၁. ဝိဘင်္ဂဝါရော

နဟေတုပစ္စယော

၅. နောဂန္ထံ ဓမ္မံ ပဋိစ္စ နောဂန္ထော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နောဂန္ထံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ အဟေတုကပဋိသန္ဓိက္ခဏေ (ယာဝ အသညသတ္တာ)၊ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

နအာရမ္မဏပစ္စယာဒိ

၆. ဂန္ထံ ဓမ္မံ ပဋိစ္စ နောဂန္ထော ဓမ္မော ဥပ္ပဇ္ဇတိ နအာရမ္မဏပစ္စယာ – ဂန္ထေ ပဋိစ္စ စိတ္တသမုဋ္ဌာနံ ရူပံ. (၁)

နောဂန္ထံ ဓမ္မံ ပဋိစ္စ နောဂန္ထော ဓမ္မော ဥပ္ပဇ္ဇတိ နအာရမ္မဏပစ္စယာ – နောဂန္ထေ ခန္ဓေ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။ (ယာဝ အသညသတ္တာ). (၁)

ဂန္ထဉ္စ နောဂန္ထဉ္စ ဓမ္မံ ပဋိစ္စ နောဂန္ထော ဓမ္မော ဥပ္ပဇ္ဇတိ နအာရမ္မဏပစ္စယာ – ဂန္ထေ စ သမ္ပယုတ္တကေ စ ခန္ဓေ ပဋိစ္စ စိတ္တသမုဋ္ဌာနံ ရူပံ (သံခိတ္တံ).

နအဓိပတိပစ္စယာ။ နဝ၊ နအနန္တရပစ္စယာ။ တီဏိ၊ နသမနန္တရပစ္စယာ။ တီဏိ၊ နအညမညပစ္စယာ။ တီဏိ၊ နဥပနိဿယပစ္စယာ။ တီဏိ.

နပုရေဇာတပစ္စယာဒိ

၇. ဂန္ထံ ဓမ္မံ ပဋိစ္စ ဂန္ထော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ ဣဒံသစ္စာဘိနိဝေသံ ကာယဂန္ထံ ပဋိစ္စ အဘိဇ္ဈာကာယဂန္ထော၊ အဘိဇ္ဈာကာယဂန္ထံ ပဋိစ္စ ဣဒံသစ္စာဘိနိဝေသော ကာယဂန္ထော (အရူပေ သီလဗ္ဗတပရာမာသော နတ္ထိ၊ ဧဝံ နဝ ပဉှာ ကာတဗ္ဗာ)၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ တီဏိ၊ နဝိပါကေ နဝ၊ နအာဟာရေ ဧကံ၊ နဣန္ဒြိယေ ဧကံ၊ နဈာနေ ဧကံ၊ နမဂ္ဂေ ဧကံ၊ နသမ္ပယုတ္တေ တီဏိ၊ နဝိပ္ပယုတ္တေ နဝ၊ နောနတ္ထိယာ တီဏိ၊ နောဝိဂတေ တီဏိ.