၁. ဝိဘင်္ဂဝါရော

ဟေတုပစ္စယော

၆၉. ဂန္ထသမ္ပယုတ္တော ဓမ္မော ဂန္ထသမ္ပယုတ္တဿ ဓမ္မဿ ဟေတုပစ္စယေန ပစ္စယော – ဂန္ထသမ္ပယုတ္တာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. (၁)

ဂန္ထသမ္ပယုတ္တော ဓမ္မော ဂန္ထဝိပ္ပယုတ္တဿ ဓမ္မဿ ဟေတုပစ္စယေန ပစ္စယော – ဂန္ထသမ္ပယုတ္တာ ဟေတူ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော၊ ဒိဋ္ဌိဂတဝိပ္ပယုတ္တလောဘသဟဂတော ဟေတု လောဘဿ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ဒေါမနဿသဟဂတော ဟေတု ပဋိဃဿ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၂)

ဂန္ထသမ္ပယုတ္တော ဓမ္မော ဂန္ထသမ္ပယုတ္တဿ စ ဂန္ထဝိပ္ပယုတ္တဿ စ ဓမ္မဿ ဟေတုပစ္စယေန ပစ္စယော – ဂန္ထသမ္ပယုတ္တာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ဒိဋ္ဌိဂတဝိပ္ပယုတ္တလောဘသဟဂတော ဟေတု သမ္ပယုတ္တကာနံ ခန္ဓာနံ လောဘဿ စ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ဒေါမနဿသဟဂတော ဟေတု သမ္ပယုတ္တကာနံ ခန္ဓာနံ ပဋိဃဿ စ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၃)

၇၀. ဂန္ထဝိပ္ပယုတ္တော ဓမ္မော ဂန္ထဝိပ္ပယုတ္တဿ ဓမ္မဿ ဟေတုပစ္စယေန ပစ္စယော – ဂန္ထဝိပ္ပယုတ္တာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ဒိဋ္ဌိဂတဝိပ္ပယုတ္တော လောဘော စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော၊ ပဋိဃံ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၁)

ဂန္ထဝိပ္ပယုတ္တော ဓမ္မော ဂန္ထသမ္ပယုတ္တဿ ဓမ္မဿ ဟေတုပစ္စယေန ပစ္စယော – ဒိဋ္ဌိဂတဝိပ္ပယုတ္တော လောဘော သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော၊ ပဋိဃံ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. (၂)

ဂန္ထဝိပ္ပယုတ္တော ဓမ္မော ဂန္ထသမ္ပယုတ္တဿ စ ဂန္ထဝိပ္ပယုတ္တဿ စ ဓမ္မဿ ဟေတုပစ္စယေန ပစ္စယော – ဒိဋ္ဌိဂတဝိပ္ပယုတ္တော လောဘော သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိဃံ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၃)

၇၁. ဂန္ထသမ္ပယုတ္တော စ ဂန္ထဝိပ္ပယုတ္တော စ ဓမ္မာ ဂန္ထသမ္ပယုတ္တဿ ဓမ္မဿ ဟေတုပစ္စယေန ပစ္စယော – ဒိဋ္ဌိဂတဝိပ္ပယုတ္တလောဘသဟဂတော ဟေတု စ လောဘော စ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော၊ ဒေါမနဿသဟဂတော ဟေတု စ ပဋိဃဉ္စ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. (၁)

ဂန္ထသမ္ပယုတ္တော စ ဂန္ထဝိပ္ပယုတ္တော စ ဓမ္မာ ဂန္ထဝိပ္ပယုတ္တဿ ဓမ္မဿ ဟေတုပစ္စယေန ပစ္စယော – ဒိဋ္ဌိဂတဝိပ္ပယုတ္တလောဘသဟဂတော ဟေတု စ လောဘော စ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော၊ ဒေါမနဿသဟဂတော ဟေတု စ ပဋိဃဉ္စ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော. (၂)

ဂန္ထသမ္ပယုတ္တော စ ဂန္ထဝိပ္ပယုတ္တော စ ဓမ္မာ ဂန္ထသမ္ပယုတ္တဿ စ ဂန္ထဝိပ္ပယုတ္တဿ စ ဓမ္မဿ ဟေတုပစ္စယေန ပစ္စယော – ဒိဋ္ဌိဂတဝိပ္ပယုတ္တလောဘသဟဂတော ဟေတု စ လောဘော စ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ဒေါမနဿသဟဂတော ဟေတု စ ပဋိဃဉ္စ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၃)

အာရမ္မဏပစ္စယော

၇၂. ဂန္ထသမ္ပယုတ္တော ဓမ္မော ဂန္ထသမ္ပယုတ္တဿ ဓမ္မဿ အာရမ္မဏပစ္စယေန ပစ္စယော – ဂန္ထသမ္ပယုတ္တေ ခန္ဓေ အာရဗ္ဘ ဂန္ထသမ္ပယုတ္တကာ ခန္ဓာ ဥပ္ပဇ္ဇန္တိ. (တီသုပိ မူလာ ပုစ္ဆိတဗ္ဗာ) ဂန္ထသမ္ပယုတ္တေ ခန္ဓေ အာရဗ္ဘ ဂန္ထဝိပ္ပယုတ္တာ ခန္ဓာ ဥပ္ပဇ္ဇန္တိ၊ ဂန္ထသမ္ပယုတ္တေ ခန္ဓေ အာရဗ္ဘ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဥပ္ပဇ္ဇန္တိ၊ ဒေါမနဿသဟဂတာ ခန္ဓာ စ ပဋိဃဉ္စ ဥပ္ပဇ္ဇန္တိ. (၃)

