၁. ဝိဘင်္ဂဝါရော

ဟေတုပစ္စယော

၇၄. အာသဝသမ္ပယုတ္တော ဓမ္မော အာသဝသမ္ပယုတ္တဿ ဓမ္မဿ ဟေတုပစ္စယေန ပစ္စယော – အာသဝသမ္ပယုတ္တာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. (၁)

အာသဝသမ္ပယုတ္တော ဓမ္မော အာသဝဝိပ္ပယုတ္တဿ ဓမ္မဿ ဟေတုပစ္စယေန ပစ္စယော – အာသဝသမ္ပယုတ္တာ ဟေတူ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော၊ ဒေါသော မောဟဿ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၂)

အာသဝသမ္ပယုတ္တော ဓမ္မော အာသဝသမ္ပယုတ္တဿ စ အာသဝဝိပ္ပယုတ္တဿ စ ဓမ္မဿ ဟေတုပစ္စယေန ပစ္စယော – အာသဝသမ္ပယုတ္တာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ဒေါသော သမ္ပယုတ္တကာနံ ခန္ဓာနံ မောဟဿ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၃)

၇၅. အာသဝဝိပ္ပယုတ္တော ဓမ္မော အာသဝဝိပ္ပယုတ္တဿ ဓမ္မဿ ဟေတုပစ္စယေန ပစ္စယော – အာသဝဝိပ္ပယုတ္တာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ဒေါမနဿသဟဂတော ဝိစိကိစ္ဆာသဟဂတော ဥဒ္ဓစ္စသဟဂတော မောဟော စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၁)

အာသဝဝိပ္ပယုတ္တော ဓမ္မော အာသဝသမ္ပယုတ္တဿ ဓမ္မဿ ဟေတုပစ္စယေန ပစ္စယော – ဒေါမနဿသဟဂတော ဝိစိကိစ္ဆာသဟဂတော ဥဒ္ဓစ္စသဟဂတော မောဟော သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. (၂)

အာသဝဝိပ္ပယုတ္တော ဓမ္မော အာသဝသမ္ပယုတ္တဿ စ အာသဝဝိပ္ပယုတ္တဿ စ ဓမ္မဿ ဟေတုပစ္စယေန ပစ္စယော – ဒေါမနဿသဟဂတော ဝိစိကိစ္ဆာသဟဂတော ဥဒ္ဓစ္စသဟဂတော မောဟော သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၃)

၇၆. အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ အာသဝသမ္ပယုတ္တဿ ဓမ္မဿ ဟေတုပစ္စယေန ပစ္စယော – ဒေါသော စ မောဟော စ အာသဝသမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. (၁)

အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ အာသဝဝိပ္ပယုတ္တဿ ဓမ္မဿ ဟေတုပစ္စယေန ပစ္စယော – ဒေါသော စ မောဟော စ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော. (၂)

အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ အာသဝသမ္ပယုတ္တဿ စ အာသဝဝိပ္ပယုတ္တဿ စ ဓမ္မဿ ဟေတုပစ္စယေန ပစ္စယော – ဒေါသော စ မောဟော စ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၃)

အာရမ္မဏပစ္စယော

၇၇. အာသဝသမ္ပယုတ္တော ဓမ္မော အာသဝသမ္ပယုတ္တဿ ဓမ္မဿ အာရမ္မဏပစ္စယေန ပစ္စယော – အာသဝသမ္ပယုတ္တေ ခန္ဓေ အာရဗ္ဘ အာသဝသမ္ပယုတ္တကာ ခန္ဓာ ဥပ္ပဇ္ဇန္တိ. (၁)

အာသဝသမ္ပယုတ္တော ဓမ္မော အာသဝဝိပ္ပယုတ္တဿ ဓမ္မဿ အာရမ္မဏပစ္စယေန ပစ္စယော – အာသဝသမ္ပယုတ္တေ ခန္ဓေ အာရဗ္ဘ အာသဝဝိပ္ပယုတ္တာ ခန္ဓာ စ မောဟော စ ဥပ္ပဇ္ဇန္တိ. (၂)

အာသဝသမ္ပယုတ္တော ဓမ္မော အာသဝသမ္ပယုတ္တဿ စ အာသဝဝိပ္ပယုတ္တဿ စ ဓမ္မဿ အာရမ္မဏပစ္စယေန ပစ္စယော – အာသဝသမ္ပယုတ္တေ ခန္ဓေ အာရဗ္ဘ ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ဥပ္ပဇ္ဇန္တိ. (၃)

