၁. ပစ္စယာနုလောမံ

၁. ဝိဘင်္ဂဝါရော

၁၁၆. သညောဇနဝိပ္ပယုတ္တံ သညောဇနိယံ ဓမ္မံ ပဋိစ္စ သညောဇနဝိပ္ပယုတ္တော သညောဇနိယော ဓမ္မော ဥပ္ပဇ္ဇတိ ဟေတုပစ္စယာ – သညောဇနဝိပ္ပယုတ္တံ သညောဇနိယံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ (ယာဝ အသညသတ္တာ၊ မဟာဘူတာ).

သညောဇနဝိပ္ပယုတ္တံ အသညောဇနိယံ ဓမ္မံ ပဋိစ္စ သညောဇနဝိပ္ပယုတ္တော အသညောဇနိယော ဓမ္မော ဥပ္ပဇ္ဇတိ ဟေတုပစ္စယာ – သညောဇနဝိပ္ပယုတ္တံ အသညောဇနိယံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။.

သညောဇနဝိပ္ပယုတ္တံ အသညောဇနိယံ ဓမ္မံ။ပေ။ (ဒွေ ပဉှာ ကာတဗ္ဗာ).

(ဣမံ ဒုကံ စူဠန္တရဒုကေ လောကိယဒုကသဒိသံ နိန္နာနာကရဏံ.)

သညောဇနဝိပ္ပယုတ္တသညောဇနိယဒုကံ နိဋ္ဌိတံ.

သညောဇနဂေါစ္ဆကံ နိဋ္ဌိတံ.