၇၃. ဂန္ထဝိပ္ပယုတ္တော ဓမ္မော ဂန္ထဝိပ္ပယုတ္တဿ ဓမ္မဿ အာရမ္မဏပစ္စယေန ပစ္စယော – ဒါနံ ဒတွာ သီလံ။ပေ။ ဥပေါသထကမ္မံ ကတွာ တံ ပစ္စဝေက္ခတိ၊ ပုဗ္ဗေ သုစိဏ္ဏာနိ ပစ္စဝေက္ခတိ၊ ဈာနာ ဝုဋ္ဌဟိတွာ ဈာနံ ပစ္စဝေက္ခတိ၊ အရိယာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ၊ ဖလံ ပစ္စဝေက္ခန္တိ၊ နိဗ္ဗာနံ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ၊ အာဝဇ္ဇနာယ အာရမ္မဏပစ္စယေန ပစ္စယော၊ အရိယာ ဂန္ထဝိပ္ပယုတ္တေ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ ကိလေသေ ပစ္စဝေက္ခန္တိ၊ ပုဗ္ဗေ သမုဒါစိဏ္ဏေ ကိလေသေ ဇာနန္တိ၊ စက္ခုံ။ပေ။ ဝတ္ထုံ ဂန္ထဝိပ္ပယုတ္တေ ခန္ဓေ စ လောဘဉ္စ ပဋိဃဉ္စ အနိစ္စတော။ပေ။ ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ ဂန္ထဝိပ္ပယုတ္တော ရာဂေါ ဥပ္ပဇ္ဇတိ၊ ဝိစိကိစ္ဆာ။ပေ။ ဥဒ္ဓစ္စံ။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ၊ စေတောပရိယဉာဏေန ဂန္ထဝိပ္ပယုတ္တစိတ္တသမင်္ဂိဿ စိတ္တံ ဇာနာတိ၊ အာကာသာနဉ္စာယတနံ ဝိညာဏဉ္စာယတနဿ။ပေ။ အာကိဉ္စညာယတနံ နေဝသညာနာသညာယတနဿ။ပေ။ ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။ ဂန္ထဝိပ္ပယုတ္တာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၁)

ဂန္ထဝိပ္ပယုတ္တော ဓမ္မော ဂန္ထသမ္ပယုတ္တဿ ဓမ္မဿ အာရမ္မဏပစ္စယေန ပစ္စယော – ဒါနံ ဒတွာ သီလံ။ပေ။ ဥပေါသထကမ္မံ။ပေ။ ပုဗ္ဗေ။ပေ။ ဈာနာ။ပေ။ တံ အဿာဒေတိ အဘိနန္ဒတိ၊ တံ အာရဗ္ဘ ဂန္ထသမ္ပယုတ္တော ရာဂေါ ဥပ္ပဇ္ဇတိ။ ဒိဋ္ဌိ ဥပ္ပဇ္ဇတိ။ ဒေါမနဿံ ဥပ္ပဇ္ဇတိ (သံခိတ္တံ). (၂)

ဂန္ထဝိပ္ပယုတ္တော ဓမ္မော ဂန္ထသမ္ပယုတ္တဿ စ ဂန္ထဝိပ္ပယုတ္တဿ စ ဓမ္မဿ အာရမ္မဏပစ္စယေန ပစ္စယော – စက္ခုံ။ပေ။ ဝတ္ထုံ ဂန္ထဝိပ္ပယုတ္တေ ခန္ဓေ စ လောဘဉ္စ ပဋိဃဉ္စ အာရဗ္ဘ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဒေါမနဿသဟဂတာ ခန္ဓာ စ ပဋိဃဉ္စ ဥပ္ပဇ္ဇန္တိ. (၃)

၇၄. ဂန္ထသမ္ပယုတ္တော စ ဂန္ထဝိပ္ပယုတ္တော စ ဓမ္မာ ဂန္ထသမ္ပယုတ္တဿ ဓမ္မဿ အာရမ္မဏပစ္စယေန ပစ္စယော – ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ စ လောဘဉ္စ ဒေါမနဿသဟဂတေ ခန္ဓေ စ ပဋိဃဉ္စ အာရဗ္ဘ ဂန္ထသမ္ပယုတ္တကာ ခန္ဓာ ဥပ္ပဇ္ဇန္တိ. (မူလံ ပုစ္ဆိတဗ္ဗံ) ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ စ လောဘဉ္စ ဒေါမနဿသဟဂတေ ခန္ဓေ စ ပဋိဃဉ္စ အာရဗ္ဘ ဂန္ထဝိပ္ပယုတ္တာ ခန္ဓာ ဥပ္ပဇ္ဇန္တိ၊ ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ စ လောဘဉ္စ ဒေါမနဿသဟဂတေ ခန္ဓေ စ ပဋိဃဉ္စ အာရဗ္ဘ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဒေါမနဿသဟဂတာ ခန္ဓာ စ ပဋိဃဉ္စ ဥပ္ပဇ္ဇန္တိ. (၃)

အဓိပတိပစ္စယော

၇၅. ဂန္ထသမ္ပယုတ္တော ဓမ္မော ဂန္ထသမ္ပယုတ္တဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဂန္ထသမ္ပယုတ္တေ ခန္ဓေ ဂရုံ ကတွာ ဂန္ထသမ္ပယုတ္တကာ ခန္ဓာ ဥပ္ပဇ္ဇန္တိ. သဟဇာတာဓိပတိ – ဂန္ထသမ္ပယုတ္တာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော. (၁)