၇၈. အာသဝဝိပ္ပယုတ္တော ဓမ္မော အာသဝဝိပ္ပယုတ္တဿ ဓမ္မဿ အာရမ္မဏပစ္စယေန ပစ္စယော – ဒါနံ ဒတွာ သီလံ။ပေ။ ဥပေါသထကမ္မံ ကတွာ တံ ပစ္စဝေက္ခတိ၊ ပုဗ္ဗေ သုစိဏ္ဏာနိ။ပေ။ ဈာနာ။ပေ။ အရိယာ မဂ္ဂံ။ပေ။ ဖလံ။ပေ။ နိဗ္ဗာနံ။ပေ။ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ၊ အာဝဇ္ဇနာယ အာရမ္မဏပစ္စယေန ပစ္စယော၊ အရိယာ အာသဝဝိပ္ပယုတ္တေ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ။ပေ။ ပုဗ္ဗေ။ပေ။ စက္ခုံ။ပေ။ ဝတ္ထုံ အာသဝဝိပ္ပယုတ္တေ ခန္ဓေ အနိစ္စတော ဒုက္ခတော အနတ္တတော ဝိပဿတိ. (ဣဓ အဿာဒနာ နတ္ထိ) ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. စေတောပရိယဉာဏေန အာသဝဝိပ္ပယုတ္တစိတ္တသမင်္ဂိဿ စိတ္တံ ဇာနာတိ၊ အာကာသာနဉ္စာယတနံ ဝိညာဏဉ္စာယတနဿ။ပေ။ အာကိဉ္စညာယတနံ နေဝသညာနာသညာယတနဿ။ပေ။ ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။ အာသဝဝိပ္ပယုတ္တာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ မောဟဿ အာရမ္မဏပစ္စယေန ပစ္စယော. (၁)

အာသဝဝိပ္ပယုတ္တော ဓမ္မော အာသဝသမ္ပယုတ္တဿ ဓမ္မဿ အာရမ္မဏပစ္စယေန ပစ္စယော – ဒါနံ ဒတွာ သီလံ။ပေ။ ဥပေါသထကမ္မံ ကတွာ တံ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ။ပေ။ ဝိစိကိစ္ဆာ။ပေ။ ဥဒ္ဓစ္စံ။ပေ။ ဒေါမနဿံ ဥပ္ပဇ္ဇတိ၊ ပုဗ္ဗေ သုစိဏ္ဏာနိ။ပေ။ ဈာနာ ဝုဋ္ဌဟိတွာ ဈာနံ။ပေ။ စက္ခုံ။ပေ။ ဝတ္ထုံ အာသဝဝိပ္ပယုတ္တေ ခန္ဓေ အဿာဒေတိ အဘိနန္ဒတိ၊ တံ အာရဗ္ဘ ရာဂေါ။ပေ။ ဒိဋ္ဌိ။ ဒေါမနဿံ။ ဝိစိကိစ္ဆာ။ ဥဒ္ဓစ္စံ ဥပ္ပဇ္ဇတိ. (၂)

အာသဝဝိပ္ပယုတ္တော ဓမ္မော အာသဝသမ္ပယုတ္တဿ စ အာသဝဝိပ္ပယုတ္တဿ စ ဓမ္မဿ အာရမ္မဏပစ္စယေန ပစ္စယော – စက္ခုံ။ပေ။ ဝတ္ထုံ အာသဝဝိပ္ပယုတ္တေ ခန္ဓေ အာရဗ္ဘ ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ဥပ္ပဇ္ဇန္တိ. (၃)

၇၉. အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ အာသဝသမ္ပယုတ္တဿ ဓမ္မဿ အာရမ္မဏပစ္စယေန ပစ္စယော – ဒေါမနဿသဟဂတေ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ မောဟဉ္စ အာရဗ္ဘ အာသဝသမ္ပယုတ္တာ ခန္ဓာ ဥပ္ပဇ္ဇန္တိ. (၁)

အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ အာသဝဝိပ္ပယုတ္တဿ ဓမ္မဿ အာရမ္မဏပစ္စယေန ပစ္စယော – ဒေါမနဿသဟဂတေ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ မောဟဉ္စ အာရဗ္ဘ အာသဝဝိပ္ပယုတ္တာ ခန္ဓာ စ မောဟော စ ဥပ္ပဇ္ဇန္တိ. (၂)

အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ အာသဝသမ္ပယုတ္တဿ စ အာသဝဝိပ္ပယုတ္တဿ စ ဓမ္မဿ အာရမ္မဏပစ္စယေန ပစ္စယော – ဒေါမနဿသဟဂတေ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ မောဟဉ္စ အာရဗ္ဘ ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ဥပ္ပဇ္ဇန္တိ. (၃)

