၁. ဝိဘင်္ဂဝါရော

ဟေတုပစ္စယော

၁၀၄. ဂန္ထော စေဝ ဂန္ထနိယော စ ဓမ္မော ဂန္ထဿ စေဝ ဂန္ထနိယဿ စ ဓမ္မဿ ဟေတုပစ္စယေန ပစ္စယော – ဂန္ထာ ဟေတူ သမ္ပယုတ္တကာနံ ဂန္ထာနံ ဟေတုပစ္စယေန ပစ္စယော (ဧဝံ နဝ ပဉှာ ဝိတ္ထာရေတဗ္ဗာ).

အာရမ္မဏပစ္စယော

၁၀၅. ဂန္ထော စေဝ ဂန္ထနိယော စ ဓမ္မော ဂန္ထဿ စေဝ ဂန္ထနိယဿ စ ဓမ္မဿ အာရမ္မဏပစ္စယေန ပစ္စယော – ဂန္ထေ အာရဗ္ဘ ဂန္ထာ ဥပ္ပဇ္ဇန္တိ. (မူလံ ပုစ္ဆိတဗ္ဗံ) ဂန္ထေ အာရဗ္ဘ ဂန္ထနိယာ စေဝ နော စ ဂန္ထာ ခန္ဓာ ဥပ္ပဇ္ဇန္တိ. (မူလံ ပုစ္ဆိတဗ္ဗံ) ဂန္ထေ အာရဗ္ဘ ဂန္ထာ စ သမ္ပယုတ္တကာ စ ခန္ဓာ ဥပ္ပဇ္ဇန္တိ. (၃)

၁၀၆. ဂန္ထနိယော စေဝ နော စ ဂန္ထော ဓမ္မော ဂန္ထနိယဿ စေဝ နော စ ဂန္ထဿ စ ဓမ္မဿ အာရမ္မဏပစ္စယေန ပစ္စယော – ဒါနံ။ပေ။ သီလံ။ပေ။ ဥပေါသထကမ္မံ ကတွာ တံ ပစ္စဝေက္ခတိ၊ ပုဗ္ဗေ သုစိဏ္ဏာနိ။ပေ။ ဈာနာ။ပေ။ အရိယာ ဂေါတြဘုံ ပစ္စဝေက္ခန္တိ၊ ဝေါဒါနံ ပစ္စဝေက္ခန္တိ၊ ပဟီနေ ကိလေသေ။ပေ။ ဝိက္ခမ္ဘိတေ ကိလေသေ ပစ္စဝေက္ခန္တိ၊ ပုဗ္ဗေ သမုဒါစိဏ္ဏေ ကိလေသေ ဇာနန္တိ၊ စက္ခုံ။ပေ။ ဝတ္ထုံ ဂန္ထနိယေ စေဝ နော စ ဂန္ထေ ခန္ဓေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. (သဗ္ဗံ ဝိတ္ထာရေတဗ္ဗံ) အာဝဇ္ဇနာယ အာရမ္မဏပစ္စယေန ပစ္စယော. (၁)

ဂန္ထနိယော စေဝ နော စ ဂန္ထော ဓမ္မော ဂန္ထဿ စေဝ ဂန္ထနိယဿ စ ဓမ္မဿ အာရမ္မဏပစ္စယေန ပစ္စယော – ဒါနံ။ပေ။ သီလံ။ပေ။ ဥပေါသထကမ္မံ ကတွာ တံ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ။ပေ။ ဝိစိကိစ္ဆာ။ပေ။ ဒေါမနဿံ ဥပ္ပဇ္ဇတိ၊ ပုဗ္ဗေ သုစိဏ္ဏာနိ။ပေ။ ဈာနာ ဝုဋ္ဌဟိတွာ ဈာနံ။ပေ။ စက္ခုံ။ပေ။ ဝတ္ထုံ ဂန္ထနိယေ စေဝ နော စ ဂန္ထေ ခန္ဓေ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ။ပေ။ ဒေါမနဿံ ဥပ္ပဇ္ဇတိ. (၂)

ဂန္ထနိယော စေဝ နော စ ဂန္ထော ဓမ္မော ဂန္ထဿ စေဝ ဂန္ထနိယဿ စ ဂန္ထနိယဿ စေဝ နော စ ဂန္ထဿ စ ဓမ္မဿ အာရမ္မဏပစ္စယေန ပစ္စယော – ဒါနံ။ပေ။ သီလံ။ပေ။ ဥပေါသထကမ္မံ။ပေ။ ပုဗ္ဗေ သုစိဏ္ဏာနိ။ပေ။ ဈာနာ ဝုဋ္ဌဟိတွာ ဈာနံ။ပေ။ စက္ခုံ။ပေ။ ဝတ္ထုံ ဂန္ထနိယေ စေဝ နော စ ဂန္ထေ ခန္ဓေ အဿာဒေတိ အဘိနန္ဒတိ၊ တံ အာရဗ္ဘ ဂန္ထာ စ သမ္ပယုတ္တကာ စ ခန္ဓာ ဥပ္ပဇ္ဇန္တိ (ဧဝံ ဣတရေပိ တီဏိ ဝိတ္ထာရေတဗ္ဗာ). (၃)

(အာရဗ္ဘ ကာတဗ္ဗာ. ဣမသ္မိံ ဒုကေ လောကုတ္တရံ နတ္ထိ၊ ဂန္ထဒုကသဒိသံ၊ နိန္နာနာကရဏံ. ‘‘ဂန္ထနိယ’’န္တိ နိယာမေတဗ္ဗံ၊ မဂ္ဂေ နဝ ပဉှာ ကာတဗ္ဗာ.)

ဂန္ထဂန္ထနိယဒုကံ နိဋ္ဌိတံ.