ဂန္ထသမ္ပယုတ္တော ဓမ္မော ဂန္ထဝိပ္ပယုတ္တဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဂန္ထသမ္ပယုတ္တေ ခန္ဓေ ဂရုံ ကတွာ ဒိဋ္ဌိဂတဝိပ္ပယုတ္တော လောဘော ဥပ္ပဇ္ဇတိ. သဟဇာတာဓိပတိ – ဂန္ထသမ္ပယုတ္တာဓိပတိ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော၊ ဒိဋ္ဌိဂတဝိပ္ပယုတ္တလောဘသဟဂတာဓိပတိ လောဘဿ စ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော၊ ဒေါမနဿသဟဂတာဓိပတိ ပဋိဃဿ စ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၂)

ဂန္ထသမ္ပယုတ္တော ဓမ္မော ဂန္ထသမ္ပယုတ္တဿ စ ဂန္ထဝိပ္ပယုတ္တဿ စ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဂန္ထသမ္ပယုတ္တေ ခန္ဓေ ဂရုံ ကတွာ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဥပ္ပဇ္ဇန္တိ. သဟဇာတာဓိပတိ – ဒိဋ္ဌိဂတဝိပ္ပယုတ္တလောဘသဟဂတာဓိပတိ သမ္ပယုတ္တကာနံ ခန္ဓာနံ လောဘဿ စ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော၊ ဒေါမနဿသဟဂတာဓိပတိ သမ္ပယုတ္တကာနံ ခန္ဓာနံ ပဋိဃဿ စ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော.(၃)

၇၆. ဂန္ထဝိပ္ပယုတ္တော ဓမ္မော ဂန္ထဝိပ္ပယုတ္တဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဒါနံ။ပေ။ သီလံ။ပေ။ ဥပေါသထကမ္မံ ကတွာ တံ ဂရုံ ကတွာ ပစ္စဝေက္ခတိ၊ ပုဗ္ဗေ သုစိဏ္ဏာနိ ဂရုံ ကတွာ ပစ္စဝေက္ခတိ၊ ဈာနာ ဝုဋ္ဌဟိတွာ ဈာနံ ဂရုံ ကတွာ ပစ္စဝေက္ခတိ၊ အရိယာ မဂ္ဂါ ဝုဋ္ဌဟိတွာ မဂ္ဂံ ဂရုံ ကတွာ ပစ္စဝေက္ခန္တိ၊ ဖလာ ဝုဋ္ဌဟိတွာ ဖလံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ အဓိပတိပစ္စယေန ပစ္စယော၊ စက္ခုံ။ပေ။ ဝတ္ထုံ ဂန္ထဝိပ္ပယုတ္တေ ခန္ဓေ စ လောဘဉ္စ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ဂန္ထဝိပ္ပယုတ္တော ရာဂေါ ဥပ္ပဇ္ဇတိ. သဟဇာတာဓိပတိ – ဂန္ထဝိပ္ပယုတ္တာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၁)

ဂန္ထဝိပ္ပယုတ္တော ဓမ္မော ဂန္ထသမ္ပယုတ္တဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – ဒါနံ။ပေ။ သီလံ။ပေ။ ဥပေါသထကမ္မံ။ပေ။ ပုဗ္ဗေ သုစိဏ္ဏာနိ။ပေ။ ဈာနာ ဝုဋ္ဌဟိတွာ ဈာနံ။ပေ။ စက္ခုံ။ပေ။ ဝတ္ထုံ ဂန္ထဝိပ္ပယုတ္တေ ခန္ဓေ စ လောဘဉ္စ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ဂန္ထသမ္ပယုတ္တော ရာဂေါ ဥပ္ပဇ္ဇတိ။ ဒိဋ္ဌိ ဥပ္ပဇ္ဇတိ. (၂)

ဂန္ထဝိပ္ပယုတ္တော ဓမ္မော ဂန္ထသမ္ပယုတ္တဿ စ ဂန္ထဝိပ္ပယုတ္တဿ စ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – စက္ခုံ။ပေ။ ဝတ္ထုံ ဂန္ထဝိပ္ပယုတ္တေ ခန္ဓေ စ လောဘဉ္စ ဂရုံ ကတွာ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဥပ္ပဇ္ဇန္တိ. (၃)

၇၇. ဂန္ထသမ္ပယုတ္တော စ ဂန္ထဝိပ္ပယုတ္တော စ ဓမ္မာ ဂန္ထသမ္ပယုတ္တဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ စ လောဘဉ္စ ဂရုံ ကတွာ ဂန္ထသမ္ပယုတ္တကာ ခန္ဓာ ဥပ္ပဇ္ဇန္တိ. (မူလာ ပုစ္ဆိတဗ္ဗာ) ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ စ လောဘဉ္စ ဂရုံ ကတွာ ဒိဋ္ဌိဂတဝိပ္ပယုတ္တော လောဘော ဥပ္ပဇ္ဇတိ. (မူလာ ပုစ္ဆိတဗ္ဗာ) ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ စ လောဘဉ္စ ဂရုံ ကတွာ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဥပ္ပဇ္ဇန္တိ. (၃)