အဓိပတိပစ္စယော

၈၀. အာသဝသမ္ပယုတ္တော ဓမ္မော အာသဝသမ္ပယုတ္တဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – အာသဝသမ္ပယုတ္တေ ခန္ဓေ ဂရုံ ကတွာ အာသဝသမ္ပယုတ္တကာ ခန္ဓာ ဥပ္ပဇ္ဇန္တိ. သဟဇာတာဓိပတိ – အာသဝသမ္ပယုတ္တာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော. (၁)

အာသဝသမ္ပယုတ္တော ဓမ္မော အာသဝဝိပ္ပယုတ္တဿ ဓမ္မဿ အဓိပတိပစ္စယေန ပစ္စယော. သဟဇာတာဓိပတိ – အာသဝသမ္ပယုတ္တာဓိပတိ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော၊ ဒေါမနဿသဟဂတာဓိပတိ မောဟဿ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၂)

အာသဝသမ္ပယုတ္တော ဓမ္မော အာသဝသမ္ပယုတ္တဿ စ အာသဝဝိပ္ပယုတ္တဿ စ ဓမ္မဿ အဓိပတိပစ္စယေန ပစ္စယော. သဟဇာတာဓိပတိ – အာသဝသမ္ပယုတ္တာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော၊ ဒေါမနဿသဟဂတာဓိပတိ သမ္ပယုတ္တကာနံ ခန္ဓာနံ မောဟဿ စ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၃)

၈၁. အာသဝဝိပ္ပယုတ္တော ဓမ္မော အာသဝဝိပ္ပယုတ္တဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဒါနံ ဒတွာ၊ သီလံ။ပေ။ ဥပေါသထကမ္မံ ကတွာ တံ ဂရုံ ကတွာ ပစ္စဝေက္ခတိ၊ ပုဗ္ဗေ သုစိဏ္ဏာနိ။ပေ။ ဈာနာ။ပေ။ အရိယာ မဂ္ဂါ ဝုဋ္ဌဟိတွာ မဂ္ဂံ။ပေ။ ဖလံ။ပေ။ နိဗ္ဗာနံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ အဓိပတိပစ္စယေန ပစ္စယော. သဟဇာတာဓိပတိ – အာသဝဝိပ္ပယုတ္တာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၁)

အာသဝဝိပ္ပယုတ္တော ဓမ္မော အာသဝသမ္ပယုတ္တဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – ဒါနံ ဒတွာ သီလံ။ပေ။ ဥပေါသထကမ္မံ ကတွာ တံ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ပုဗ္ဗေ သုစိဏ္ဏာနိ။ပေ။ ဈာနာ။ပေ။ စက္ခုံ။ပေ။ ဝတ္ထုံ အာသဝဝိပ္ပယုတ္တေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. (၂)

အနန္တရပစ္စယော

၈၂. အာသဝသမ္ပယုတ္တော ဓမ္မော အာသဝသမ္ပယုတ္တဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ အာသဝသမ္ပယုတ္တကာ ခန္ဓာ ပစ္ဆိမာနံ ပစ္ဆိမာနံ အာသဝသမ္ပယုတ္တကာနံ ခန္ဓာနံ အနန္တရပစ္စယေန ပစ္စယော. (၁)

အာသဝသမ္ပယုတ္တော ဓမ္မော အာသဝဝိပ္ပယုတ္တဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ ပစ္ဆိမဿ ပစ္ဆိမဿ ဒေါမနဿသဟဂတဿ ဝိစိကိစ္ဆာသဟဂတဿ ဥဒ္ဓစ္စသဟဂတဿ မောဟဿ အနန္တရပစ္စယေန ပစ္စယော၊ အာသဝသမ္ပယုတ္တာ ခန္ဓာ ဝုဋ္ဌာနဿ အနန္တရပစ္စယေန ပစ္စယော. (၂)

အာသဝသမ္ပယုတ္တော ဓမ္မော အာသဝသမ္ပယုတ္တဿ စ အာသဝဝိပ္ပယုတ္တဿ စ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ ပစ္ဆိမာနံ ပစ္ဆိမာနံ ဒေါမနဿသဟဂတာနံ ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ မောဟဿ စ အနန္တရပစ္စယေန ပစ္စယော. (၃)

