၁-၄. ပစ္စယာနုလောမာဒိ

ဟေတုပစ္စယော

၁၀. သညောဇနံ ဓမ္မံ ပစ္စယာ သညောဇနော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (ပဋိစ္စသဒိသံ).

နောသညောဇနံ ဓမ္မံ ပစ္စယာ နောသညောဇနော ဓမ္မော ဥပ္ပဇ္ဇတိ ဟေတုပစ္စယာ – နောသညောဇနံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ ခန္ဓေ ပစ္စယာ ဝတ္ထု၊ ဝတ္ထုံ ပစ္စယာ ခန္ဓာ၊ ဧကံ မဟာဘူတံ။ပေ။ မဟာဘူတေ ပစ္စယာ စိတ္တသမုဋ္ဌာနံ ရူပံ၊ ကဋတ္တာရူပံ၊ ဥပါဒါရူပံ၊ ဝတ္ထုံ ပစ္စယာ နောသညောဇနာ ခန္ဓာ. (၁)

နောသညောဇနံ ဓမ္မံ ပစ္စယာ သညောဇနော ဓမ္မော ဥပ္ပဇ္ဇတိ ဟေတုပစ္စယာ – နောသညောဇနေ ခန္ဓေ ပစ္စယာ သညောဇနာ၊ ဝတ္ထုံ ပစ္စယာ သညောဇနာ. (၂)

နောသညောဇနံ ဓမ္မံ ပစ္စယာ သညောဇနော စ နောသညောဇနော စ ဓမ္မာ ဥပ္ပဇ္ဇန္တိ ဟေတုပစ္စယာ – နောသညောဇနံ ဧကံ ခန္ဓံ ပစ္စယာ တယော ခန္ဓာ သညောဇနဉ္စ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဝတ္ထုံ ပစ္စယာ သညောဇနာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ၊ ဝတ္ထုံ ပစ္စယာ သညောဇနာ သမ္ပယုတ္တကာ စ ခန္ဓာ. (၃)

၁၁. သညောဇနဉ္စ နောသညောဇနဉ္စ ဓမ္မံ ပစ္စယာ သညောဇနော ဓမ္မော ဥပ္ပဇ္ဇတိ ဟေတုပစ္စယာ – ကာမရာဂသညောဇနဉ္စ သမ္ပယုတ္တကေ စ ခန္ဓေ ပစ္စယာ ဒိဋ္ဌိသညောဇနံ အဝိဇ္ဇာသညောဇနံ၊ ကာမရာဂသညောဇနဉ္စ ဝတ္ထုဉ္စ ပစ္စယာ ဒိဋ္ဌိသညောဇနံ အဝိဇ္ဇာသညောဇနံ (စက္ကံ) (၁)

သညောဇနဉ္စ နောသညောဇနဉ္စ ဓမ္မံ ပစ္စယာ နောသညောဇနော ဓမ္မော ဥပ္ပဇ္ဇတိ ဟေတုပစ္စယာ – နောသညောဇနံ ဧကံ ခန္ဓဉ္စ သညောဇနေ စ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ (စက္ကံ). သညောဇနေ စ ဝတ္ထုဉ္စ ပစ္စယာ နောသညောဇနာ ခန္ဓာ. (၂)

သညောဇနဉ္စ နောသညောဇနဉ္စ ဓမ္မံ ပစ္စယာ သညောဇနော စ နောသညောဇနော စ ဓမ္မာ ဥပ္ပဇ္ဇန္တိ ဟေတုပစ္စယာ – နောသညောဇနံ ဧကံ ခန္ဓဉ္စ ကာမရာဂသညောဇနဉ္စ ပစ္စယာ တယော ခန္ဓာ ဒိဋ္ဌိသညောဇနံ အဝိဇ္ဇာသညောဇနံ စိတ္တသမုဋ္ဌာနဉ္စ ရူပံ၊ ဒွေ ခန္ဓေ။ပေ။ (စက္ကံ). ကာမရာဂသညောဇနဉ္စ ဝတ္ထုဉ္စ ပစ္စယာ ဒိဋ္ဌိသညောဇနံ အဝိဇ္ဇာသညောဇနံ သမ္ပယုတ္တကာ စ ခန္ဓာ (စက္ကံ. သံခိတ္တံ). (၃)

၁၂. ဟေတုယာ နဝ၊ အာရမ္မဏေ နဝ (သဗ္ဗတ္ထ နဝ)၊ ဝိပါကေ ဧကံ။ပေ။ အဝိဂတေ နဝ.

၁၃. နဟေတုယာ စတ္တာရိ (ယတ္ထ ယတ္ထ ဝတ္ထု လဗ္ဘတိ၊ တတ္ထ တတ္ထ နိန္နေတဗ္ဗံ)၊ နအာရမ္မဏေ တီဏိ။ပေ။ နောဝိဂတေ တီဏိ.