၁. ဝိဘင်္ဂဝါရော

ဟေတုပစ္စယော

၆၂. ဂန္ထသမ္ပယုတ္တံ ဓမ္မံ သံသဋ္ဌော ဂန္ထသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဂန္ထသမ္ပယုတ္တံ ဧကံ ခန္ဓံ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။. (၁)

ဂန္ထသမ္ပယုတ္တံ ဓမ္မံ သံသဋ္ဌော ဂန္ထဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ သံသဋ္ဌော လောဘော၊ ဒေါမနဿသဟဂတေ ခန္ဓေ သံသဋ္ဌံ ပဋိဃံ. (၂)

ဂန္ထသမ္ပယုတ္တံ ဓမ္မံ သံသဋ္ဌော ဂန္ထသမ္ပယုတ္တော စ ဂန္ထဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – ဒိဋ္ဌိဂတဝိပ္ပယုတ္တလောဘသဟဂတံ ဧကံ ခန္ဓံ သံသဋ္ဌာ တယော ခန္ဓာ လောဘော စ။ပေ။ ဒွေ ခန္ဓေ။ပေ။ ဒေါမနဿသဟဂတံ ဧကံ ခန္ဓံ သံသဋ္ဌာ တယော ခန္ဓာ ပဋိဃဉ္စ။ပေ။ ဒွေ ခန္ဓေ။ပေ။. (၃)

၆၃. ဂန္ထဝိပ္ပယုတ္တံ ဓမ္မံ သံသဋ္ဌော ဂန္ထဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဂန္ထဝိပ္ပယုတ္တံ ဧကံ ခန္ဓံ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၁)

ဂန္ထဝိပ္ပယုတ္တံ ဓမ္မံ သံသဋ္ဌော ဂန္ထသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဒိဋ္ဌိဂတဝိပ္ပယုတ္တံ လောဘံ သံသဋ္ဌာ သမ္ပယုတ္တကာ ခန္ဓာ၊ ပဋိဃံ သံသဋ္ဌာ သမ္ပယုတ္တကာ ခန္ဓာ. (၂)

ဂန္ထသမ္ပယုတ္တဉ္စ ဂန္ထဝိပ္ပယုတ္တဉ္စ ဓမ္မံ သံသဋ္ဌော ဂန္ထသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဒိဋ္ဌိဂတဝိပ္ပယုတ္တံ လောဘသဟဂတံ ဧကံ ခန္ဓဉ္စ လောဘဉ္စ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။ ဒေါမနဿသဟဂတံ ဧကံ ခန္ဓဉ္စ ပဋိဃဉ္စ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။ (သံခိတ္တံ).