၈၃. အာသဝဝိပ္ပယုတ္တော ဓမ္မော အာသဝဝိပ္ပယုတ္တဿ ဓမ္မဿ အနန္တရပစ္စယေန ပစ္စယော – ပုရိမော ပုရိမော ဒေါမနဿသဟဂတော ဝိစိကိစ္ဆာသဟဂတော ဥဒ္ဓစ္စသဟဂတော မောဟော ပစ္ဆိမဿ ပစ္ဆိမဿ ဒေါမနဿသဟဂတဿ ဝိစိကိစ္ဆာသဟဂတဿ ဥဒ္ဓစ္စသဟဂတဿ မောဟဿ အနန္တရပစ္စယေန ပစ္စယော၊ ပုရိမာ ပုရိမာ အာသဝဝိပ္ပယုတ္တာ ခန္ဓာ ပစ္ဆိမာနံ ပစ္ဆိမာနံ အာသဝဝိပ္ပယုတ္တာနံ ခန္ဓာနံ အနန္တရပစ္စယေန ပစ္စယော၊ အနုလောမံ ဂေါတြဘုဿ။ပေ။ ဖလသမာပတ္တိယာ အနန္တရပစ္စယေန ပစ္စယော. (၁)

အာသဝဝိပ္ပယုတ္တော ဓမ္မော အာသဝသမ္ပယုတ္တဿ ဓမ္မဿ အနန္တရပစ္စယေန ပစ္စယော – ပုရိမော ပုရိမော ဒေါမနဿသဟဂတော ဝိစိကိစ္ဆာသဟဂတော ဥဒ္ဓစ္စသဟဂတော မောဟော ပစ္ဆိမာနံ ပစ္ဆိမာနံ ဒေါမနဿသဟဂတာနံ ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ အနန္တရပစ္စယေန ပစ္စယော၊ အာဝဇ္ဇနာ အာသဝသမ္ပယုတ္တကာနံ ခန္ဓာနံ အနန္တရပစ္စယေန ပစ္စယော. (၂)

အာသဝဝိပ္ပယုတ္တော ဓမ္မော အာသဝသမ္ပယုတ္တဿ စ အာသဝဝိပ္ပယုတ္တဿ စ ဓမ္မဿ အနန္တရပစ္စယေန ပစ္စယော – ပုရိမော ပုရိမော ဒေါမနဿသဟဂတော ဝိစိကိစ္ဆာသဟဂတော ဥဒ္ဓစ္စသဟဂတော မောဟော ပစ္ဆိမာနံ ပစ္ဆိမာနံ ဒေါမနဿသဟဂတာနံ ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ မောဟဿ စ အနန္တရပစ္စယေန ပစ္စယော၊ အာဝဇ္ဇနာ ဒေါမနဿသဟဂတာနံ ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ မောဟဿ စ အနန္တရပစ္စယေန ပစ္စယော. (၃)

၈၄. အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ အာသဝသမ္ပယုတ္တဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ပစ္ဆိမာနံ ပစ္ဆိမာနံ ဒေါမနဿသဟဂတာနံ ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ အနန္တရပစ္စယေန ပစ္စယော. (၁)

အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ အာသဝဝိပ္ပယုတ္တဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ပစ္ဆိမဿ ပစ္ဆိမဿ ဒေါမနဿသဟဂတဿ ဝိစိကိစ္ဆာသဟဂတဿ ဥဒ္ဓစ္စသဟဂတဿ မောဟဿ အနန္တရပစ္စယေန ပစ္စယော၊ ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ဝုဋ္ဌာနဿ အနန္တရပစ္စယေန ပစ္စယော. (၂)

အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ အာသဝသမ္ပယုတ္တဿ စ အာသဝဝိပ္ပယုတ္တဿ စ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ပစ္ဆိမာနံ ပစ္ဆိမာနံ ဒေါမနဿသဟဂတာနံ ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ မောဟဿ စ အနန္တရပစ္စယေန ပစ္စယော. (၃)

သမနန္တရပစ္စယာဒိ

၈၅. အာသဝသမ္ပယုတ္တော ဓမ္မော အာသဝသမ္ပယုတ္တဿ ဓမ္မဿ သမနန္တရပစ္စယေန ပစ္စယော။ သဟဇာတပစ္စယေန ပစ္စယော။ နဝ။ အညမညပစ္စယေန ပစ္စယော။ ဆ။ နိဿယပစ္စယေန ပစ္စယော။ နဝ.

