၁. ဝိဘင်္ဂဝါရော

ဟေတုပစ္စယော

၅၂. နီဝရဏသမ္ပယုတ္တံ ဓမ္မံ ပဋိစ္စ နီဝရဏသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – နီဝရဏသမ္ပယုတ္တံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။. (၁)

နီဝရဏသမ္ပယုတ္တံ ဓမ္မံ ပဋိစ္စ နီဝရဏဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – နီဝရဏသမ္ပယုတ္တေ ခန္ဓေ ပဋိစ္စ စိတ္တသမုဋ္ဌာနံ ရူပံ. (၂)

နီဝရဏသမ္ပယုတ္တံ ဓမ္မံ ပဋိစ္စ နီဝရဏသမ္ပယုတ္တော စ နီဝရဏဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – နီဝရဏသမ္ပယုတ္တံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။. (၃)

၅၃. နီဝရဏဝိပ္ပယုတ္တံ ဓမ္မံ ပဋိစ္စ နီဝရဏဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – နီဝရဏဝိပ္ပယုတ္တံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ (ယာဝ အဇ္ဈတ္တိကာ မဟာဘူတာ). (၁)

နီဝရဏသမ္ပယုတ္တဉ္စ နီဝရဏဝိပ္ပယုတ္တဉ္စ ဓမ္မံ ပဋိစ္စ နီဝရဏဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – နီဝရဏသမ္ပယုတ္တေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ (သံခိတ္တံ).