၁. ဝိဘင်္ဂဝါရော

ဟေတုပစ္စယော

၁၈. ဂန္ထော ဓမ္မော ဂန္ထဿ ဓမ္မဿ ဟေတုပစ္စယေန ပစ္စယော – ဂန္ထာ ဟေတူ သမ္ပယုတ္တကာနံ ဂန္ထာနံ ဟေတုပစ္စယေန ပစ္စယော. (၁)

ဂန္ထော ဓမ္မော နောဂန္ထဿ ဓမ္မဿ ဟေတုပစ္စယေန ပစ္စယော – ဂန္ထာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၂)

ဂန္ထော ဓမ္မော ဂန္ထဿ စ နောဂန္ထဿ စ ဓမ္မဿ ဟေတုပစ္စယေန ပစ္စယော – ဂန္ထာ ဟေတူ သမ္ပယုတ္တကာနံ ခန္ဓာနံ ဂန္ထာနဉ္စ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၃)

၁၉. နောဂန္ထော ဓမ္မော နောဂန္ထဿ ဓမ္မဿ ဟေတုပစ္စယေန ပစ္စယော – နောဂန္ထာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၁)

နောဂန္ထော ဓမ္မော ဂန္ထဿ ဓမ္မဿ ဟေတုပစ္စယေန ပစ္စယော – နောဂန္ထာ ဟေတူ သမ္ပယုတ္တကာနံ ဂန္ထာနံ ဟေတုပစ္စယေန ပစ္စယော. (၂)

နောဂန္ထော ဓမ္မော ဂန္ထဿ စ နောဂန္ထဿ စ ဓမ္မဿ ဟေတုပစ္စယေန ပစ္စယော – နောဂန္ထာ ဟေတူ သမ္ပယုတ္တကာနံ ခန္ဓာနံ ဂန္ထာနဉ္စ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၃)

၂၀. ဂန္ထော စ နောဂန္ထော စ ဓမ္မာ ဂန္ထဿ ဓမ္မဿ ဟေတုပစ္စယေန ပစ္စယော – ဂန္ထာ စ နောဂန္ထာ စ ဟေတူ သမ္ပယုတ္တကာနံ ဂန္ထာနံ ဟေတုပစ္စယေန ပစ္စယော. (၁)

ဂန္ထော စ နောဂန္ထော စ ဓမ္မာ နောဂန္ထဿ ဓမ္မဿ ဟေတုပစ္စယေန ပစ္စယော – ဂန္ထာ စ နောဂန္ထာ စ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၂)

ဂန္ထော စ နောဂန္ထော စ ဓမ္မာ ဂန္ထဿ စ နောဂန္ထဿ စ ဓမ္မဿ ဟေတုပစ္စယေန ပစ္စယော – ဂန္ထာ စ နောဂန္ထာ စ ဟေတူ သမ္ပယုတ္တကာနံ ခန္ဓာနံ ဂန္ထာနဉ္စ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၃)

အာရမ္မဏပစ္စယော

၂၁. ဂန္ထော ဓမ္မော ဂန္ထဿ ဓမ္မဿ အာရမ္မဏပစ္စယေန ပစ္စယော – ဂန္ထေ အာရဗ္ဘ ဂန္ထာ ဥပ္ပဇ္ဇန္တိ. (မူလံ ကာတဗ္ဗံ) ဂန္ထေ အာရဗ္ဘ နောဂန္ထာ ခန္ဓာ ဥပ္ပဇ္ဇန္တိ. (မူလံ ကာတဗ္ဗံ) ဂန္ထေ အာရဗ္ဘ ဂန္ထာ စ သမ္ပယုတ္တကာ စ ခန္ဓာ ဥပ္ပဇ္ဇန္တိ. (၃)