ဥပနိဿယပစ္စယော

၈၆. အာသဝသမ္ပယုတ္တော ဓမ္မော အာသဝသမ္ပယုတ္တဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – အာသဝသမ္ပယုတ္တာ ခန္ဓာ အာသဝသမ္ပယုတ္တာနံ ခန္ဓာနံ ဥပနိဿယပစ္စယေန ပစ္စယော. (၁)

အာသဝသမ္ပယုတ္တော ဓမ္မော အာသဝဝိပ္ပယုတ္တဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – အာသဝသမ္ပယုတ္တာ ခန္ဓာ အာသဝဝိပ္ပယုတ္တာနံ ခန္ဓာနံ မောဟဿ စ ဥပနိဿယပစ္စယေန ပစ္စယော. (၂)

အာသဝသမ္ပယုတ္တော ဓမ္မော အာသဝသမ္ပယုတ္တဿ စ အာသဝဝိပ္ပယုတ္တဿ စ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – အာသဝသမ္ပယုတ္တကာ ခန္ဓာ ဒေါမနဿသဟဂတာနံ ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ မောဟဿ စ ဥပနိဿယပစ္စယေန ပစ္စယော. (၃)

၈၇. အာသဝဝိပ္ပယုတ္တော ဓမ္မော အာသဝဝိပ္ပယုတ္တဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဒ္ဓံ ဥပနိဿာယ ဒါနံ ဒေတိ။ပေ။ သီလံ။ပေ။ ပညံ။ ကာယိကံ သုခံ။ပေ။ သေနာသနံ။ မောဟံ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ၊ သဒ္ဓါ။ပေ။ ပညာ။ ကာယိကံ သုခံ။ ကာယိကံ ဒုက္ခံ။ မောဟော စ သဒ္ဓါယ။ပေ။ မောဟဿ စ ဥပနိဿယပစ္စယေန ပစ္စယော. (၁)

အာသဝဝိပ္ပယုတ္တော ဓမ္မော အာသဝသမ္ပယုတ္တဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဒ္ဓံ ဥပနိဿာယ မာနံ ဇပ္ပေတိ၊ ဒိဋ္ဌိံ ဂဏှာတိ၊ သီလံ။ပေ။ ပညံ။ ကာယိကံ သုခံ။ ကာယိကံ ဒုက္ခံ။ ဥတုံ။ ဘောဇနံ။ သေနာသနံ။ မောဟံ ဥပနိဿာယ ပါဏံ ဟနတိ။ပေ။ သံဃံ ဘိန္ဒတိ၊ သဒ္ဓါ။ပေ။ မောဟော စ ရာဂဿ။ပေ။ ပတ္ထနာယ ဥပနိဿယပစ္စယေန ပစ္စယော. (၂)

အာသဝဝိပ္ပယုတ္တော ဓမ္မော အာသဝသမ္ပယုတ္တဿ စ အာသဝဝိပ္ပယုတ္တဿ စ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဒ္ဓါ။ သီလံ။ပေ။ မောဟော ဒေါမနဿသဟဂတာနံ ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ မောဟဿ စ ဥပနိဿယပစ္စယေန ပစ္စယော. (၃)

၈၈. အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ အာသဝသမ္ပယုတ္တဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော ။ပေ။. ပကတူပနိဿယော – ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ အာသဝသမ္ပယုတ္တကာနံ ခန္ဓာနံ ဥပနိဿယပစ္စယေန ပစ္စယော. (ပုစ္ဆိတဗ္ဗံ မူလံ) ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ အာသဝသမ္ပယုတ္တကာနံ ခန္ဓာနံ ဥပနိဿယပစ္စယေန ပစ္စယော. (၁)

အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ အာသဝသမ္ပယုတ္တဿ စ အာသဝဝိပ္ပယုတ္တဿ စ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ဒေါမနဿသဟဂတာနံ ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ မောဟဿ စ ဥပနိဿယပစ္စယေန ပစ္စယော. (၂)

ပုရေဇာတပစ္စယော

၈၉. အာသဝဝိပ္ပယုတ္တော ဓမ္မော အာသဝဝိပ္ပယုတ္တဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အနိစ္စတော ဒုက္ခတော အနတ္တတော ဝိပဿတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ ပုရေဇာတပစ္စယေန ပစ္စယော. ဝတ္ထုပုရေဇာတံ – စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ။ပေ။ ဝတ္ထု အာသဝဝိပ္ပယုတ္တာနံ ခန္ဓာနံ မောဟဿ စ ပုရေဇာတပစ္စယေန ပစ္စယော. (၁)

