၁. ဝိဘင်္ဂဝါရော

ဟေတုပစ္စယော

၁. နီဝရဏံ ဓမ္မံ ပဋိစ္စ နီဝရဏော ဓမ္မော ဥပ္ပဇ္ဇတိ ဟေတုပစ္စယာ – ကာမစ္ဆန္ဒနီဝရဏံ ပဋိစ္စ ထိနမိဒ္ဓနီဝရဏံ [ထီနမိဒ္ဓနီဝရဏံ (သျာ.)] ဥဒ္ဓစ္စနီဝရဏံ အဝိဇ္ဇာနီဝရဏံ၊ ကာမစ္ဆန္ဒနီဝရဏံ ပဋိစ္စ ဥဒ္ဓစ္စနီဝရဏံ အဝိဇ္ဇာနီဝရဏံ၊ ဗျာပါဒနီဝရဏံ ပဋိစ္စ ထိနမိဒ္ဓနီဝရဏံ ဥဒ္ဓစ္စနီဝရဏံ အဝိဇ္ဇာနီဝရဏံ၊ ဗျာပါဒနီဝရဏံ ပဋိစ္စ ဥဒ္ဓစ္စနီဝရဏံ အဝိဇ္ဇာနီဝရဏံ၊ ဗျာပါဒနီဝရဏံ ပဋိစ္စ ထိနမိဒ္ဓနီဝရဏံ ဥဒ္ဓစ္စနီဝရဏံ ကုက္ကုစ္စနီဝရဏံ အဝိဇ္ဇာနီဝရဏံ၊ ဗျာပါဒနီဝရဏံ ပဋိစ္စ ဥဒ္ဓစ္စနီဝရဏံ ကုက္ကုစ္စနီဝရဏံ အဝိဇ္ဇာနီဝရဏံ၊ ဝိစိကိစ္ဆာနီဝရဏံ ပဋိစ္စ ဥဒ္ဓစ္စနီဝရဏံ၊ ဥဒ္ဓစ္စနီဝရဏံ ပဋိစ္စ အဝိဇ္ဇာနီဝရဏံ. (၁)

နီဝရဏံ ဓမ္မံ ပဋိစ္စ နောနီဝရဏော ဓမ္မော ဥပ္ပဇ္ဇတိ ဟေတုပစ္စယာ – နီဝရဏေ ပဋိစ္စ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ. (၂)

နီဝရဏံ ဓမ္မံ ပဋိစ္စ နီဝရဏော စ နောနီဝရဏော စ ဓမ္မာ ဥပ္ပဇ္ဇန္တိ ဟေတုပစ္စယာ – ကာမစ္ဆန္ဒနီဝရဏံ ပဋိစ္စ ထိနမိဒ္ဓနီဝရဏံ ဥဒ္ဓစ္စနီဝရဏံ အဝိဇ္ဇာနီဝရဏံ သမ္ပယုတ္တကာ စ ခန္ဓာ စိတ္တသမုဋ္ဌာနဉ္စ ရူပံ (စက္ကံ). (၃)

၂. နောနီဝရဏံ ဓမ္မံ ပဋိစ္စ နောနီဝရဏော ဓမ္မော ဥပ္ပဇ္ဇတိ ဟေတုပစ္စယာ – နောနီဝရဏံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၁)

နောနီဝရဏံ ဓမ္မံ ပဋိစ္စ နီဝရဏော ဓမ္မော ဥပ္ပဇ္ဇတိ ဟေတုပစ္စယာ – နောနီဝရဏေ ခန္ဓေ ပဋိစ္စ နီဝရဏာ. (၂)

နောနီဝရဏံ ဓမ္မံ ပဋိစ္စ နီဝရဏော စ နောနီဝရဏော စ ဓမ္မာ ဥပ္ပဇ္ဇန္တိ ဟေတုပစ္စယာ – နောနီဝရဏံ ဧကံ ခန္ဓံ ပဋိစ္စ တယော ခန္ဓာ နီဝရဏာ စ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။. (၃)

၃. နီဝရဏဉ္စ နောနီဝရဏဉ္စ ဓမ္မံ ပဋိစ္စ နီဝရဏော ဓမ္မော ဥပ္ပဇ္ဇတိ ဟေတုပစ္စယာ – ကာမစ္ဆန္ဒနီဝရဏဉ္စ သမ္ပယုတ္တကေ စ ခန္ဓေ ပဋိစ္စ ထိနမိဒ္ဓနီဝရဏံ ဥဒ္ဓစ္စနီဝရဏံ အဝိဇ္ဇာနီဝရဏံ (စက္ကံ). (၁)

နီဝရဏဉ္စ နောနီဝရဏဉ္စ ဓမ္မံ ပဋိစ္စ နောနီဝရဏော ဓမ္မော ဥပ္ပဇ္ဇတိ ဟေတုပစ္စယာ – နောနီဝရဏံ ဧကံ ခန္ဓဉ္စ နီဝရဏဉ္စ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ စ။ပေ။ နီဝရဏေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. (၂)

နီဝရဏဉ္စ နောနီဝရဏဉ္စ ဓမ္မံ ပဋိစ္စ နီဝရဏော စ နောနီဝရဏော စ ဓမ္မာ ဥပ္ပဇ္ဇန္တိ ဟေတုပစ္စယာ – နောနီဝရဏံ ဧကံ ခန္ဓဉ္စ ကာမစ္ဆန္ဒနီဝရဏဉ္စ ပဋိစ္စ တယော ခန္ဓာ ထိနမိဒ္ဓနီဝရဏံ ဥဒ္ဓစ္စနီဝရဏံ အဝိဇ္ဇာနီဝရဏံ။ပေ။ ဒွေ ခန္ဓေ စ။ပေ။ (စက္ကံ. သံခိတ္တံ). (၃)