အနန္တရပစ္စယော

၇၈. ဂန္ထသမ္ပယုတ္တော ဓမ္မော ဂန္ထသမ္ပယုတ္တဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဂန္ထသမ္ပယုတ္တာ ခန္ဓာ ပစ္ဆိမာနံ ပစ္ဆိမာနံ ဂန္ထသမ္ပယုတ္တကာနံ ခန္ဓာနံ အနန္တရပစ္စယေန ပစ္စယော. (မူလာ ပုစ္ဆိတဗ္ဗာ) ပုရိမာ ပုရိမာ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ ပစ္ဆိမဿ ပစ္ဆိမဿ ဒိဋ္ဌိဂတဝိပ္ပယုတ္တဿ လောဘဿ အနန္တရပစ္စယေန ပစ္စယော၊ ပုရိမာ ပုရိမာ ဒေါမနဿသဟဂတာ ခန္ဓာ ပစ္ဆိမဿ ပစ္ဆိမဿ ပဋိဃဿ အနန္တရပစ္စယေန ပစ္စယော၊ ဂန္ထသမ္ပယုတ္တာ ခန္ဓာ ဝုဋ္ဌာနဿ အနန္တရပစ္စယေန ပစ္စယော. (မူလာ ပုစ္ဆိတဗ္ဗာ) ပုရိမာ ပုရိမာ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ ပစ္ဆိမာနံ ပစ္ဆိမာနံ ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ လောဘဿ စ အနန္တရပစ္စယေန ပစ္စယော၊ ပုရိမာ ပုရိမာ ဒေါမနဿသဟဂတာ ခန္ဓာ ပစ္ဆိမာနံ ပစ္ဆိမာနံ ဒေါမနဿသဟဂတာနံ ခန္ဓာနံ ပဋိဃဿ စ အနန္တရပစ္စယေန ပစ္စယော. (၃)

၇၉. ဂန္ထဝိပ္ပယုတ္တော ဓမ္မော ဂန္ထဝိပ္ပယုတ္တဿ ဓမ္မဿ အနန္တရပစ္စယေန ပစ္စယော – ပုရိမော ပုရိမော ဒိဋ္ဌိဂတဝိပ္ပယုတ္တော လောဘော ပစ္ဆိမဿ ပစ္ဆိမဿ ဒိဋ္ဌိဂတဝိပ္ပယုတ္တဿ လောဘဿ အနန္တရပစ္စယေန ပစ္စယော၊ ပုရိမံ ပုရိမံ ပဋိဃံ ပစ္ဆိမဿ ပစ္ဆိမဿ ပဋိဃဿ အနန္တရပစ္စယေန ပစ္စယော၊ ပုရိမာ ပုရိမာ ဂန္ထဝိပ္ပယုတ္တာ ခန္ဓာ ပစ္ဆိမာနံ ပစ္ဆိမာနံ ဂန္ထဝိပ္ပယုတ္တာနံ ခန္ဓာနံ အနန္တရပစ္စယေန ပစ္စယော၊ အနုလောမံ ဂေါတြဘုဿ။ပေ။ ဖလသမာပတ္တိယာ အနန္တရပစ္စယေန ပစ္စယော. (၁)

ဂန္ထဝိပ္ပယုတ္တော ဓမ္မော ဂန္ထသမ္ပယုတ္တဿ ဓမ္မဿ အနန္တရပစ္စယေန ပစ္စယော – ပုရိမော ပုရိမော ဒိဋ္ဌိဂတဝိပ္ပယုတ္တော လောဘော ပစ္ဆိမာနံ ပစ္ဆိမာနံ ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ အနန္တရပစ္စယေန ပစ္စယော၊ ပုရိမံ ပုရိမံ ပဋိဃံ ပစ္ဆိမာနံ ပစ္ဆိမာနံ ဒေါမနဿသဟဂတာနံ ခန္ဓာနံ အနန္တရပစ္စယေန ပစ္စယော၊ အာဝဇ္ဇနာ ဂန္ထသမ္ပယုတ္တကာနံ ခန္ဓာနံ အနန္တရပစ္စယေန ပစ္စယော. (၂)

ဂန္ထဝိပ္ပယုတ္တော ဓမ္မော ဂန္ထသမ္ပယုတ္တဿ စ ဂန္ထဝိပ္ပယုတ္တဿ စ ဓမ္မဿ အနန္တရပစ္စယေန ပစ္စယော – ပုရိမော ပုရိမော ဒိဋ္ဌိဂတဝိပ္ပယုတ္တော လောဘော ပစ္ဆိမာနံ ပစ္ဆိမာနံ ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ လောဘဿ စ အနန္တရပစ္စယေန ပစ္စယော၊ ပုရိမံ ပုရိမံ ပဋိဃံ ပစ္ဆိမာနံ ပစ္ဆိမာနံ ဒေါမနဿသဟဂတာနံ ခန္ဓာနံ ပဋိဃဿ စ အနန္တရပစ္စယေန ပစ္စယော၊ အာဝဇ္ဇနာ ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ လောဘဿ စ ဒေါမနဿသဟဂတာနံ ခန္ဓာနံ ပဋိဃဿ စ အနန္တရပစ္စယေန ပစ္စယော. (၃)

