၁. ဝိဘင်္ဂဝါရော

ဟေတုပစ္စယော

၁၀၆. သညောဇနော စေဝ သညောဇနသမ္ပယုတ္တော စ ဓမ္မော သညောဇနဿ စေဝ သညောဇနသမ္ပယုတ္တဿ စ ဓမ္မဿ ဟေတုပစ္စယေန ပစ္စယော – ကာမရာဂသညောဇနော ဒိဋ္ဌိသညောဇနဿ အဝိဇ္ဇာသညောဇနဿ ဟေတုပစ္စယေန ပစ္စယော (စက္ကံ). (၁)

သညောဇနော စေဝ သညောဇနသမ္ပယုတ္တော စ ဓမ္မော သညောဇနသမ္ပယုတ္တဿ စေဝ နော စ သညောဇနဿ ဓမ္မဿ ဟေတုပစ္စယေန ပစ္စယော – သညောဇနာ စေဝ သညောဇနသမ္ပယုတ္တာ စ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. (၂)

သညောဇနော စေဝ သညောဇနသမ္ပယုတ္တော စ ဓမ္မော သညောဇနဿ စေဝ သညောဇနသမ္ပယုတ္တဿ စ သညောဇနသမ္ပယုတ္တဿ စေဝ နော စ သညောဇနဿ စ ဓမ္မဿ ဟေတုပစ္စယေန ပစ္စယော – ကာမရာဂသညောဇနော ဒိဋ္ဌိသညောဇနဿ အဝိဇ္ဇာသညောဇနဿ သမ္ပယုတ္တကာနဉ္စ ခန္ဓာနံ ဟေတုပစ္စယေန ပစ္စယော (စက္ကံ). (၃)

အာရမ္မဏပစ္စယော

၁၀၇. သညောဇနော စေဝ သညောဇနသမ္ပယုတ္တော စ ဓမ္မော သညောဇနဿ စေဝ သညောဇနသမ္ပယုတ္တဿ စ ဓမ္မဿ အာရမ္မဏပစ္စယေန ပစ္စယော – သညောဇနေ အာရဗ္ဘ သညောဇနာ ဥပ္ပဇ္ဇန္တိ. (မူလံ ကာတဗ္ဗံ) သညောဇနေ အာရဗ္ဘ သညောဇနသမ္ပယုတ္တာ စေဝ နော စ သညောဇနာ ခန္ဓာ ဥပ္ပဇ္ဇန္တိ. (မူလံ ကာတဗ္ဗံ) သညောဇနေ အာရဗ္ဘ သညောဇနာ စ သညောဇနသမ္ပယုတ္တကာ စ ခန္ဓာ ဥပ္ပဇ္ဇန္တိ. (၁)

သညောဇနသမ္ပယုတ္တော စေဝ နော စ သညောဇနော ဓမ္မော သညောဇနသမ္ပယုတ္တဿ စေဝ နော စ သညောဇနဿ ဓမ္မဿ အာရမ္မဏပစ္စယေန ပစ္စယော – သညောဇနသမ္ပယုတ္တေ စေဝ နော စ သညောဇနေ ခန္ဓေ အာရဗ္ဘ သညောဇနသမ္ပယုတ္တာ စေဝ နော စ သညောဇနာ ခန္ဓာ ဥပ္ပဇ္ဇန္တိ. (၁)

သညောဇနသမ္ပယုတ္တော စေဝ နော စ သညောဇနော ဓမ္မော သညောဇနဿ စေဝ သညောဇနသမ္ပယုတ္တဿ စ ဓမ္မဿ အာရမ္မဏပစ္စယေန ပစ္စယော – သညောဇနသမ္ပယုတ္တေ စေဝ နော စ သညောဇနေ ခန္ဓေ အာရဗ္ဘ သညောဇနာ ဥပ္ပဇ္ဇန္တိ. (၂)

