၁. ဝိဘင်္ဂဝါရော

နဟေတုပစ္စယော

၅၈. ဂန္ထဝိပ္ပယုတ္တံ ဓမ္မံ ပစ္စယာ ဂန္ထဝိပ္ပယုတ္တော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ဂန္ထဝိပ္ပယုတ္တံ။ပေ။ အဟေတုကပဋိသန္ဓိက္ခဏေ (ယာဝ အသညသတ္တာ)၊ စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ အဟေတုကာ ဂန္ထဝိပ္ပယုတ္တာ ခန္ဓာ၊ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ ဝတ္ထုဉ္စ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော (သံခိတ္တံ).