အာသဝဝိပ္ပယုတ္တော ဓမ္မော အာသဝသမ္ပယုတ္တဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ။ပေ။ ဒေါမနဿံ ဥပ္ပဇ္ဇတိ. ဝတ္ထုပုရေဇာတံ – ဝတ္ထု အာသဝသမ္ပယုတ္တကာနံ ခန္ဓာနံ ပုရေဇာတပစ္စယေန ပစ္စယော. (၂)

အာသဝဝိပ္ပယုတ္တော ဓမ္မော အာသဝသမ္ပယုတ္တဿ စ အာသဝဝိပ္ပယုတ္တဿ စ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အာရဗ္ဘ ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ဥပ္ပဇ္ဇန္တိ. ဝတ္ထုပုရေဇာတံ – ဝတ္ထု ဒေါမနဿသဟဂတာနံ ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ မောဟဿ စ ပုရေဇာတပစ္စယေန ပစ္စယော. (၃)

ပစ္ဆာဇာတပစ္စယော

၉၀. အာသဝသမ္ပယုတ္တော ဓမ္မော အာသဝဝိပ္ပယုတ္တဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ အာသဝသမ္ပယုတ္တကာ ခန္ဓာ ပုရေဇာတဿ ဣမဿ ကာယဿ ပစ္ဆာဇာတပစ္စယေန ပစ္စယော. (၁)

အာသဝဝိပ္ပယုတ္တော ဓမ္မော အာသဝဝိပ္ပယုတ္တဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ အာသဝဝိပ္ပယုတ္တာ ခန္ဓာ စ မောဟော စ ပုရေဇာတဿ ဣမဿ ကာယဿ ပစ္ဆာဇာတပစ္စယေန ပစ္စယော. (၁)

အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ အာသဝဝိပ္ပယုတ္တဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ပုရေဇာတဿ ဣမဿ ကာယဿ ပစ္ဆာဇာတပစ္စယေန ပစ္စယော. (၁)

အာသေဝနပစ္စယော

၉၁. အာသဝသမ္ပယုတ္တော ဓမ္မော အာသဝသမ္ပယုတ္တဿ ဓမ္မဿ အာသေဝနပစ္စယေန ပစ္စယော။ နဝ (အာဝဇ္ဇနာပိ ဝုဋ္ဌာနမ္ပိ နတ္ထိ ).

ကမ္မပစ္စယော

၉၂. အာသဝသမ္ပယုတ္တော ဓမ္မော အာသဝသမ္ပယုတ္တဿ ဓမ္မဿ ကမ္မပစ္စယေန ပစ္စယော – အာသဝသမ္ပယုတ္တကာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော. (၁)

အာသဝသမ္ပယုတ္တော ဓမ္မော အာသဝဝိပ္ပယုတ္တဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – အာသဝသမ္ပယုတ္တာ စေတနာ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော၊ ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ စေတနာ မောဟဿ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော. နာနာက္ခဏိကာ – အာသဝသမ္ပယုတ္တကာ စေတနာ ဝိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော. (၂)

အာသဝသမ္ပယုတ္တော ဓမ္မော အာသဝသမ္ပယုတ္တဿ စ အာသဝဝိပ္ပယုတ္တဿ စ ဓမ္မဿ ကမ္မပစ္စယေန ပစ္စယော – အာသဝသမ္ပယုတ္တာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော၊ ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ စေတနာ သမ္ပယုတ္တကာနံ ခန္ဓာနံ မောဟဿ စ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော. (၃)

အာသဝဝိပ္ပယုတ္တော ဓမ္မော အာသဝဝိပ္ပယုတ္တဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – အာသဝဝိပ္ပယုတ္တာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. နာနာက္ခဏိကာ အာသဝဝိပ္ပယုတ္တာ စေတနာ ဝိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော. (၁)

ဝိပါကပစ္စယော

၉၃. အာသဝဝိပ္ပယုတ္တော ဓမ္မော အာသဝဝိပ္ပယုတ္တဿ ဓမ္မဿ ဝိပါကပစ္စယေန ပစ္စယော။ ဧကံ.

