၁. ဝိဘင်္ဂဝါရော

ဟေတုပစ္စယော

၅၅. ဂန္ထသမ္ပယုတ္တံ ဓမ္မံ ပစ္စယာ ဂန္ထသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (ပဋိစ္စသဒိသာ).

ဂန္ထဝိပ္ပယုတ္တံ ဓမ္မံ ပစ္စယာ ဂန္ထဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဂန္ထဝိပ္ပယုတ္တံ ဧကံ ခန္ဓံ ပစ္စယာ။ပေ။ ပဋိသန္ဓိက္ခဏေ။ပေ။ ခန္ဓေ ပစ္စယာ ဝတ္ထု၊ ဝတ္ထုံ ပစ္စယာ ခန္ဓာ၊ ဧကံ မဟာဘူတံ။ပေ။ ဝတ္ထုံ ပစ္စယာ ဂန္ထဝိပ္ပယုတ္တာ ခန္ဓာ. (၁)

ဂန္ထဝိပ္ပယုတ္တံ ဓမ္မံ ပစ္စယာ ဂန္ထသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ ပစ္စယာ ဂန္ထသမ္ပယုတ္တကာ ခန္ဓာ၊ ဒိဋ္ဌိဂတဝိပ္ပယုတ္တံ လောဘံ ပစ္စယာ သမ္ပယုတ္တကာ ခန္ဓာ၊ ပဋိဃံ ပစ္စယာ သမ္ပယုတ္တကာ ခန္ဓာ. (၂)

ဂန္ထဝိပ္ပယုတ္တံ ဓမ္မံ ပစ္စယာ ဂန္ထသမ္ပယုတ္တော စ ဂန္ထဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – ဝတ္ထုံ ပစ္စယာ ဂန္ထသမ္ပယုတ္တကာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ၊ ဒိဋ္ဌိဂတဝိပ္ပယုတ္တံ လောဘံ ပစ္စယာ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ၊ ပဋိဃံ ပစ္စယာ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ၊ ဝတ္ထုံ ပစ္စယာ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ၊ ဝတ္ထုံ ပစ္စယာ ဒေါမနဿသဟဂတာ ခန္ဓာ စ ပဋိဃဉ္စ. (၃)

၅၆. ဂန္ထသမ္ပယုတ္တဉ္စ ဂန္ထဝိပ္ပယုတ္တဉ္စ ဓမ္မံ ပစ္စယာ ဂန္ထသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဂန္ထသမ္ပယုတ္တံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။ ဒိဋ္ဌိဂတဝိပ္ပယုတ္တလောဘသဟဂတံ ဧကံ ခန္ဓဉ္စ ဝတ္ထုဉ္စ လောဘဉ္စ ပစ္စယာ တယော ခန္ဓာ ။ပေ။ ဒွေ ခန္ဓေ။ပေ။ ဒေါမနဿသဟဂတံ ဧကံ ခန္ဓဉ္စ ဝတ္ထုဉ္စ ပဋိဃဉ္စ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။. (၁)

ဂန္ထသမ္ပယုတ္တဉ္စ ဂန္ထဝိပ္ပယုတ္တဉ္စ ဓမ္မံ ပစ္စယာ ဂန္ထဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဂန္ထသမ္ပယုတ္တေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ စ လောဘဉ္စ ပစ္စယာ စိတ္တသမုဋ္ဌာနံ ရူပံ၊ ဒေါမနဿသဟဂတေ ခန္ဓေ စ ပဋိဃဉ္စ ပစ္စယာ စိတ္တသမုဋ္ဌာနံ ရူပံ၊ ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ စ ဝတ္ထုဉ္စ ပစ္စယာ လောဘော၊ ဒေါမနဿသဟဂတေ ခန္ဓေ စ ဝတ္ထုဉ္စ ပစ္စယာ ပဋိဃံ. (၂)

ဂန္ထသမ္ပယုတ္တဉ္စ ဂန္ထဝိပ္ပယုတ္တဉ္စ ဓမ္မံ ပစ္စယာ ဂန္ထသမ္ပယုတ္တော စ ဂန္ထဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – ဂန္ထသမ္ပယုတ္တံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။ ဂန္ထသမ္ပယုတ္တေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ ဒိဋ္ဌိဂတဝိပ္ပယုတ္တလောဘသဟဂတံ ဧကံ ခန္ဓဉ္စ လောဘဉ္စ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဒေါမနဿသဟဂတံ ဧကံ ခန္ဓဉ္စ ပဋိဃဉ္စ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဒိဋ္ဌိဂတဝိပ္ပယုတ္တလောဘသဟဂတံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ လောဘော စ။ပေ။ ဒွေ ခန္ဓေ။ပေ။ ဒေါမနဿသဟဂတံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ ပဋိဃဉ္စ။ပေ။ ဒွေ ခန္ဓေ။ပေ။ (သံခိတ္တံ). (၃)