သညောဇနသမ္ပယုတ္တော စေဝ နော စ သညောဇနော ဓမ္မော သညောဇနဿ စေဝ သညောဇနသမ္ပယုတ္တဿ စ သညောဇနသမ္ပယုတ္တဿ စေဝ နော စ သညောဇနဿ စ ဓမ္မဿ အာရမ္မဏပစ္စယေန ပစ္စယော – သညောဇနသမ္ပယုတ္တေ စေဝ နော စ သညောဇနေ ခန္ဓေ အာရဗ္ဘ သညောဇနာ စ သညောဇနသမ္ပယုတ္တကာ စ ခန္ဓာ ဥပ္ပဇ္ဇန္တိ. (၃)

သညောဇနော စေဝ သညောဇနသမ္ပယုတ္တော စ သညောဇနသမ္ပယုတ္တော စေဝ နော စ သညောဇနော စ ဓမ္မာ သညောဇနဿ စေဝ သညောဇနသမ္ပယုတ္တဿ စ ဓမ္မဿ အာရမ္မဏပစ္စယေန ပစ္စယော။ တီဏိ.

အဓိပတိပစ္စယော

၁၀၈. သညောဇနော စေဝ သညောဇနသမ္ပယုတ္တော စ ဓမ္မော သညောဇနဿ စေဝ သညောဇနသမ္ပယုတ္တဿ စ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ။ တီဏိ.

သညောဇနသမ္ပယုတ္တော စေဝ နော စ သညောဇနော ဓမ္မော သညောဇနသမ္ပယုတ္တဿ စေဝ နော စ သညောဇနဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ။ တီဏိ (ဣမာသု တီသုပိ ပဉှာသု အာရမ္မဏာဓိပတိပိ သဟဇာတာဓိပတိပိ ကာတဗ္ဗာ).

သညောဇနော စေဝ သညောဇနသမ္ပယုတ္တော စ သညောဇနသမ္ပယုတ္တော စေဝ နော စ သညောဇနော စ ဓမ္မာ သညောဇနဿ စေဝ သညောဇနသမ္ပယုတ္တဿ စ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ။ တီဏိ.

အနန္တရပစ္စယာဒိ

၁၀၉. သညောဇနော စေဝ သညောဇနသမ္ပယုတ္တော စ ဓမ္မော သညောဇနဿ စေဝ သညောဇနသမ္ပယုတ္တဿ စ ဓမ္မဿ အနန္တရပစ္စယေန ပစ္စယော။ နဝ (နိန္နာနာကရဏံ၊ ဝိဘဇနာ နတ္ထိ. အာရမ္မဏသဒိသာ)။ သမနန္တရပစ္စယေန ပစ္စယော။ နဝ။ သဟဇာတပစ္စယေန ပစ္စယော။ နဝ။ အညမညပစ္စယေန ပစ္စယော။ နဝ။ နိဿယပစ္စယေန ပစ္စယော။ နဝ။ ဥပနိဿယပစ္စယေန ပစ္စယော။ နဝ (အာရမ္မဏနယေန ကာတဗ္ဗာ)။ အာသေဝနပစ္စယေန ပစ္စယော။ နဝ.

ကမ္မပစ္စယာဒိ

၁၁၀. သညောဇနသမ္ပယုတ္တော စေဝ နော စ သညောဇနော ဓမ္မော သညောဇနသမ္ပယုတ္တဿ စေဝ နော စ သညောဇနဿ ဓမ္မဿ ကမ္မပစ္စယေန ပစ္စယော။ တီဏိ။ အာဟာရပစ္စယေန ပစ္စယော။ တီဏိ။ ဣန္ဒြိယပစ္စယေန ပစ္စယော။ တီဏိ။ ဈာနပစ္စယေန ပစ္စယော။ တီဏိ။ မဂ္ဂပစ္စယေန ပစ္စယော။ နဝ ။ သမ္ပယုတ္တပစ္စယေန ပစ္စယော။ နဝ။ အတ္ထိပစ္စယေန ပစ္စယော ။ နဝ။ နတ္ထိပစ္စယေန ပစ္စယော။ နဝ။ ဝိဂတပစ္စယေန ပစ္စယော။ နဝ။ အဝိဂတပစ္စယေန ပစ္စယော။ နဝ.