၈၀. ဂန္ထသမ္ပယုတ္တော စ ဂန္ထဝိပ္ပယုတ္တော စ ဓမ္မာ ဂန္ထသမ္ပယုတ္တဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ပစ္ဆိမာနံ ပစ္ဆိမာနံ ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ အနန္တရပစ္စယေန ပစ္စယော၊ ပုရိမာ ပုရိမာ ဒေါမနဿသဟဂတာ ခန္ဓာ စ ပဋိဃဉ္စ ပစ္ဆိမာနံ ပစ္ဆိမာနံ ဒေါမနဿသဟဂတာနံ ခန္ဓာနံ အနန္တရပစ္စယေန ပစ္စယော. (မူလာ ပုစ္ဆိတဗ္ဗာ) ပုရိမာ ပုရိမာ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ပစ္ဆိမဿ ပစ္ဆိမဿ ဒိဋ္ဌိဂတဝိပ္ပယုတ္တဿ လောဘဿ အနန္တရပစ္စယေန ပစ္စယော၊ ပုရိမာ ပုရိမာ ဒေါမနဿသဟဂတာ ခန္ဓာ စ ပဋိဃဉ္စ ပစ္ဆိမဿ ပစ္ဆိမဿ ပဋိဃဿ အနန္တရပစ္စယေန ပစ္စယော၊ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဒေါမနဿသဟဂတာ ခန္ဓာ စ ပဋိဃဉ္စ ဝုဋ္ဌာနဿ အနန္တရပစ္စယေန ပစ္စယော. (မူလာ ပုစ္ဆိတဗ္ဗာ) ပုရိမာ ပုရိမာ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ပစ္ဆိမာနံ ပစ္ဆိမာနံ ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ လောဘဿ စ အနန္တရပစ္စယေန ပစ္စယော၊ ပုရိမာ ပုရိမာ ဒေါမနဿသဟဂတာ ခန္ဓာ စ ပဋိဃဉ္စ ပစ္ဆိမာနံ ပစ္ဆိမာနံ ဒေါမနဿသဟဂတာနံ ခန္ဓာနံ ပဋိဃဿ စ အနန္တရပစ္စယေန ပစ္စယော. (၃)

သမနန္တရပစ္စယာဒိ

၈၁. ဂန္ထသမ္ပယုတ္တော ဓမ္မော ဂန္ထသမ္ပယုတ္တဿ ဓမ္မဿ သမနန္တရပစ္စယေန ပစ္စယော။ သဟဇာတပစ္စယေန ပစ္စယော။ အညမညပစ္စယေန ပစ္စယော။ နိဿယပစ္စယေန ပစ္စယော.

ဥပနိဿယပစ္စယော

၈၂. ဂန္ထသမ္ပယုတ္တော ဓမ္မော ဂန္ထသမ္ပယုတ္တဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ဂန္ထသမ္ပယုတ္တာ ခန္ဓာ ဂန္ထသမ္ပယုတ္တကာနံ ခန္ဓာနံ ဥပနိဿယပစ္စယေန ပစ္စယော. (မူလံ ပုစ္ဆိတဗ္ဗံ၊ တီဏိပိ ဥပနိဿယာ) ဂန္ထသမ္ပယုတ္တာ ခန္ဓာ ဂန္ထဝိပ္ပယုတ္တာနံ ခန္ဓာနံ ဥပနိဿယပစ္စယေန ပစ္စယော. (မူလံ၊ တီဏိပိ ဥပနိဿယာ) ဂန္ထသမ္ပယုတ္တာ ခန္ဓာ ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ လောဘဿ စ ဥပနိဿယပစ္စယေန ပစ္စယော၊ ဒေါမနဿသဟဂတာနံ ခန္ဓာနံ ပဋိဃဿ စ ဥပနိဿယပစ္စယေန ပစ္စယော. (၃)

၈၃. ဂန္ထဝိပ္ပယုတ္တော ဓမ္မော ဂန္ထဝိပ္ပယုတ္တဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဒ္ဓံ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ။ မာနံ ဇပ္ပေတိ။ သီလံ။ပေ။ ပညံ ။ ရာဂံ။ ဒေါသံ။ မောဟံ။ မာနံ။ ပတ္ထနံ။ ကာယိကံ သုခံ။ ကာယိကံ ဒုက္ခံ။ ဥတုံ။ ဘောဇနံ။ သေနာသနံ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ။ ပါဏံ ဟနတိ။ပေ။ သံဃံ ဘိန္ဒတိ၊ သဒ္ဓါ။ပေ။ ပညာ၊ ရာဂေါ။ပေ။ ပတ္ထနာ။ပေ။ သေနာသနံ သဒ္ဓါယ။ပေ။ ပညာယ။ ရာဂဿ။ ဒေါသဿ။ မောဟဿ။ မာနဿ။ ပတ္ထနာယ။ပေ။ ဖလသမာပတ္တိယာ ဥပနိဿယပစ္စယေန ပစ္စယော. (၁)

ဂန္ထဝိပ္ပယုတ္တော ဓမ္မော ဂန္ထသမ္ပယုတ္တဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဒ္ဓံ ဥပနိဿာယ မာနံ ဇပ္ပေတိ၊ ဒိဋ္ဌိံ ဂဏှာတိ၊ သီလံ။ပေ။ ပညံ။ ရာဂံ။ပေ။ မာနံ။ ပတ္ထနံ။ပေ။ သေနာသနံ ဥပနိဿာယ ပါဏံ ဟနတိ။ပေ။ သံဃံ ဘိန္ဒတိ၊ သဒ္ဓါ။ပေ။ သေနာသနံ ရာဂဿ။ ဒေါသဿ ။ မောဟဿ။ မာနဿ။ ဒိဋ္ဌိယာ။ ပတ္ထနာယ ဥပနိဿယပစ္စယေန ပစ္စယော. (၂)

