၁. ပစ္စယာနုလောမံ

၁. ဝိဘင်္ဂဝါရော

(ပဉှာဝါရေ ဟေတုပစ္စယေပိ အာရမ္မဏပစ္စယေပိ လောကုတ္တရံ န ကာတဗ္ဗံ၊ သေခါ ဂေါတြဘုံ ပစ္စဝေက္ခန္တိ၊ ဝေါဒါနံ ပစ္စဝေက္ခန္တီတိ ကာတဗ္ဗာ. အဓိပတိပစ္စယမ္ပိ သဗ္ဗံ ဇာနိတွာ ကာတဗ္ဗံ.)

အနန္တရပစ္စယော

၁၁၂. အာသဝေါ စေဝ သာသဝေါ စ ဓမ္မော အာသဝဿ စေဝ သာသဝဿ စ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ အာသဝါ ပစ္ဆိမာနံ ပစ္ဆိမာနံ အာသဝါနံ အနန္တရပစ္စယေန ပစ္စယော. (၁)

အာသဝေါ စေဝ သာသဝေါ စ ဓမ္မော သာသဝဿ စေဝ နော စ အာသဝဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ အာသဝါ ပစ္ဆိမာနံ ပစ္ဆိမာနံ သာသဝဉ္စေဝ နော စ အာသဝါနံ ခန္ဓာနံ အနန္တရပစ္စယေန ပစ္စယော၊ အာသဝါ ဝုဋ္ဌာနဿ အနန္တရပစ္စယေန ပစ္စယော. (၂)

အာသဝေါ စေဝ သာသဝေါ စ ဓမ္မော အာသဝဿ စေဝ သာသဝဿ စ သာသဝဿ စေဝ နော စ အာသဝဿ စ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ အာသဝါ ပစ္ဆိမာနံ ပစ္ဆိမာနံ အာသဝါနံ သမ္ပယုတ္တကာနဉ္စ ခန္ဓာနံ အနန္တရပစ္စယေန ပစ္စယော. (၃)

၁၁၃. သာသဝေါ စေဝ နော စ အာသဝေါ ဓမ္မော သာသဝဿ စေဝ နော စ အာသဝဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ သာသဝါ စေဝ နော စ အာသဝါ ခန္ဓာ ပစ္ဆိမာနံ ပစ္ဆိမာနံ သာသဝါနဉ္စေဝ နော စ အာသဝါနံ ခန္ဓာနံ အနန္တရပစ္စယေန ပစ္စယော၊ အနုလောမံ ဂေါတြဘုဿ၊ အနုလောမံ ဝေါဒါနဿ၊ အာဝဇ္ဇနာ သာသဝါနဉ္စေဝ နော စ အာသဝါနံ ခန္ဓာနံ အနန္တရပစ္စယေန ပစ္စယော. (၁)

သာသဝေါ စေဝ နော စ အာသဝေါ ဓမ္မော အာသဝဿ စေဝ သာသဝဿ စ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ သာသဝါ စေဝ နော စ အာသဝါ ခန္ဓာ ပစ္ဆိမာနံ ပစ္ဆိမာနံ အာသဝါနံ အနန္တရပစ္စယေန ပစ္စယော၊ အာဝဇ္ဇနာ အာသဝါနံ အနန္တရပစ္စယေန ပစ္စယော. (၂)

သာသဝေါ စေဝ နော စ အာသဝေါ ဓမ္မော အာသဝဿ စေဝ သာသဝဿ စ သာသဝဿ စေဝ နော စ အာသဝဿ စ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ သာသဝါ စေဝ နော စ အာသဝါ ခန္ဓာ ပစ္ဆိမာနံ ပစ္ဆိမာနံ အာသဝါနံ သမ္ပယုတ္တကာနဉ္စ ခန္ဓာနံ အနန္တရပစ္စယေန ပစ္စယော၊ အာဝဇ္ဇနာ အာသဝါနံ သမ္ပယုတ္တကာနဉ္စ ခန္ဓာနံ အနန္တရပစ္စယေန ပစ္စယော. (၃)

၁၁၄. အာသဝေါ စေဝ သာသဝေါ စ သာသဝေါ စေဝ နော စ အာသဝေါ စ ဓမ္မာ အာသဝဿ စေဝ သာသဝဿ စ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ အာသဝါ စ သမ္ပယုတ္တကာ စ ခန္ဓာ ပစ္ဆိမာနံ ပစ္ဆိမာနံ အာသဝါနံ အနန္တရပစ္စယေန ပစ္စယော. (၁)

အာသဝေါ စေဝ သာသဝေါ စ သာသဝေါ စေဝ နော စ အာသဝေါ စ ဓမ္မာ သာသဝဿ စေဝ နော စ အာသဝဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ အာသဝါ စ သမ္ပယုတ္တကာ စ ခန္ဓာ ပစ္ဆိမာနံ ပစ္ဆိမာနံ သာသဝါနဉ္စေဝ နော စ အာသဝါနံ ခန္ဓာနံ အနန္တရပစ္စယေန ပစ္စယော၊ အာသဝါ စ သမ္ပယုတ္တကာ စ ခန္ဓာ ဝုဋ္ဌာနဿ အနန္တရပစ္စယေန ပစ္စယော. (၂)

အာသဝေါ စေဝ သာသဝေါ စ သာသဝေါ စေဝ နော စ အာသဝေါ စ ဓမ္မာ အာသဝဿ စေဝ သာသဝဿ စ သာသဝဿ စေဝ နော စ အာသဝဿ စ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ အာသဝါ စ သမ္ပယုတ္တကာ စ ခန္ဓာ ပစ္ဆိမာနံ ပစ္ဆိမာနံ အာသဝါနံ သမ္ပယုတ္တကာနဉ္စ ခန္ဓာနံ အနန္တရပစ္စယေန ပစ္စယော (ဧဝံ သဗ္ဗံ ဝိတ္ထာရေတဗ္ဗံ). (၃)

(အာသဝဒုကေပိ အနန္တရံ ဣမိနာ သဒိသံ ကာတဗ္ဗံ. အာဝဇ္ဇနာပိ ဝုဋ္ဌာနမ္ပိ ဧဝံ သမုဒ္ဒိဋ္ဌံ သံခိတ္တံ. သဗ္ဗံ ပရိပုဏ္ဏံ. အာသဝဒုကသဒိသံ ကာတဗ္ဗံ၊ နိန္နာနံ.)

အာသဝသာသဝဒုကံ နိဋ္ဌိတံ.