၂၂. နောဂန္ထော ဓမ္မော နောဂန္ထဿ ဓမ္မဿ အာရမ္မဏပစ္စယေန ပစ္စယော – ဒါနံ ဒတွာ သီလံ။ပေ။ ဥပေါသထကမ္မံ ကတွာ တံ ပစ္စဝေက္ခတိ၊ ပုဗ္ဗေ သုစိဏ္ဏာနိ။ပေ။ ဈာနာ။ပေ။ အရိယာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ၊ ဖလံ ပစ္စဝေက္ခန္တိ၊ နိဗ္ဗာနံ ပစ္စဝေက္ခန္တိ. နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ၊ အာဝဇ္ဇနာယ အာရမ္မဏပစ္စယေန ပစ္စယော၊ အရိယာ နောဂန္ထေ ပဟီနေ ကိလေသေ။ပေ။ ဝိက္ခမ္ဘိတေ ကိလေသေ ပစ္စဝေက္ခန္တိ၊ ပုဗ္ဗေ။ပေ။ စက္ခုံ။ပေ။ ဝတ္ထုံ နောဂန္ထေ ခန္ဓေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. စေတောပရိယဉာဏေန နောဂန္ထစိတ္တသမင်္ဂိဿ စိတ္တံ ဇာနာတိ၊ အာကာသာနဉ္စာယတနံ ဝိညာဏဉ္စာယတနဿ။ပေ။ အာကိဉ္စညာယတနံ နေဝသညာနာသညာယတနဿ။ပေ။ ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။ နောဂန္ထာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၁)

နောဂန္ထော ဓမ္မော ဂန္ထဿ ဓမ္မဿ အာရမ္မဏပစ္စယေန ပစ္စယော – ဒါနံ ဒတွာ သီလံ။ပေ။ ဥပေါသထကမ္မံ ကတွာ တံ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဒေါမနဿံ ဥပ္ပဇ္ဇတိ၊ ပုဗ္ဗေ သုစိဏ္ဏာနိ။ပေ။ ဈာနာ။ပေ။ စက္ခုံ။ပေ။ ဝတ္ထုံ နောဂန္ထေ ခန္ဓေ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ။ပေ။ ဒေါမနဿံ ဥပ္ပဇ္ဇတိ. (၂)

နောဂန္ထော ဓမ္မော ဂန္ထဿ စ နောဂန္ထဿ စ ဓမ္မဿ အာရမ္မဏပစ္စယေန ပစ္စယော – ဒါနံ ဒတွာ သီလံ။ပေ။ ဥပေါသထကမ္မံ ကတွာ တံ အဿာဒေတိ အဘိနန္ဒတိ၊ တံ အာရဗ္ဘ ဂန္ထာ စ သမ္ပယုတ္တကာ စ ခန္ဓာ ဥပ္ပဇ္ဇန္တိ၊ ပုဗ္ဗေ သုစိဏ္ဏာနိ။ပေ။ ဈာနာ။ပေ။ စက္ခုံ။ပေ။ ဝတ္ထုံ နောဂန္ထေ ခန္ဓေ အဿာဒေတိ အဘိနန္ဒတိ၊ တံ အာရဗ္ဘ ဂန္ထာ စ သမ္ပယုတ္တကာ စ ခန္ဓာ ဥပ္ပဇ္ဇန္တိ. (၃)

ဂန္ထော စ နောဂန္ထော စ ဓမ္မာ ဂန္ထဿ ဓမ္မဿ အာရမ္မဏပစ္စယေန ပစ္စယော။ တီဏိ (အာရဗ္ဘ ကာတဗ္ဗာ).

အဓိပတိပစ္စယော

၂၃. ဂန္ထော ဓမ္မော ဂန္ထဿ ဓမ္မဿ အဓိပတိပစ္စယေန ပစ္စယော။ တီဏိ (အာရမ္မဏသဒိသာ၊ ဂရုကာရမ္မဏာ ကာတဗ္ဗာ).