ဂန္ထဝိပ္ပယုတ္တော ဓမ္မော ဂန္ထသမ္ပယုတ္တဿ စ ဂန္ထဝိပ္ပယုတ္တဿ စ ဓမ္မဿ ဥပနိဿယပစ္စယေန ပစ္စယော (တီဏိ ဥပနိဿယာ)၊ သဒ္ဓံ ဥပနိဿာယ မာနံ ဇပ္ပေတိ၊ သီလံ။ပေ။ ပညံ။ ရာဂံ။ ဒေါသံ။ မောဟံ။ မာနံ။ ပတ္ထနံ။ ကာယိကံ သုခံ။ပေ။ သေနာသနံ ဥပနိဿာယ ပါဏံ ဟနတိ။ပေ။ သံဃံ ဘိန္ဒတိ၊ သဒ္ဓါ။ပေ။ ပညာ။ ရာဂေါ။ ဒေါသော။ မောဟော။ မာနော။ ပတ္ထနာ။ပေ။ သေနာသနံ ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ လောဘဿ စ ဒေါမနဿသဟဂတာနံ ခန္ဓာနံ ပဋိဃဿ စ ဥပနိဿယပစ္စယေန ပစ္စယော. (၃)

၈၄. ဂန္ထသမ္ပယုတ္တော စ ဂန္ထဝိပ္ပယုတ္တော စ ဓမ္မာ ဂန္ထသမ္ပယုတ္တဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော ။ပေ။. ပကတူပနိဿယော – ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဒေါမနဿသဟဂတာ ခန္ဓာ စ ပဋိဃဉ္စ ဂန္ထသမ္ပယုတ္တကာနံ ခန္ဓာနံ ဥပနိဿယပစ္စယေန ပစ္စယော. (မူလံ ကာတဗ္ဗံ) ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဒေါမနဿသဟဂတာ ခန္ဓာ စ ပဋိဃဉ္စ ဂန္ထဝိပ္ပယုတ္တာနံ ခန္ဓာနံ ဒိဋ္ဌိဂတဝိပ္ပယုတ္တလောဘဿ စ ပဋိဃဿ စ ဥပနိဿယပစ္စယေန ပစ္စယော. (မူလံ ပုစ္ဆိတဗ္ဗံ) ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဒေါမနဿသဟဂတာ ခန္ဓာ စ ပဋိဃဉ္စ ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ လောဘဿ စ ဒေါမနဿသဟဂတာနံ ခန္ဓာနံ ပဋိဃဿ စ ဥပနိဿယပစ္စယေန ပစ္စယော. (၃)

ပုရေဇာတပစ္စယော

၈၅. ဂန္ထဝိပ္ပယုတ္တော ဓမ္မော ဂန္ထဝိပ္ပယုတ္တဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အနိစ္စတော ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ ဂန္ထဝိပ္ပယုတ္တော ရာဂေါ ဥပ္ပဇ္ဇတိ၊ ဝိစိကိစ္ဆာ။ပေ။ ဥဒ္ဓစ္စံ။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။. ဝတ္ထုပုရေဇာတံ – စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ။ပေ။ ဝတ္ထု ဂန္ထဝိပ္ပယုတ္တာနံ ခန္ဓာနံ ဒိဋ္ဌိဂတဝိပ္ပယုတ္တဿ လောဘဿ စ ပဋိဃဿ စ ပုရေဇာတပစ္စယေန ပစ္စယော. (၁)

ဂန္ထဝိပ္ပယုတ္တော ဓမ္မော ဂန္ထသမ္ပယုတ္တဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အဿာဒေတိ အဘိနန္ဒတိ၊ တံ အာရဗ္ဘ ဂန္ထသမ္ပယုတ္တော ရာဂေါ ဥပ္ပဇ္ဇတိ၊ ဒိဋ္ဌိ။ပေ။ ဒေါမနဿံ ဥပ္ပဇ္ဇတိ. ဝတ္ထုပုရေဇာတံ – ဝတ္ထု ဂန္ထသမ္ပယုတ္တကာနံ ခန္ဓာနံ ပုရေဇာတပစ္စယေန ပစ္စယော. (၂)

ဂန္ထဝိပ္ပယုတ္တော ဓမ္မော ဂန္ထသမ္ပယုတ္တဿ စ ဂန္ထဝိပ္ပယုတ္တဿ စ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အာရဗ္ဘ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဒေါမနဿသဟဂတာ ခန္ဓာ စ ပဋိဃဉ္စ ဥပ္ပဇ္ဇန္တိ. ဝတ္ထုပုရေဇာတံ – ဝတ္ထု ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ လောဘဿ စ ဒေါမနဿသဟဂတာနံ ခန္ဓာနံ ပဋိဃဿ စ ပုရေဇာတပစ္စယေန ပစ္စယော. (၃)

ပစ္ဆာဇာတပစ္စယော

၈၆. ဂန္ထသမ္ပယုတ္တော ဓမ္မော ဂန္ထဝိပ္ပယုတ္တဿ ဓမ္မဿ ပစ္ဆာဇာတပစ္စယေန ပစ္စယော။ ဧကံ.

ဂန္ထဝိပ္ပယုတ္တော ဓမ္မော ဂန္ထဝိပ္ပယုတ္တဿ ဓမ္မဿ ပစ္ဆာဇာတပစ္စယေန ပစ္စယော။ ဧကံ.

ဂန္ထသမ္ပယုတ္တော စ ဂန္ထဝိပ္ပယုတ္တော စ ဓမ္မာ ဂန္ထဝိပ္ပယုတ္တဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဒေါမနဿသဟဂတာ ခန္ဓာ စ ပဋိဃဉ္စ ပုရေဇာတဿ ဣမဿ ကာယဿ ပစ္ဆာဇာတပစ္စယေန ပစ္စယော. (၁)

အာသေဝနပစ္စယော

၈၇. ဂန္ထသမ္ပယုတ္တော ဓမ္မော ဂန္ထသမ္ပယုတ္တဿ ဓမ္မဿ အာသေဝနပစ္စယေန ပစ္စယော (အနန္တရသဒိသံ၊ အာဝဇ္ဇနာပိ ဝုဋ္ဌာနမ္ပိ နတ္ထိ).

