၅. သံသဋ္ဌဝါရော

၁-၄. ပစ္စယာနုလောမာဒိ

၆၃. သညောဇနသမ္ပယုတ္တံ ဓမ္မံ သံသဋ္ဌော သညောဇနသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – သညောဇနသမ္ပယုတ္တံ ဧကံ ခန္ဓံ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။.(၁)

သညောဇနဝိပ္ပယုတ္တံ ဓမ္မံ သံသဋ္ဌော သညောဇနဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – သညောဇနဝိပ္ပယုတ္တံ ဧကံ ခန္ဓံ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၁)

သညောဇနဝိပ္ပယုတ္တံ ဓမ္မံ သံသဋ္ဌော သညောဇနသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဥဒ္ဓစ္စသဟဂတံ မောဟံ သံသဋ္ဌာ သမ္ပယုတ္တကာ ခန္ဓာ. (၂)

သညောဇနသမ္ပယုတ္တဉ္စ သညောဇနဝိပ္ပယုတ္တဉ္စ ဓမ္မံ သံသဋ္ဌော သညောဇနသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဥဒ္ဓစ္စသဟဂတံ ဧကံ ခန္ဓဉ္စ မောဟဉ္စ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။. (၁) (သံခိတ္တံ.)

၆၄. ဟေတုယာ စတ္တာရိ၊ အာရမ္မဏေ ဆ၊ အဓိပတိယာ ဒွေ၊ အနန္တရေ ဆ၊ သမနန္တရေ ဆ။ပေ။ အဝိဂတေ ဆ.

၆၅. နဟေတုယာ တီဏိ၊ နအဓိပတိယာ ဆ၊ နပုရေဇာတေ ဆ၊ နပစ္ဆာဇာတေ ဆ၊ နအာသေဝနေ ဆ၊ နကမ္မေ စတ္တာရိ၊ နဝိပါကေ ဆ၊ နဈာနေ ဧကံ၊ နမဂ္ဂေ ဧကံ၊ နဝိပ္ပယုတ္တေ ဆ.