၁. ဝိဘင်္ဂဝါရော

ဟေတုပစ္စယော

၄၅. ဂန္ထသမ္ပယုတ္တံ ဓမ္မံ ပဋိစ္စ ဂန္ထသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဂန္ထသမ္ပယုတ္တံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။. (၁)

ဂန္ထသမ္ပယုတ္တံ ဓမ္မံ ပဋိစ္စ ဂန္ထဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဂန္ထသမ္ပယုတ္တေ ခန္ဓေ ပဋိစ္စ စိတ္တသမုဋ္ဌာနံ ရူပံ၊ ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ ပဋိစ္စ လောဘော စိတ္တသမုဋ္ဌာနဉ္စ ရူပံ၊ ဒေါမနဿသဟဂတေ ခန္ဓေ ပဋိစ္စ ပဋိဃံ စိတ္တသမုဋ္ဌာနဉ္စ ရူပံ. (၂)

ဂန္ထသမ္ပယုတ္တံ ဓမ္မံ ပဋိစ္စ ဂန္ထသမ္ပယုတ္တော စ ဂန္ထဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – ဂန္ထသမ္ပယုတ္တံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဒိဋ္ဌိဂတဝိပ္ပယုတ္တလောဘသဟဂတံ ဧကံ ခန္ဓံ ပဋိစ္စ တယော ခန္ဓာ လောဘော စ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဒေါမနဿသဟဂတံ ဧကံ ခန္ဓံ ပဋိစ္စ တယော ခန္ဓာ ပဋိဃဉ္စ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။. (၃)

၄၆. ဂန္ထဝိပ္ပယုတ္တံ ဓမ္မံ ပဋိစ္စ ဂန္ထဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဂန္ထဝိပ္ပယုတ္တံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဒိဋ္ဌိဂတဝိပ္ပယုတ္တံ လောဘံ ပဋိစ္စ စိတ္တသမုဋ္ဌာနံ ရူပံ၊ ပဋိဃံ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။ ခန္ဓေ ပဋိစ္စ (သံခိတ္တံ). (၁)

ဂန္ထဝိပ္ပယုတ္တံ ဓမ္မံ ပဋိစ္စ ဂန္ထသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဒိဋ္ဌိဂတဝိပ္ပယုတ္တံ လောဘံ ပဋိစ္စ သမ္ပယုတ္တကာ ခန္ဓာ၊ ပဋိဃံ ပဋိစ္စ သမ္ပယုတ္တကာ ခန္ဓာ. (၂)

ဂန္ထဝိပ္ပယုတ္တံ ဓမ္မံ ပဋိစ္စ ဂန္ထသမ္ပယုတ္တော စ ဂန္ထဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – ဒိဋ္ဌိဂတဝိပ္ပယုတ္တံ လောဘံ ပဋိစ္စ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ၊ ပဋိဃံ ပဋိစ္စ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ. (၃)

၄၇. ဂန္ထသမ္ပယုတ္တဉ္စ ဂန္ထဝိပ္ပယုတ္တဉ္စ ဓမ္မံ ပဋိစ္စ ဂန္ထသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဒိဋ္ဌိဂတဝိပ္ပယုတ္တလောဘသဟဂတံ ဧကံ ခန္ဓဉ္စ လောဘဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ ဒေါမနဿသဟဂတံ ဧကံ ခန္ဓဉ္စ ပဋိဃဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။. (၁)

ဂန္ထသမ္ပယုတ္တဉ္စ ဂန္ထဝိပ္ပယုတ္တဉ္စ ဓမ္မံ ပဋိစ္စ ဂန္ထဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဂန္ထသမ္ပယုတ္တေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ၊ ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ စ လောဘဉ္စ ပဋိစ္စ စိတ္တသမုဋ္ဌာနံ ရူပံ၊ ဒေါမနဿသဟဂတေ ခန္ဓေ စ ပဋိဃဉ္စ ပဋိစ္စ စိတ္တသမုဋ္ဌာနံ ရူပံ. (၂)

ဂန္ထသမ္ပယုတ္တဉ္စ ဂန္ထဝိပ္ပယုတ္တဉ္စ ဓမ္မံ ပဋိစ္စ ဂန္ထသမ္ပယုတ္တော စ ဂန္ထဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – ဒိဋ္ဌိဂတဝိပ္ပယုတ္တလောဘသဟဂတံ ဧကံ ခန္ဓဉ္စ လောဘဉ္စ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဒေါမနဿသဟဂတံ ဧကံ ခန္ဓဉ္စ ပဋိဃဉ္စ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။. (၃)

အာရမ္မဏပစ္စယော

၄၈. ဂန္ထသမ္ပယုတ္တံ ဓမ္မံ ပဋိစ္စ ဂန္ထသမ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – ဂန္ထသမ္ပယုတ္တံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။. (၁)

ဂန္ထသမ္ပယုတ္တံ ဓမ္မံ ပဋိစ္စ ဂန္ထဝိပ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ ပဋိစ္စ လောဘော၊ ဒေါမနဿသဟဂတေ ခန္ဓေ ပဋိစ္စ ပဋိဃံ. (၂)

ဂန္ထသမ္ပယုတ္တံ ဓမ္မံ ပဋိစ္စ ဂန္ထသမ္ပယုတ္တော စ ဂန္ထဝိပ္ပယုတ္တော စ ဓမ္မာ ဥပ္ပဇ္ဇန္တိ အာရမ္မဏပစ္စယာ – ဒိဋ္ဌိဂတဝိပ္ပယုတ္တလောဘသဟဂတံ ဧကံ ခန္ဓံ ပဋိစ္စ တယော ခန္ဓာ လောဘော စ။ပေ။ ဒွေ ခန္ဓေ။ပေ။ ဒေါမနဿသဟဂတံ ဧကံ ခန္ဓံ ပဋိစ္စ တယော ခန္ဓာ ပဋိဃဉ္စ။ပေ။ ဒွေ ခန္ဓေ။ပေ။. (၃)

၄၉. ဂန္ထဝိပ္ပယုတ္တံ ဓမ္မံ ပဋိစ္စ ဂန္ထဝိပ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – ဂန္ထဝိပ္ပယုတ္တံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ ဝတ္ထုံ ပဋိစ္စ ခန္ဓာ. (၁)

ဂန္ထဝိပ္ပယုတ္တံ ဓမ္မံ ပဋိစ္စ ဂန္ထသမ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – ဒိဋ္ဌိဂတဝိပ္ပယုတ္တံ လောဘံ ပဋိစ္စ သမ္ပယုတ္တကာ ခန္ဓာ၊ ပဋိဃံ ပဋိစ္စ သမ္ပယုတ္တကာ ခန္ဓာ. (၂)

ဂန္ထသမ္ပယုတ္တဉ္စ ဂန္ထဝိပ္ပယုတ္တဉ္စ ဓမ္မံ ပဋိစ္စ ဂန္ထသမ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – ဒိဋ္ဌိဂတဝိပ္ပယုတ္တလောဘသဟဂတံ ဧကံ ခန္ဓဉ္စ လောဘဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ ဒေါမနဿသဟဂတံ ဧကံ ခန္ဓဉ္စ ပဋိဃဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ (သံခိတ္တံ). (၁)