အာဟာရပစ္စယော

၉၄. အာသဝသမ္ပယုတ္တော ဓမ္မော အာသဝသမ္ပယုတ္တဿ ဓမ္မဿ အာဟာရပစ္စယေန ပစ္စယော – အာသဝသမ္ပယုတ္တာ အာဟာရာ သမ္ပယုတ္တကာနံ ခန္ဓာနံ အာဟာရပစ္စယေန ပစ္စယော. (၁)

အာသဝသမ္ပယုတ္တော ဓမ္မော အာသဝဝိပ္ပယုတ္တဿ ဓမ္မဿ အာဟာရပစ္စယေန ပစ္စယော – အာသဝသမ္ပယုတ္တာ အာဟာရာ စိတ္တသမုဋ္ဌာနာနံ ရူပါနံ အာဟာရပစ္စယေန ပစ္စယော၊ ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ အာဟာရာ မောဟဿ စိတ္တသမုဋ္ဌာနာနဉ္စ ရူပါနံ အာဟာရပစ္စယေန ပစ္စယော. (၂)

အာသဝသမ္ပယုတ္တော ဓမ္မော အာသဝသမ္ပယုတ္တဿ စ အာသဝဝိပ္ပယုတ္တဿ စ ဓမ္မဿ အာဟာရပစ္စယေန ပစ္စယော – အာသဝသမ္ပယုတ္တာ အာဟာရာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အာဟာရပစ္စယေန ပစ္စယော၊ ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ အာဟာရာ သမ္ပယုတ္တကာနံ ခန္ဓာနံ မောဟဿ စ စိတ္တသမုဋ္ဌာနာနဉ္စ ရူပါနံ အာဟာရပစ္စယေန ပစ္စယော. (၃)

၉၅. အာသဝဝိပ္ပယုတ္တော ဓမ္မော အာသဝဝိပ္ပယုတ္တဿ ဓမ္မဿ အာဟာရပစ္စယေန ပစ္စယော – အာသဝဝိပ္ပယုတ္တာ အာဟာရာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အာဟာရပစ္စယေန ပစ္စယော၊ ပဋိသန္ဓိက္ခဏေ။ပေ။ ကဗဠီကာရော အာဟာရော ဣမဿ ကာယဿ အာဟာရပစ္စယေန ပစ္စယော. (၁)

ဣန္ဒြိယပစ္စယာဒိ

၉၆. အာသဝသမ္ပယုတ္တော ဓမ္မော အာသဝသမ္ပယုတ္တဿ ဓမ္မဿ ဣန္ဒြိယပစ္စယေန ပစ္စယော။ စတ္တာရိ။ ဈာနပစ္စယေန ပစ္စယော။ စတ္တာရိ။ မဂ္ဂပစ္စယေန ပစ္စယော။ စတ္တာရိ။ သမ္ပယုတ္တပစ္စယေန ပစ္စယော။ ဆ.

ဝိပ္ပယုတ္တပစ္စယော

၉၇. အာသဝသမ္ပယုတ္တော ဓမ္မော အာသဝဝိပ္ပယုတ္တဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ. သဟဇာတာ – အာသဝသမ္ပယုတ္တာ ခန္ဓာ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော. ပစ္ဆာဇာတာ – အာသဝသမ္ပယုတ္တာ ခန္ဓာ ပုရေဇာတဿ ဣမဿ ကာယဿ ဝိပ္ပယုတ္တပစ္စယေန ပစ္စယော. (၁)

အာသဝဝိပ္ပယုတ္တော ဓမ္မော အာသဝဝိပ္ပယုတ္တဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ (သံခိတ္တံ. ဝိတ္ထာရေတဗ္ဗံ). (၁)

၉၈. အာသဝဝိပ္ပယုတ္တော ဓမ္မော အာသဝသမ္ပယုတ္တဿ ဓမ္မဿ ဝိပ္ပယုတ္တပစ္စယေန ပစ္စယော. ပုရေဇာတံ – ဝတ္ထု အာသဝသမ္ပယုတ္တကာနံ ခန္ဓာနံ ဝိပ္ပယုတ္တပစ္စယေန ပစ္စယော. (၁)

အာသဝဝိပ္ပယုတ္တော ဓမ္မော အာသဝသမ္ပယုတ္တဿ စ အာသဝဝိပ္ပယုတ္တဿ စ ဓမ္မဿ ဝိပ္ပယုတ္တပစ္စယေန ပစ္စယော. ပုရေဇာတံ – ဝတ္ထု ဒေါမနဿသဟဂတာနံ ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ မောဟဿ စ ဝိပ္ပယုတ္တပစ္စယေန ပစ္စယော. (၂)

အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ အာသဝဝိပ္ပယုတ္တဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ. သဟဇာတာ – ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော. ပစ္ဆာဇာတာ – ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ပုရေဇာတဿ ဣမဿ ကာယဿ ဝိပ္ပယုတ္တပစ္စယေန ပစ္စယော. (၁)

အတ္ထိပစ္စယော

၉၉. အာသဝသမ္ပယုတ္တော ဓမ္မော အာသဝသမ္ပယုတ္တဿ ဓမ္မဿ အတ္ထိပစ္စယေန ပစ္စယော။ ဧကံ. (၁)

