၁. ဝိဘင်္ဂဝါရော

နဟေတုပစ္စယော

၁၆. နီဝရဏံ ဓမ္မံ ပစ္စယာ နီဝရဏော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာနီဝရဏံ ပစ္စယာ အဝိဇ္ဇာနီဝရဏံ၊ ဥဒ္ဓစ္စနီဝရဏံ ပစ္စယာ အဝိဇ္ဇာနီဝရဏံ. (၁)

နောနီဝရဏံ ဓမ္မံ ပစ္စယာ နောနီဝရဏော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နောနီဝရဏံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ (ယာဝ အသညသတ္တာ) စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ အဟေတုကာ နောနီဝရဏာ ခန္ဓာ. (၁)

နောနီဝရဏံ ဓမ္မံ ပစ္စယာ နီဝရဏော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပစ္စယာ အဝိဇ္ဇာနီဝရဏံ၊ ဝတ္ထုံ ပစ္စယာ အဝိဇ္ဇာနီဝရဏံ. (၂)

၁၇. နီဝရဏဉ္စ နောနီဝရဏဉ္စ ဓမ္မံ ပစ္စယာ နီဝရဏော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာနီဝရဏဉ္စ သမ္ပယုတ္တကေ စ ခန္ဓေ ပစ္စယာ အဝိဇ္ဇာနီဝရဏံ၊ ဥဒ္ဓစ္စနီဝရဏဉ္စ သမ္ပယုတ္တကေ စ ခန္ဓေ ပစ္စယာ အဝိဇ္ဇာနီဝရဏံ၊ ဝိစိကိစ္ဆာနီဝရဏဉ္စ ဝတ္ထုဉ္စ ပစ္စယာ အဝိဇ္ဇာနီဝရဏံ၊ ဥဒ္ဓစ္စနီဝရဏဉ္စ ဝတ္ထုဉ္စ ပစ္စယာ အဝိဇ္ဇာနီဝရဏံ (သံခိတ္တံ). (၁)