နောဂန္ထော ဓမ္မော နောဂန္ထဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဒါနံ။ပေ။ သီလံ။ပေ။ ဥပေါသထကမ္မံ။ပေ။ ပုဗ္ဗေ။ပေ။ ဈာနာ။ပေ။ အရိယာ မဂ္ဂါ။ပေ။ ဖလံ။ပေ။ နိဗ္ဗာနံ။ပေ။ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ အဓိပတိပစ္စယေန ပစ္စယော၊ စက္ခုံ။ပေ။ ဝတ္ထုံ နောဂန္ထေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. သဟဇာတာဓိပတိ – နောဂန္ထာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၁)

နောဂန္ထော ဓမ္မော ဂန္ထဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဒါနံ။ပေ။ သီလံ။ပေ။ ဥပေါသထကမ္မံ။ပေ။ ပုဗ္ဗေ သုစိဏ္ဏာနိ ။ပေ။ ဈာနာ။ပေ။ စက္ခုံ။ပေ။ ဝတ္ထုံ နောဂန္ထေ ခန္ဓေ ဂရုံ ကတွာ တံ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. သဟဇာတာဓိပတိ – နောဂန္ထာဓိပတိ ဂန္ထာနံ အဓိပတိပစ္စယေန ပစ္စယော. (၂)

နောဂန္ထော ဓမ္မော ဂန္ထဿ စ နောဂန္ထဿ စ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဒါနံ။ပေ။ နောဂန္ထေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ဂန္ထာ စ သမ္ပယုတ္တကာ စ ခန္ဓာ ဥပ္ပဇ္ဇန္တိ. သဟဇာတာဓိပတိ – နောဂန္ထာဓိပတိ သမ္ပယုတ္တကာနံ ခန္ဓာနံ ဂန္ထာနဉ္စ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၃)

၂၄. ဂန္ထော စ နောဂန္ထော စ ဓမ္မာ ဂန္ထဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ။ တီဏိ.

အနန္တရပစ္စယော

၂၅. ဂန္ထော ဓမ္မော ဂန္ထဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဂန္ထာ ပစ္ဆိမာနံ ပစ္ဆိမာနံ ဂန္ထာနံ အနန္တရပစ္စယေန ပစ္စယော. (၁)

ဂန္ထော ဓမ္မော နောဂန္ထဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဂန္ထာ ပစ္ဆိမာနံ ပစ္ဆိမာနံ နောဂန္ထာနံ ခန္ဓာနံ အနန္တရပစ္စယေန ပစ္စယော၊ ဂန္ထာ ဝုဋ္ဌာနဿ အနန္တရပစ္စယေန ပစ္စယော. (၂)

ဂန္ထော ဓမ္မော ဂန္ထဿ စ နောဂန္ထဿ စ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဂန္ထာ ပစ္ဆိမာနံ ပစ္ဆိမာနံ ဂန္ထာနံ သမ္ပယုတ္တကာနဉ္စ ခန္ဓာနံ အနန္တရပစ္စယေန ပစ္စယော. (၃)

၂၆. နောဂန္ထော ဓမ္မော နောဂန္ထဿ ဓမ္မဿ အနန္တရပစ္စယေန ပစ္စယော။ တီဏိ (ဒွေ အာဝဇ္ဇနာ ကာတဗ္ဗာ၊ ပဌမော နတ္ထိ).

ဂန္ထော စ နောဂန္ထော စ ဓမ္မာ ဂန္ထဿ ဓမ္မဿ အနန္တရပစ္စယေန ပစ္စယော။ တီဏိ (ဧကမ္ပိ ဝုဋ္ဌာနံ ကာတဗ္ဗံ၊ မဇ္ဈေ).

သမနန္တရပစ္စယာဒိ

၂၇. ဂန္ထော ဓမ္မော ဂန္ထဿ ဓမ္မဿ သမနန္တရပစ္စယေန ပစ္စယော။ နဝ။ သဟဇာတပစ္စယေန ပစ္စယော။ နဝ။ အညမညပစ္စယေန ပစ္စယော။ နဝ၊ နိဿယပစ္စယေန ပစ္စယော။ နဝ.

