၁. ဝိဘင်္ဂဝါရော

ဟေတုပစ္စယော

၁၃. နီဝရဏံ ဓမ္မံ ပစ္စယာ နီဝရဏော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

နောနီဝရဏံ ဓမ္မံ ပစ္စယာ နောနီဝရဏော ဓမ္မော ဥပ္ပဇ္ဇတိ ဟေတုပစ္စယာ – နောနီဝရဏံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ (ယာဝ အဇ္ဈတ္တိကာ မဟာဘူတာ)၊ ဝတ္ထုံ ပစ္စယာ နောနီဝရဏာ ခန္ဓာ. (၁)

နောနီဝရဏံ ဓမ္မံ ပစ္စယာ နီဝရဏော ဓမ္မော ဥပ္ပဇ္ဇတိ ဟေတုပစ္စယာ – နောနီဝရဏေ ခန္ဓေ ပစ္စယာ နီဝရဏာ၊ ဝတ္ထုံ ပစ္စယာ နီဝရဏာ. (၂)

နောနီဝရဏံ ဓမ္မံ ပစ္စယာ နီဝရဏော စ နောနီဝရဏော စ ဓမ္မာ ဥပ္ပဇ္ဇန္တိ ဟေတုပစ္စယာ – နောနီဝရဏံ ဧကံ ခန္ဓံ ပစ္စယာ တယော ခန္ဓာ နီဝရဏာ စ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဝတ္ထုံ ပစ္စယာ နီဝရဏာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ၊ ဝတ္ထုံ ပစ္စယာ နီဝရဏာ စ သမ္ပယုတ္တကာ စ ခန္ဓာ. (၃)

၁၄. နီဝရဏဉ္စ နောနီဝရဏဉ္စ ဓမ္မံ ပစ္စယာ နီဝရဏော ဓမ္မော ဥပ္ပဇ္ဇတိ ဟေတုပစ္စယာ – ကာမစ္ဆန္ဒနီဝရဏဉ္စ သမ္ပယုတ္တကေ စ ခန္ဓေ ပစ္စယာ ထိနမိဒ္ဓနီဝရဏံ ဥဒ္ဓစ္စနီဝရဏံ အဝိဇ္ဇာနီဝရဏံ (စက္ကံ). ကာမစ္ဆန္ဒနီဝရဏဉ္စ ဝတ္ထုဉ္စ ပစ္စယာ ထိနမိဒ္ဓနီဝရဏံ ဥဒ္ဓစ္စနီဝရဏံ အဝိဇ္ဇာနီဝရဏံ (စက္ကံ). (၁)

နီဝရဏဉ္စ နောနီဝရဏဉ္စ ဓမ္မံ ပစ္စယာ နောနီဝရဏော ဓမ္မော ဥပ္ပဇ္ဇတိ ဟေတုပစ္စယာ – နောနီဝရဏံ ဧကံ ခန္ဓဉ္စ နီဝရဏဉ္စ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ နီဝရဏဉ္စ ဝတ္ထုဉ္စ ပစ္စယာ သမ္ပယုတ္တကာ ခန္ဓာ၊ နီဝရဏဉ္စ သမ္ပယုတ္တကေ စ ခန္ဓေ ပစ္စယာ စိတ္တသမုဋ္ဌာနံ ရူပံ၊ နီဝရဏေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ. (၂)

နီဝရဏဉ္စ နောနီဝရဏဉ္စ ဓမ္မံ ပစ္စယာ နီဝရဏော စ နောနီဝရဏော စ ဓမ္မာ ဥပ္ပဇ္ဇန္တိ ဟေတုပစ္စယာ – နောနီဝရဏံ ဧကံ ခန္ဓဉ္စ ကာမစ္ဆန္ဒနီဝရဏဉ္စ ပစ္စယာ တယော ခန္ဓာ ထိနမိဒ္ဓနီဝရဏံ ဥဒ္ဓစ္စနီဝရဏံ အဝိဇ္ဇာနီဝရဏံ။ပေ။ ဒွေ ခန္ဓေ ။ပေ။ (စက္ကံ). ကာမစ္ဆန္ဒနီဝရဏဉ္စ ဝတ္ထုဉ္စ ပစ္စယာ ထိနမိဒ္ဓနီဝရဏံ ဥဒ္ဓစ္စနီဝရဏံ အဝိဇ္ဇာနီဝရဏံ သမ္ပယုတ္တကာ စ ခန္ဓာ (စက္ကံ. သံခိတ္တံ). (၃)