ကမ္မပစ္စယော

၈၈. ဂန္ထသမ္ပယုတ္တော ဓမ္မော ဂန္ထသမ္ပယုတ္တဿ ဓမ္မဿ ကမ္မပစ္စယေန ပစ္စယော – ဂန္ထသမ္ပယုတ္တာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော. (၁)

ဂန္ထသမ္ပယုတ္တော ဓမ္မော ဂန္ထဝိပ္ပယုတ္တဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – ဂန္ထသမ္ပယုတ္တာ စေတနာ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော၊ ဒိဋ္ဌိဂတဝိပ္ပယုတ္တလောဘသဟဂတာ စေတနာ လောဘဿ စ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော၊ ဒေါမနဿသဟဂတာ စေတနာ ပဋိဃဿ စ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော. နာနာက္ခဏိကာ – ဂန္ထသမ္ပယုတ္တာ စေတနာ ဝိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော. (၂)

ဂန္ထသမ္ပယုတ္တော ဓမ္မော ဂန္ထသမ္ပယုတ္တဿ စ ဂန္ထဝိပ္ပယုတ္တဿ စ ဓမ္မဿ ကမ္မပစ္စယေန ပစ္စယော – ဂန္ထသမ္ပယုတ္တာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော၊ ဒိဋ္ဌိဂတဝိပ္ပယုတ္တလောဘသဟဂတာ စေတနာ သမ္ပယုတ္တကာနံ ခန္ဓာနံ လောဘဿ စ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော၊ ဒေါမနဿသဟဂတာ စေတနာ သမ္ပယုတ္တကာနံ ခန္ဓာနံ ပဋိဃဿ စ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော. (၃)

၈၉. ဂန္ထဝိပ္ပယုတ္တော ဓမ္မော ဂန္ထဝိပ္ပယုတ္တဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – ဂန္ထဝိပ္ပယုတ္တာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. နာနာက္ခဏိကာ – ဂန္ထဝိပ္ပယုတ္တာ စေတနာ ဝိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော. (၁)

ဝိပါကပစ္စယာဒိ

၉၀. ဂန္ထဝိပ္ပယုတ္တော ဓမ္မော ဂန္ထဝိပ္ပယုတ္တဿ ဓမ္မဿ ဝိပါကပစ္စယေန ပစ္စယော။ ဧကံ.

ဂန္ထသမ္ပယုတ္တော ဓမ္မော ဂန္ထသမ္ပယုတ္တဿ ဓမ္မဿ အာဟာရပစ္စယေန ပစ္စယော။ စတ္တာရိ။ ဣန္ဒြိယပစ္စယေန ပစ္စယော။ စတ္တာရိ။ ဈာနပစ္စယေန ပစ္စယော။ စတ္တာရိ။ မဂ္ဂပစ္စယေန ပစ္စယော ။ စတ္တာရိ။ သမ္ပယုတ္တပစ္စယေန ပစ္စယော။ ဆ.

ဝိပ္ပယုတ္တပစ္စယော

၉၁. ဂန္ထသမ္ပယုတ္တော ဓမ္မော ဂန္ထဝိပ္ပယုတ္တဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ (သံခိတ္တံ၊ ဝိဘဇိတဗ္ဗံ). (၁)

ဂန္ထဝိပ္ပယုတ္တော ဓမ္မော ဂန္ထဝိပ္ပယုတ္တဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ (သံခိတ္တံ). (၁)

ဂန္ထဝိပ္ပယုတ္တော ဓမ္မော ဂန္ထသမ္ပယုတ္တဿ ဓမ္မဿ ဝိပ္ပယုတ္တပစ္စယေန ပစ္စယော. ပုရေဇာတံ – ဝတ္ထု ဂန္ထသမ္ပယုတ္တကာနံ ခန္ဓာနံ ဝိပ္ပယုတ္တပစ္စယေန ပစ္စယော. (၂)

ဂန္ထဝိပ္ပယုတ္တော ဓမ္မော ဂန္ထသမ္ပယုတ္တဿ စ ဂန္ထဝိပ္ပယုတ္တဿ စ ဓမ္မဿ ဝိပ္ပယုတ္တပစ္စယေန ပစ္စယော. ပုရေဇာတံ – ဝတ္ထု ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ လောဘဿ စ ဒေါမနဿသဟဂတာနံ ခန္ဓာနံ ပဋိဃဿ စ ဝိပ္ပယုတ္တပစ္စယေန ပစ္စယော. (၃)

၉၂. ဂန္ထသမ္ပယုတ္တော စ ဂန္ထဝိပ္ပယုတ္တော စ ဓမ္မာ ဂန္ထဝိပ္ပယုတ္တဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ. သဟဇာတာ – ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော၊ ဒေါမနဿသဟဂတာ ခန္ဓာ စ ပဋိဃဉ္စ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော. ပစ္ဆာဇာတာ – ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဒေါမနဿသဟဂတာ ခန္ဓာ စ ပဋိဃဉ္စ ပုရေဇာတဿ ဣမဿ ကာယဿ ဝိပ္ပယုတ္တပစ္စယေန ပစ္စယော. (၁)

အတ္ထိပစ္စယော

၉၃. ဂန္ထသမ္ပယုတ္တော ဓမ္မော ဂန္ထသမ္ပယုတ္တဿ ဓမ္မဿ အတ္ထိပစ္စယေန ပစ္စယော။ ဧကံ (ပဋိစ္စသဒိသံ). (၁)