ဥပနိဿယပစ္စယော

၂၈. ဂန္ထော ဓမ္မော ဂန္ထဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ဂန္ထာ ဂန္ထာနံ ဥပနိဿယပစ္စယေန ပစ္စယော။ တီဏိ.

၂၉. နောဂန္ထော ဓမ္မော နောဂန္ထဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော ။ပေ။. ပကတူပနိဿယော – သဒ္ဓံ ဥပနိဿာယ ဒါနံ ဒေတိ။ပေ။ မာနံ ဇပ္ပေတိ၊ ဒိဋ္ဌိံ ဂဏှာတိ၊ သီလံ။ပေ။ သေနာသနံ ဥပနိဿာယ ဒါနံ ဒေတိ။ပေ။ သံဃံ ဘိန္ဒတိ၊ သဒ္ဓါ။ပေ။ သေနာသနံ သဒ္ဓါယ။ပေ။ ဖလသမာပတ္တိယာ ဥပနိဿယပစ္စယေန ပစ္စယော. (၁)

နောဂန္ထော ဓမ္မော ဂန္ထဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဒ္ဓံ ဥပနိဿာယ ဒိဋ္ဌိံ ဂဏှာတိ၊ သီလံ။ပေ။ သေနာသနံ ဥပနိဿာယ ပါဏံ ဟနတိ။ပေ။ သံဃံ ဘိန္ဒတိ၊ သဒ္ဓါ။ပေ။ သေနာသနံ ရာဂဿ။ပေ။ ပတ္ထနာယ ဥပနိဿယပစ္စယေန ပစ္စယော. (၂)

နောဂန္ထော ဓမ္မော ဂန္ထဿ စ နောဂန္ထဿ စ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဒ္ဓံ ဥပနိဿာယ မာနံ ဇပ္ပေတိ၊ ဒိဋ္ဌိံ ဂဏှာတိ၊ သီလံ။ပေ။ သေနာသနံ ဥပနိဿာယ ပါဏံ ဟနတိ ။ပေ။ သံဃံ ဘိန္ဒတိ၊ သဒ္ဓါ။ပေ။ သေနာသနံ ဂန္ထာနံ သမ္ပယုတ္တကာနဉ္စ ခန္ဓာနံ ဥပနိဿယပစ္စယေန ပစ္စယော. (၃)

ဂန္ထော စ နောဂန္ထော စ ဓမ္မာ ဂန္ထဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော။ တီဏိ (အာရမ္မဏနယေန ကာတဗ္ဗာ).

ပုရေဇာတပစ္စယာဒိ

၃၀. နောဂန္ထော ဓမ္မော နောဂန္ထဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ၊ ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။. ဝတ္ထုပုရေဇာတံ – စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ။ပေ။ ဝတ္ထု နောဂန္ထာနံ ခန္ဓာနံ ပုရေဇာတပစ္စယေန ပစ္စယော. (၁)

နောဂန္ထော ဓမ္မော ဂန္ထဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဒေါမနဿံ ဥပ္ပဇ္ဇတိ. ဝတ္ထုပုရေဇာတံ – ဝတ္ထု ဂန္ထာနံ ပုရေဇာတပစ္စယေန ပစ္စယော. (၂)

နောဂန္ထော ဓမ္မော ဂန္ထဿ စ နောဂန္ထဿ စ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အဿာဒေတိ အဘိနန္ဒတိ၊ တံ အာရဗ္ဘ ဂန္ထာ စ သမ္ပယုတ္တကာ စ ခန္ဓာ ဥပ္ပဇ္ဇန္တိ. ဝတ္ထုပုရေဇာတံ – ဝတ္ထု ဂန္ထာနံ သမ္ပယုတ္တကာနဉ္စ ခန္ဓာနံ ပုရေဇာတပစ္စယေန ပစ္စယော. (၃)

ပစ္ဆာဇာတပစ္စယေန ပစ္စယော။ တီဏိ၊ အာသေဝနပစ္စယေန ပစ္စယော။ နဝ.

