၁. ပဋိစ္စဝါရော

ဟေတုပစ္စယော

၁၀၃. ဂန္ထဉ္စေဝ ဂန္ထနိယဉ္စ ဓမ္မံ ပဋိစ္စ ဂန္ထော စေဝ ဂန္ထနိယော စ ဓမ္မော ဥပ္ပဇ္ဇတိ ဟေတုပစ္စယာ – သီလဗ္ဗတပရာမာသံ ကာယဂန္ထံ ပဋိစ္စ အဘိဇ္ဈာကာယဂန္ထော၊ အဘိဇ္ဈာကာယဂန္ထံ ပဋိစ္စ သီလဗ္ဗတပရာမာသော ကာယဂန္ထော၊ ဣဒံသစ္စာဘိနိဝေသကာယဂန္ထံ ပဋိစ္စ အဘိဇ္ဈာကာယဂန္ထော၊ အဘိဇ္ဈာကာယဂန္ထံ ပဋိစ္စ ဣဒံသစ္စာဘိနိဝေသကာယဂန္ထော. (၁)

ဂန္ထဉ္စေဝ ဂန္ထနိယဉ္စ ဓမ္မံ ပဋိစ္စ ဂန္ထနိယော စေဝ နော စ ဂန္ထော ဓမ္မော ဥပ္ပဇ္ဇတိ ဟေတုပစ္စယာ – ဂန္ထေ ပဋိစ္စ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ. (၂)

ဂန္ထဉ္စေဝ ဂန္ထနိယဉ္စ ဓမ္မံ ပဋိစ္စ ဂန္ထော စေဝ ဂန္ထနိယော စ ဂန္ထနိယော စေဝ နော စ ဂန္ထော စ ဓမ္မာ ဥပ္ပဇ္ဇန္တိ ဟေတုပစ္စယာ. (၁)