၁. ဝိဘင်္ဂဝါရော

ဟေတုပစ္စယော

၁၂၁. အာသဝေါ စေဝ အာသဝသမ္ပယုတ္တော စ ဓမ္မော အာသဝဿ စေဝ အာသဝသမ္ပယုတ္တဿ စ ဓမ္မဿ ဟေတုပစ္စယေန ပစ္စယော။ တီဏိ.

အာသဝသမ္ပယုတ္တော စေဝ နော စ အာသဝေါ ဓမ္မော အာသဝသမ္ပယုတ္တဿ စေဝ နော စ အာသဝဿ ဓမ္မဿ ဟေတုပစ္စယေန ပစ္စယော – အာသဝသမ္ပယုတ္တာ စေဝ နော စ အာသဝါ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. (၁)

အာရမ္မဏပစ္စယာဒိ

၁၂၂. အာသဝေါ စေဝ အာသဝသမ္ပယုတ္တော စ ဓမ္မော အာသဝဿ စေဝ အာသဝသမ္ပယုတ္တဿ စ ဓမ္မဿ အာရမ္မဏပစ္စယေန ပစ္စယော။ တီဏိ.

အာသဝသမ္ပယုတ္တော စေဝ နော စ အာသဝေါ ဓမ္မော အာသဝသမ္ပယုတ္တဿ စေဝ နော စ အာသဝဿ ဓမ္မဿ အာရမ္မဏပစ္စယေန ပစ္စယော – အာသဝသမ္ပယုတ္တေ စေဝ နော စ အာသဝေ ခန္ဓေ အာရဗ္ဘ အာသဝသမ္ပယုတ္တာ စေဝ နော စ အာသဝါ ခန္ဓာ ဥပ္ပဇ္ဇန္တိ. (၁)

အာသဝသမ္ပယုတ္တော စေဝ နော စ အာသဝေါ ဓမ္မော အာသဝဿ စေဝ အာသဝသမ္ပယုတ္တဿ စ ဓမ္မဿ အာရမ္မဏပစ္စယေန ပစ္စယော – အာသဝသမ္ပယုတ္တေ စေဝ နော စ အာသဝေ ခန္ဓေ အာရဗ္ဘ အာသဝါ ဥပ္ပဇ္ဇန္တိ. (၂)

အာသဝသမ္ပယုတ္တော စေဝ နော စ အာသဝေါ ဓမ္မော အာသဝဿ စေဝ အာသဝသမ္ပယုတ္တဿ စ အာသဝသမ္ပယုတ္တဿ စေဝ နော စ အာသဝဿ စ ဓမ္မဿ အာရမ္မဏပစ္စယေန ပစ္စယော – အာသဝသမ္ပယုတ္တေ စေဝ နော စ အာသဝေ ခန္ဓေ အာရဗ္ဘ အာသဝါ စ အာသဝသမ္ပယုတ္တကာ စ ခန္ဓာ ဥပ္ပဇ္ဇန္တိ. (၃)

အာသဝေါ စေဝ အာသဝသမ္ပယုတ္တော စ အာသဝသမ္ပယုတ္တော စေဝ နော စ အာသဝေါ စ ဓမ္မာ အာသဝဿ စေဝ အာသဝသမ္ပယုတ္တဿ စ ဓမ္မဿ အာရမ္မဏပစ္စယေန ပစ္စယော ။ တီဏိ.

အဓိပတိပစ္စယာ။ (အာရမ္မဏသဒိသာ၊ ဂရုကာရမ္မဏာ) အနန္တရပစ္စယာ။ (အာရမ္မဏသဒိသာယေဝ၊ ပုရိမာ ပုရိမာတိ ကာတဗ္ဗာ.) သမနန္တရပစ္စယာ။ သဟဇာတပစ္စယာ။ အညမညပစ္စယာ။ နိဿယပစ္စယာ။ ဥပနိဿယပစ္စယာ (အာရမ္မဏသဒိသံယေဝ၊ ဝိဘဇနာ နတ္ထိ။ တီဏိ. ဥပနိဿယံ သဗ္ဗံ ကာတဗ္ဗံ).

ကမ္မပစ္စယာဒိ

၁၂၃. အာသဝသမ္ပယုတ္တော စေဝ နော စ အာသဝေါ ဓမ္မော အာသဝသမ္ပယုတ္တဿ စေဝ နော စ အာသဝဿ ဓမ္မဿ ကမ္မပစ္စယေန ပစ္စယော။ တီဏိ။ အာဟာရပစ္စယေန ပစ္စယော။ တီဏိ။ ဣန္ဒြိယပစ္စယေန ပစ္စယော။ တီဏိ။ ဈာနပစ္စယေန ပစ္စယော။ တီဏိ။ မဂ္ဂပစ္စယေန ပစ္စယော။ နဝ။ သမ္ပယုတ္တပစ္စယေန ပစ္စယော။ နဝ။ အတ္ထိပစ္စယေန ပစ္စယော။ နတ္ထိပစ္စယေန ပစ္စယော။ ဝိဂတပစ္စယေန ပစ္စယော။ အဝိဂတပစ္စယေန ပစ္စယော။ နဝ.