ကမ္မပစ္စယော

၃၁. နောဂန္ထော ဓမ္မော နောဂန္ထဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – နောဂန္ထာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. နာနာက္ခဏိကာ – နောဂန္ထာ စေတနာ ဝိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော. (၁)

နောဂန္ထော ဓမ္မော ဂန္ထဿ ဓမ္မဿ ကမ္မပစ္စယေန ပစ္စယော – နောဂန္ထာ စေတနာ သမ္ပယုတ္တကာနံ ဂန္ထာနံ ကမ္မပစ္စယေန ပစ္စယော. (၂)

နောဂန္ထော ဓမ္မော ဂန္ထဿ စ နောဂန္ထဿ စ ဓမ္မဿ ကမ္မပစ္စယေန ပစ္စယော – နောဂန္ထာ စေတနာ သမ္ပယုတ္တကာနံ ခန္ဓာနံ ဂန္ထာနဉ္စ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော. (၃)

ဝိပါကပစ္စယာဒိ

၃၂. နောဂန္ထော ဓမ္မော နောဂန္ထဿ ဓမ္မဿ ဝိပါကပစ္စယေန ပစ္စယော။ ဧကံ။ အာဟာရပစ္စယေန ပစ္စယော။ တီဏိ။ ဣန္ဒြိယပစ္စယေန ပစ္စယော။ တီဏိ။ ဈာနပစ္စယေန ပစ္စယော။ တီဏိ။ မဂ္ဂပစ္စယေန ပစ္စယော။ နဝ။ သမ္ပယုတ္တပစ္စယေန ပစ္စယော။ နဝ.

ဝိပ္ပယုတ္တပစ္စယော

၃၃. ဂန္ထော ဓမ္မော နောဂန္ထဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ (သံခိတ္တံ). (၁)

နောဂန္ထော ဓမ္မော နောဂန္ထဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ (သံခိတ္တံ). (၁)

နောဂန္ထော ဓမ္မော ဂန္ထဿ ဓမ္မဿ ဝိပ္ပယုတ္တပစ္စယေန ပစ္စယော. ပုရေဇာတံ – ဝတ္ထု ဂန္ထာနံ ဝိပ္ပယုတ္တပစ္စယေန ပစ္စယော. (၂)

နောဂန္ထော ဓမ္မော ဂန္ထဿ စ နောဂန္ထဿ စ ဓမ္မဿ ဝိပ္ပယုတ္တပစ္စယေန ပစ္စယော. ပုရေဇာတံ – ဝတ္ထု ဂန္ထာနံ သမ္ပယုတ္တကာနဉ္စ ခန္ဓာနံ ဝိပ္ပယုတ္တပစ္စယေန ပစ္စယော. (၃)

ဂန္ထော စ နောဂန္ထော စ ဓမ္မာ နောဂန္ထဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ (သံခိတ္တံ). (၁)

အတ္ထိပစ္စယော

၃၄. ဂန္ထော ဓမ္မော ဂန္ထဿ ဓမ္မဿ အတ္ထိပစ္စယေန ပစ္စယော။ ဧကံ (ပဋိစ္စသဒိသံ).

ဂန္ထော ဓမ္မော နောဂန္ထဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ. သဟဇာတာ – ဂန္ထာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော. ပစ္ဆာဇာတာ – ဂန္ထာ ပုရေဇာတဿ ဣမဿ ကာယဿ အတ္ထိပစ္စယေန ပစ္စယော. (၂)

ဂန္ထော ဓမ္မော ဂန္ထဿ စ နောဂန္ထဿ စ ဓမ္မဿ အတ္ထိပစ္စယေန ပစ္စယော။ ဧကံ (ပဋိစ္စသဒိသံ). (၃)

