၁. ဝိဘင်္ဂဝါရော

ဟေတုပစ္စယော

၅၁. သညောဇနသမ္ပယုတ္တံ ဓမ္မံ ပစ္စယာ သညောဇနသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (ပဋိစ္စသဒိသံ).

သညောဇနဝိပ္ပယုတ္တံ ဓမ္မံ ပစ္စယာ သညောဇနဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ (ယာဝ ပဋိသန္ဓိ)၊ ဧကံ မဟာဘူတံ။ပေ။ ဝတ္ထုံ ပစ္စယာ သညောဇနဝိပ္ပယုတ္တာ ခန္ဓာ၊ ဝတ္ထုံ ပစ္စယာ ဥဒ္ဓစ္စသဟဂတော မောဟော. (၁)

သညောဇနဝိပ္ပယုတ္တံ ဓမ္မံ ပစ္စယာ သညောဇနသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ ပစ္စယာ သညောဇနသမ္ပယုတ္တကာ ခန္ဓာ၊ ဥဒ္ဓစ္စသဟဂတံ မောဟံ ပစ္စယာ သမ္ပယုတ္တကာ ခန္ဓာ. (၂)

သညောဇနဝိပ္ပယုတ္တံ ဓမ္မံ ပစ္စယာ သညောဇနသမ္ပယုတ္တော စ သညောဇနဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – ဝတ္ထုံ ပစ္စယာ သညောဇနသမ္ပယုတ္တကာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ၊ ဥဒ္ဓစ္စသဟဂတံ မောဟံ ပစ္စယာ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ. (၃)

၅၂. သညောဇနသမ္ပယုတ္တဉ္စ သညောဇနဝိပ္ပယုတ္တဉ္စ ဓမ္မံ ပစ္စယာ သညောဇနသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – သညောဇနသမ္ပယုတ္တံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ ။ပေ။ ဒွေ ခန္ဓေ။ပေ။ ဥဒ္ဓစ္စသဟဂတံ ဧကံ ခန္ဓဉ္စ မောဟဉ္စ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။. (၁)

သညောဇနသမ္ပယုတ္တဉ္စ သညောဇနဝိပ္ပယုတ္တဉ္စ ဓမ္မံ ပစ္စယာ သညောဇနဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – သညောဇနသမ္ပယုတ္တေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ ဥဒ္ဓစ္စသဟဂတေ ခန္ဓေ စ မောဟဉ္စ ပစ္စယာ စိတ္တသမုဋ္ဌာနံ ရူပံ. (၂)

သညောဇနသမ္ပယုတ္တဉ္စ သညောဇနဝိပ္ပယုတ္တဉ္စ ဓမ္မံ ပစ္စယာ သညောဇနသမ္ပယုတ္တော စ သညောဇနဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – သညောဇနသမ္ပယုတ္တံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။ သညောဇနသမ္ပယုတ္တေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ ဥဒ္ဓစ္စသဟဂတံ ဧကံ ခန္ဓဉ္စ မောဟဉ္စ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။. (၃)

အာရမ္မဏပစ္စယော

၅၃. သညောဇနသမ္ပယုတ္တံ ဓမ္မံ ပစ္စယာ သညောဇနသမ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ။ တီဏိ (ပဋိစ္စသဒိသာ).

သညောဇနဝိပ္ပယုတ္တံ ဓမ္မံ ပစ္စယာ သညောဇနဝိပ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ (ယာဝ ပဋိသန္ဓိ)၊ ဝတ္ထုံ ပစ္စယာ သညောဇနဝိပ္ပယုတ္တာ ခန္ဓာ၊ စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ သညောဇနဝိပ္ပယုတ္တာ ခန္ဓာ၊ ဝတ္ထုံ ပစ္စယာ ဥဒ္ဓစ္စသဟဂတော မောဟော. (၁)

သညောဇနဝိပ္ပယုတ္တံ ဓမ္မံ ပစ္စယာ သညောဇနသမ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – ဝတ္ထုံ ပစ္စယာ သညောဇနသမ္ပယုတ္တကာ ခန္ဓာ၊ ဥဒ္ဓစ္စသဟဂတံ မောဟံ ပစ္စယာ သမ္ပယုတ္တကာ ခန္ဓာ. (၂)

သညောဇနဝိပ္ပယုတ္တံ ဓမ္မံ ပစ္စယာ သညောဇနသမ္ပယုတ္တော စ သညောဇနဝိပ္ပယုတ္တော စ ဓမ္မာ ဥပ္ပဇ္ဇန္တိ အာရမ္မဏပစ္စယာ – ဝတ္ထုံ ပစ္စယာ ဥဒ္ဓစ္စသဟဂတာ ခန္ဓာ စ မောဟော စ. (၃)

၅၄. သညောဇနသမ္ပယုတ္တဉ္စ သညောဇနဝိပ္ပယုတ္တဉ္စ ဓမ္မံ ပစ္စယာ သညောဇနသမ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – သညောဇနသမ္ပယုတ္တံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။ ဥဒ္ဓစ္စသဟဂတံ ဧကံ ခန္ဓဉ္စ မောဟဉ္စ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။. (၁)

သညောဇနသမ္ပယုတ္တဉ္စ သညောဇနဝိပ္ပယုတ္တဉ္စ ဓမ္မံ ပစ္စယာ သညောဇနဝိပ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – ဥဒ္ဓစ္စသဟဂတေ ခန္ဓေ စ ဝတ္ထုဉ္စ ပစ္စယာ ဥဒ္ဓစ္စသဟဂတော မောဟော. (၂)

သညောဇနသမ္ပယုတ္တဉ္စ သညောဇနဝိပ္ပယုတ္တဉ္စ ဓမ္မံ ပစ္စယာ သညောဇနသမ္ပယုတ္တော စ သညောဇနဝိပ္ပယုတ္တော စ ဓမ္မာ ဥပ္ပဇ္ဇန္တိ အာရမ္မဏပစ္စယာ – ဥဒ္ဓစ္စသဟဂတံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ မောဟော စ။ပေ။ ဒွေ ခန္ဓေ။ပေ။. (၃)

အဓိပတိပစ္စယာဒိ

၅၅. သညောဇနသမ္ပယုတ္တံ ဓမ္မံ ပစ္စယာ သညောဇနသမ္ပယုတ္တော ဓမ္မော ဥပ္ပဇ္ဇတိ အဓိပတိပစ္စယာ။ပေ။ အဝိဂတပစ္စယာ။ပေ။.