အာသဝသမ္ပယုတ္တော ဓမ္မော အာသဝဝိပ္ပယုတ္တဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ. သဟဇာတာ – အာသဝသမ္ပယုတ္တာ ခန္ဓာ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော၊ ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ မောဟဿ စ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော. ပစ္ဆာဇာတာ – အာသဝသမ္ပယုတ္တာ ခန္ဓာ ပုရေဇာတဿ ဣမဿ ကာယဿ အတ္ထိပစ္စယေန ပစ္စယော. (၂)

အာသဝသမ္ပယုတ္တော ဓမ္မော အာသဝသမ္ပယုတ္တဿ စ အာသဝဝိပ္ပယုတ္တဿ စ ဓမ္မဿ အတ္ထိပစ္စယေန ပစ္စယော (သဟဇာတသဒိသံ). (၃)

၁၀၀. အာသဝဝိပ္ပယုတ္တော ဓမ္မော အာသဝဝိပ္ပယုတ္တဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ (သံခိတ္တံ၊ ဝိတ္ထာရေတဗ္ဗံ). (၁)

အာသဝဝိပ္ပယုတ္တော ဓမ္မော အာသဝသမ္ပယုတ္တဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – ဒေါမနဿသဟဂတော ဝိစိကိစ္ဆာသဟဂတော ဥဒ္ဓစ္စသဟဂတော မောဟော သမ္ပယုတ္တကာနံ ခန္ဓာနံ အတ္ထိပစ္စယေန ပစ္စယော. ပုရေဇာတံ – စက္ခုံ။ပေ။ ဝတ္ထုံ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဝိစိကိစ္ဆာ ဥပ္ပဇ္ဇတိ၊ ဥဒ္ဓစ္စံ ဥပ္ပဇ္ဇတိ၊ ဒေါမနဿံ ဥပ္ပဇ္ဇတိ၊ ဝတ္ထု အာသဝသမ္ပယုတ္တကာနံ ခန္ဓာနံ အတ္ထိပစ္စယေန ပစ္စယော. (၂)

အာသဝဝိပ္ပယုတ္တော ဓမ္မော အာသဝသမ္ပယုတ္တဿ စ အာသဝဝိပ္ပယုတ္တဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – ဒေါမနဿသဟဂတော ဝိစိကိစ္ဆာသဟဂတော ဥဒ္ဓစ္စသဟဂတော မောဟော သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော. ပုရေဇာတံ – စက္ခုံ။ပေ။ ဝတ္ထုံ အာရဗ္ဘ ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ဥပ္ပဇ္ဇန္တိ. (၃)

၁၀၁. အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ အာသဝသမ္ပယုတ္တဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – အာသဝသမ္ပယုတ္တော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။ ဒေါမနဿသဟဂတော ဝိစိကိစ္ဆာသဟဂတော ဥဒ္ဓစ္စသဟဂတော ဧကော ခန္ဓော စ မောဟော စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော၊ ဒွေ ခန္ဓာ စ။ပေ။. (၁)

အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ အာသဝဝိပ္ပယုတ္တဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတာ – အာသဝသမ္ပယုတ္တာ ခန္ဓာ စ မဟာဘူတာ စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော၊ ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော၊ ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ ဝတ္ထု စ မောဟဿ အတ္ထိပစ္စယေန ပစ္စယော. ပစ္ဆာဇာတာ – အာသဝသမ္ပယုတ္တာ ခန္ဓာ စ ကဗဠီကာရော အာဟာရော စ ဣမဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – အာသဝသမ္ပယုတ္တာ ခန္ဓာ စ ရူပဇီဝိတိန္ဒြိယဉ္စ ကဋတ္တာရူပါနံ အတ္ထိပစ္စယေန ပစ္စယော. (၂)

အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ အာသဝသမ္ပယုတ္တဿ စ အာသဝဝိပ္ပယုတ္တဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – ဒေါမနဿသဟဂတော ဝိစိကိစ္ဆာသဟဂတော ဥဒ္ဓစ္စသဟဂတော ဧကော ခန္ဓော စ မောဟော စ တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။. သဟဇာတော – ဒေါမနဿသဟဂတော ဝိစိကိစ္ဆာသဟဂတော ဥဒ္ဓစ္စသဟဂတော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ မောဟဿ စ။ပေ။ ဒွေ ခန္ဓာ စ။ပေ။. (၃)