၁-၄. ပစ္စယစတုက္ကံ

ဟေတုပစ္စယော

၁၀၇. ဂန္ထဉ္စေဝ ဂန္ထသမ္ပယုတ္တဉ္စ ဓမ္မံ ပဋိစ္စ ဂန္ထော စေဝ ဂန္ထသမ္ပယုတ္တော စ ဓမ္မော ဥပ္ပဇ္ဇတိ ဟေတုပစ္စယာ – သီလဗ္ဗတပရာမာသံ ကာယဂန္ထံ ပဋိစ္စ အဘိဇ္ဈာကာယဂန္ထော၊ အဘိဇ္ဈာကာယဂန္ထံ ပဋိစ္စ သီလဗ္ဗတပရာမာသော ကာယဂန္ထော၊ ဣဒံသစ္စာဘိနိဝေသကာယဂန္ထံ ပဋိစ္စ အဘိဇ္ဈာကာယဂန္ထော၊ အဘိဇ္ဈာကာယဂန္ထံ ပဋိစ္စ ဣဒံသစ္စာဘိနိဝေသော ကာယဂန္ထော. (၁)

ဂန္ထဉ္စေဝ ဂန္ထသမ္ပယုတ္တဉ္စ ဓမ္မံ ပဋိစ္စ ဂန္ထသမ္ပယုတ္တော စေဝ နော စ ဂန္ထော ဓမ္မော ဥပ္ပဇ္ဇတိ ဟေတုပစ္စယာ – ဂန္ထေ ပဋိစ္စ သမ္ပယုတ္တကာ ခန္ဓာ. (၂)

ဂန္ထဉ္စေဝ ဂန္ထသမ္ပယုတ္တဉ္စ ဓမ္မံ ပဋိစ္စ ဂန္ထော စေဝ ဂန္ထသမ္ပယုတ္တော စ ဂန္ထသမ္ပယုတ္တော စေဝ နော စ ဂန္ထော စ ဓမ္မာ ဥပ္ပဇ္ဇန္တိ ဟေတုပစ္စယာ – သီလဗ္ဗတပရာမာသံ ကာယဂန္ထံ ပဋိစ္စ အဘိဇ္ဈာကာယဂန္ထော သမ္ပယုတ္တကာ စ ခန္ဓာ (စက္ကံ). (၃)

၁၀၈. ဂန္ထသမ္ပယုတ္တဉ္စေဝ နော စ ဂန္ထံ ဓမ္မံ ပဋိစ္စ ဂန္ထသမ္ပယုတ္တော စေဝ နော စ ဂန္ထော ဓမ္မော ဥပ္ပဇ္ဇတိ ဟေတုပစ္စယာ – ဂန္ထသမ္ပယုတ္တဉ္စေဝ နော စ ဂန္ထံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။. (၁)

ဂန္ထသမ္ပယုတ္တဉ္စေဝ နော စ ဂန္ထံ ဓမ္မံ ပဋိစ္စ ဂန္ထော စေဝ ဂန္ထသမ္ပယုတ္တော စ ဓမ္မော ဥပ္ပဇ္ဇတိ ဟေတုပစ္စယာ – ဂန္ထသမ္ပယုတ္တေ စေဝ နော စ ဂန္ထေ ခန္ဓေ ပဋိစ္စ ဂန္ထာ. (၂)

ဂန္ထသမ္ပယုတ္တဉ္စေဝ နော စ ဂန္ထံ ဓမ္မံ ပဋိစ္စ ဂန္ထော စေဝ ဂန္ထသမ္ပယုတ္တော စ ဂန္ထသမ္ပယုတ္တော စေဝ နော စ ဂန္ထော စ ဓမ္မာ ဥပ္ပဇ္ဇန္တိ ဟေတုပစ္စယာ – ဂန္ထသမ္ပယုတ္တဉ္စေဝ နော စ ဂန္ထံ ဧကံ ခန္ဓံ ပဋိစ္စ တယော ခန္ဓာ ဂန္ထာ စ။ပေ။ ဒွေ ခန္ဓေ။ပေ။. (၃)

၁၀၉. ဂန္ထဉ္စေဝ ဂန္ထသမ္ပယုတ္တဉ္စ ဂန္ထသမ္ပယုတ္တဉ္စေဝ နော စ ဂန္ထဉ္စ ဓမ္မံ ပဋိစ္စ ဂန္ထော စေဝ ဂန္ထသမ္ပယုတ္တော စ ဓမ္မော ဥပ္ပဇ္ဇတိ ဟေတုပစ္စယာ – ဂန္ထေ စ သမ္ပယုတ္တကေ စ ခန္ဓေ ပဋိစ္စ ဂန္ထာ. (၁)

ဂန္ထဉ္စေဝ ဂန္ထသမ္ပယုတ္တဉ္စ ဂန္ထသမ္ပယုတ္တဉ္စေဝ နော စ ဂန္ထဉ္စ ဓမ္မံ ပဋိစ္စ ဂန္ထသမ္ပယုတ္တော စေဝ နော စ ဂန္ထော ဓမ္မော ဥပ္ပဇ္ဇတိ ဟေတုပစ္စယာ – ဂန္ထသမ္ပယုတ္တဉ္စေဝ နော စ ဂန္ထံ ဧကံ ခန္ဓဉ္စ ဂန္ထေ စ ပဋိစ္စ တယော ခန္ဓာ။ပေ။ ဒွေ ခန္ဓေ စ။ပေ။. (၂)

ဂန္ထဉ္စေဝ ဂန္ထသမ္ပယုတ္တဉ္စ ဂန္ထသမ္ပယုတ္တဉ္စေဝ နော စ ဂန္ထဉ္စ ဓမ္မံ ပဋိစ္စ ဂန္ထော စေဝ ဂန္ထသမ္ပယုတ္တော စ ဂန္ထသမ္ပယုတ္တော စေဝ နော စ ဂန္ထော စ ဓမ္မာ ဥပ္ပဇ္ဇန္တိ ဟေတုပစ္စယာ – ဂန္ထသမ္ပယုတ္တဉ္စေဝ နော စ ဂန္ထံ ဧကံ ခန္ဓဉ္စ သီလဗ္ဗတပရာမာသံ ကာယဂန္ထဉ္စ ပဋိစ္စ တယော ခန္ဓာ အဘိဇ္ဈာကာယဂန္ထော စ။ပေ။ ဒွေ ခန္ဓေ စ။ပေ။ (စက္ကံ ဗန္ဓိတဗ္ဗံ. သံခိတ္တံ). (၃)

၁၁၀. ဟေတုယာ နဝ၊ အာရမ္မဏေ နဝ (သဗ္ဗတ္ထ နဝ)၊ ကမ္မေ နဝ၊ အာဟာရေ နဝ။ပေ။ အဝိဂတေ နဝ.

အနုလောမံ.