၁. ဝိဘင်္ဂဝါရော

ဟေတုပစ္စယော

၁၀၉. အာသဝဉ္စေဝ သာသဝဉ္စ ဓမ္မံ ပဋိစ္စ အာသဝေါ စေဝ သာသဝေါ စ ဓမ္မော ဥပ္ပဇ္ဇတိ ဟေတုပစ္စယာ – ကာမာသဝံ ပဋိစ္စ ဒိဋ္ဌာသဝေါ အဝိဇ္ဇာသဝေါ (စက္ကံ ဗန္ဓိတဗ္ဗံ) ဘဝါသဝံ ပဋိစ္စ အဝိဇ္ဇာသဝေါ (စက္ကံ ဗန္ဓိတဗ္ဗံ) ဒိဋ္ဌာသဝံ ပဋိစ္စ အဝိဇ္ဇာသဝေါ. (၁)

အာသဝဉ္စေဝ သာသဝဉ္စ ဓမ္မံ ပဋိစ္စ သာသဝေါ စေဝ နော စ အာသဝေါ ဓမ္မော ဥပ္ပဇ္ဇတိ ဟေတုပစ္စယာ – အာသဝေ ပဋိစ္စ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ. (၂)

အာသဝဉ္စေဝ သာသဝဉ္စ ဓမ္မံ ပဋိစ္စ အာသဝေါ စေဝ သာသဝေါ စ သာသဝေါ စေဝ နော စ အာသဝေါ စ ဓမ္မာ ဥပ္ပဇ္ဇန္တိ ဟေတုပစ္စယာ – ကာမာသဝံ ပဋိစ္စ ဒိဋ္ဌာသဝေါ အဝိဇ္ဇာသဝေါ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ၊ ဘဝါသဝံ (စက္ကံ ဗန္ဓိတဗ္ဗံ). (၃)

၁၁၀. သာသဝဉ္စေဝ နော စ အာသဝံ ဓမ္မံ ပဋိစ္စ သာသဝေါ စေဝ နော စ အာသဝေါ ဓမ္မော ဥပ္ပဇ္ဇတိ ဟေတုပစ္စယာ – သာသဝဉ္စေဝ နော စ အာသဝံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ။ပေ။. (၁)

သာသဝဉ္စေဝ နော စ အာသဝံ ဓမ္မံ ပဋိစ္စ အာသဝေါ စေဝ သာသဝေါ စ ဓမ္မော ဥပ္ပဇ္ဇတိ ဟေတုပစ္စယာ – သာသဝေ စေဝ နော စ အာသဝေ ခန္ဓေ ပဋိစ္စ အာသဝါ. (၂)

သာသဝဉ္စေဝ နော စ အာသဝံ ဓမ္မံ ပဋိစ္စ အာသဝေါ စေဝ သာသဝေါ စ သာသဝေါ စေဝ နော စ အာသဝေါ စ ဓမ္မာ ဥပ္ပဇ္ဇန္တိ ဟေတုပစ္စယာ – သာသဝဉ္စေဝ နော စ အာသဝံ ဧကံ ခန္ဓံ ပဋိစ္စ တယော ခန္ဓာ အာသဝါ စ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။. (၃)

၁၁၁. အာသဝဉ္စေဝ သာသဝဉ္စ သာသဝဉ္စေဝ နော စ အာသဝဉ္စ ဓမ္မံ ပဋိစ္စ အာသဝေါ စေဝ သာသဝေါ စ ဓမ္မော ဥပ္ပဇ္ဇတိ ဟေတုပစ္စယာ – ကာမာသဝဉ္စ သမ္ပယုတ္တကေ စ ခန္ဓေ ပဋိစ္စ ဒိဋ္ဌာသဝေါ အဝိဇ္ဇာသဝေါ (ဧဝံ စက္ကံ ဗန္ဓိတဗ္ဗံ). (၁)

အာသဝဉ္စေဝ သာသဝဉ္စ သာသဝဉ္စေဝ နော စ အာသဝဉ္စ ဓမ္မံ ပဋိစ္စ သာသဝေါ စေဝ နော စ အာသဝေါ ဓမ္မော ဥပ္ပဇ္ဇတိ ဟေတုပစ္စယာ – သာသဝဉ္စေဝ နော စ အာသဝံ ဧကံ ခန္ဓဉ္စ အာသဝေ စ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ စ။ပေ။. (၂)

အာသဝဉ္စေဝ သာသဝဉ္စ သာသဝဉ္စေဝ နော စ အာသဝဉ္စ ဓမ္မံ ပဋိစ္စ အာသဝေါ စေဝ သာသဝေါ စ သာသဝေါ စေဝ နော စ အာသဝေါ စ ဓမ္မာ ဥပ္ပဇ္ဇန္တိ ဟေတုပစ္စယာ – သာသဝဉ္စေဝ နော စ အာသဝံ ဧကံ ခန္ဓဉ္စ ကာမာသဝဉ္စ ပဋိစ္စ တယော ခန္ဓာ ဒိဋ္ဌာသဝေါ အဝိဇ္ဇာသဝေါ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ စ။ပေ။ (စက္ကံ. သံခိတ္တံ). (၃)