ဂန္ထသမ္ပယုတ္တော ဓမ္မော ဂန္ထဝိပ္ပယုတ္တဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ (သံခိတ္တံ၊ ဝိဘဇိတဗ္ဗံ). (၂)

ဂန္ထသမ္ပယုတ္တော ဓမ္မော ဂန္ထသမ္ပယုတ္တဿ စ ဂန္ထဝိပ္ပယုတ္တဿ စ ဓမ္မဿ အတ္ထိပစ္စယေန ပစ္စယော။ ဧကံ (ပဋိစ္စသဒိသံ). (၃)

၉၄. ဂန္ထဝိပ္ပယုတ္တော ဓမ္မော ဂန္ထဝိပ္ပယုတ္တဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ (သံခိတ္တံ၊ ဝိဘဇိတဗ္ဗံ). (၁)

ဂန္ထဝိပ္ပယုတ္တော ဓမ္မော ဂန္ထသမ္ပယုတ္တဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – ဒိဋ္ဌိဂတဝိပ္ပယုတ္တော လောဘော သမ္ပယုတ္တကာနံ ခန္ဓာနံ အတ္ထိပစ္စယေန ပစ္စယော၊ ဒေါမနဿသဟဂတံ ပဋိဃံ သမ္ပယုတ္တကာနံ ခန္ဓာနံ အတ္ထိပစ္စယေန ပစ္စယော. ပုရေဇာတံ – စက္ခုံ။ပေ။ ဝတ္ထုံ အဿာဒေတိ အဘိနန္ဒတိ၊ တံ အာရဗ္ဘ ဂန္ထသမ္ပယုတ္တော ရာဂေါ။ပေ။ ဒိဋ္ဌိ။ပေ။ ဒေါမနဿံ ဥပ္ပဇ္ဇတိ၊ ဝတ္ထု ဂန္ထသမ္ပယုတ္တကာနံ ခန္ဓာနံ အတ္ထိပစ္စယေန ပစ္စယော. (၂)

ဂန္ထဝိပ္ပယုတ္တော ဓမ္မော ဂန္ထသမ္ပယုတ္တဿ စ ဂန္ထဝိပ္ပယုတ္တဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – ဒိဋ္ဌိဂတဝိပ္ပယုတ္တော လောဘော သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော၊ ပဋိဃံ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော. ပုရေဇာတံ – စက္ခုံ။ပေ။ ဝတ္ထုံ အာရဗ္ဘ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဒေါမနဿသဟဂတာ ခန္ဓာ စ ပဋိဃဉ္စ ဥပ္ပဇ္ဇန္တိ၊ ဝတ္ထု ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ လောဘဿ စ ဒေါမနဿသဟဂတာနံ ခန္ဓာနံ ပဋိဃဿ စ အတ္ထိပစ္စယေန ပစ္စယော. (၃)

၉၅. ဂန္ထသမ္ပယုတ္တော စ ဂန္ထဝိပ္ပယုတ္တော စ ဓမ္မာ ဂန္ထသမ္ပယုတ္တဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – ဂန္ထသမ္ပယုတ္တော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။. သဟဇာတော – ဒိဋ္ဌိဂတဝိပ္ပယုတ္တလောဘသဟဂတော ဧကော ခန္ဓော စ လောဘော စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။ ဒေါမနဿသဟဂတော ဧကော ခန္ဓော စ ပဋိဃဉ္စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။. (၁)

ဂန္ထသမ္ပယုတ္တော စ ဂန္ထဝိပ္ပယုတ္တော စ ဓမ္မာ ဂန္ထဝိပ္ပယုတ္တဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတာ – ဂန္ထသမ္ပယုတ္တာ ခန္ဓာ စ မဟာဘူတာ စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော. သဟဇာတာ – ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော. သဟဇာတာ – ဒေါမနဿသဟဂတာ ခန္ဓာ စ ပဋိဃဉ္စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော၊ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ ဝတ္ထု စ လောဘဿ အတ္ထိပစ္စယေန ပစ္စယော၊ ဒေါမနဿသဟဂတာ ခန္ဓာ စ ဝတ္ထု စ ပဋိဃဿ အတ္ထိပစ္စယေန ပစ္စယော. ပစ္ဆာဇာတာ – ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဒေါမနဿသဟဂတာ ခန္ဓာ စ ပဋိဃဉ္စ ပုရေဇာတဿ ဣမဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – ဂန္ထသမ္ပယုတ္တာ ခန္ဓာ စ ကဗဠီကာရော အာဟာရော စ ဣမဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – ဂန္ထသမ္ပယုတ္တာ ခန္ဓာ စ ရူပဇီဝိတိန္ဒြိယဉ္စ ကဋတ္တာရူပါနံ အတ္ထိပစ္စယေန ပစ္စယော. (၂)

ဂန္ထသမ္ပယုတ္တော စ ဂန္ထဝိပ္ပယုတ္တော စ ဓမ္မာ ဂန္ထသမ္ပယုတ္တဿ စ ဂန္ထဝိပ္ပယုတ္တဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – ဒိဋ္ဌိဂတဝိပ္ပယုတ္တလောဘသဟဂတော ဧကော ခန္ဓော စ လောဘော စ တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။. သဟဇာတော – ဒေါမနဿသဟဂတော ဧကော ခန္ဓော စ ပဋိဃဉ္စ တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။. သဟဇာတော – ဒိဋ္ဌိဂတဝိပ္ပယုတ္တလောဘသဟဂတော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ လောဘဿ စ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။. သဟဇာတော – ဒေါမနဿသဟဂတော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ ပဋိဃဿ စ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။. (၃)