝါရော

နဟေတုပစ္စယော

၆၂. နီဝရဏသမ္ပယုတ္တံ ဓမ္မံ ပစ္စယာ နီဝရဏသမ္ပယုတ္တော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပစ္စယာ အဝိဇ္ဇာနီဝရဏံ. (၁)

နီဝရဏဝိပ္ပယုတ္တံ ဓမ္မံ ပစ္စယာ နီဝရဏဝိပ္ပယုတ္တော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နီဝရဏဝိပ္ပယုတ္တံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ (ယာဝ အသညသတ္တာ)၊ စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ အဟေတုကာ နီဝရဏဝိပ္ပယုတ္တာ ခန္ဓာ. (၁)

နီဝရဏဝိပ္ပယုတ္တံ ဓမ္မံ ပစ္စယာ နီဝရဏသမ္ပယုတ္တော ဓမ္မော ဥပ္ပဇ္ဇတိ နဟေတုပစ္စယာ – ဝတ္ထုံ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၂)

နီဝရဏသမ္ပယုတ္တဉ္စ နီဝရဏဝိပ္ပယုတ္တဉ္စ ဓမ္မံ ပစ္စယာ နီဝရဏသမ္ပယုတ္တော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ ဝတ္ထုဉ္စ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော (သံခိတ္တံ). (၁)