၃၅. နောဂန္ထော ဓမ္မော နောဂန္ထဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ (သံခိတ္တံ). (၁)

နောဂန္ထော ဓမ္မော ဂန္ထဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတာ – နောဂန္ထာ ခန္ဓာ ဂန္ထာနံ အတ္ထိပစ္စယေန ပစ္စယော. ပုရေဇာတံ – စက္ခုံ။ပေ။ ဝတ္ထုံ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဒေါမနဿံ ဥပ္ပဇ္ဇတိ၊ ဝတ္ထု ဂန္ထာနံ အတ္ထိပစ္စယေန ပစ္စယော. (၂)

နောဂန္ထော ဓမ္မော ဂန္ထဿ စ နောဂန္ထဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – နောဂန္ထော ဧကော ခန္ဓော တိဏ္ဏန္နံ ခန္ဓာနံ ဂန္ထာနဉ္စ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော။ပေ။. ပုရေဇာတံ – စက္ခုံ။ပေ။ ဝတ္ထုံ အဿာဒေတိ အဘိနန္ဒတိ၊ တံ အာရဗ္ဘ ဂန္ထာ စ သမ္ပယုတ္တကာ စ ခန္ဓာ ဥပ္ပဇ္ဇန္တိ၊ ဝတ္ထု ဂန္ထာနံ သမ္ပယုတ္တကာနဉ္စ ခန္ဓာနံ အတ္ထိပစ္စယေန ပစ္စယော. (၃)

၃၆. ဂန္ထော စ နောဂန္ထော စ ဓမ္မာ ဂန္ထဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – သီလဗ္ဗတပရာမာသော ကာယဂန္ထော စ သမ္ပယုတ္တကာ စ ခန္ဓာ အဘိဇ္ဈာကာယဂန္ထဿ အတ္ထိပစ္စယေန ပစ္စယော (စက္ကံ). သဟဇာတော – သီလဗ္ဗတပရာမာသော ကာယဂန္ထော စ ဝတ္ထု စ အဘိဇ္ဈာကာယဂန္ထဿ အတ္ထိပစ္စယေန ပစ္စယော. (စက္ကံ). (၁)

ဂန္ထော စ နောဂန္ထော စ ဓမ္မာ နောဂန္ထဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတော – နောဂန္ထော ဧကော ခန္ဓော စ ဂန္ထော စ တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။. သဟဇာတာ – ဂန္ထာ စ ဝတ္ထု စ နောဂန္ထာနံ ခန္ဓာနံ အတ္ထိပစ္စယေန ပစ္စယော. သဟဇာတာ – ဂန္ထာ စ မဟာဘူတာ စ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော. ပစ္ဆာဇာတာ – ဂန္ထာ စ သမ္ပယုတ္တကာ စ ခန္ဓာ ပုရေဇာတဿ ဣမဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – ဂန္ထာ စ ကဗဠီကာရော အာဟာရော စ ဣမဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – ဂန္ထာ စ ရူပဇီဝိတိန္ဒြိယဉ္စ ကဋတ္တာရူပါနံ အတ္ထိပစ္စယေန ပစ္စယော. (၂)

ဂန္ထော စ နောဂန္ထော စ ဓမ္မာ ဂန္ထဿ စ နောဂန္ထဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – နောဂန္ထော ဧကော ခန္ဓော စ သီလဗ္ဗတပရာမာသော ကာယဂန္ထော စ တိဏ္ဏန္နံ ခန္ဓာနံ အဘိဇ္ဈာကာယဂန္ထဿ စ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော။ပေ။. သဟဇာတော – သီလဗ္ဗတပရာမာသော ကာယဂန္ထော စ ဝတ္ထု စ အဘိဇ္ဈာကာယဂန္ထဿ စ သမ္ပယုတ္တကာနဉ္စ ခန္ဓာနံ အတ္ထိပစ္စယေန ပစ္စယော (စက္ကံ). (၃)